Sigui “Karga Hopi Fruta”

¹ Den un ilustrashon, Hesus a kompará su mes ku e berdadero mata di wendrùif, su Tata ku un Kunukero i su siguidónan ungí-ku-spiritu ku ramanan produktivo di e mata di wendrùif. Ora Hesus tabata deskribí e trabou di e Kultivadó simbóliko, el a enfatisá e importansia di keda firmemente pegá na e mata di wendrùif. (Juan 15:​1-⁠4) E lès di e ilustrashon aki ta ku tur hende ku tin un relashon personal i íntimo ku Yehova mester ta manera un rama produktivo di e “berdadero mata di wendrùif” ku ta Hesukristu. Nos tin ku sigui produsí un abundansia di tantu “fruta di e spiritu” komo fruta di Reino.​—⁠Gal. 5:​22, 23; Mat. 24:⁠14; 28:​19, 20.

² Fruta di e Spiritu: Básikamente nos por midi nos progreso spiritual n’e grado ku nos ta manifestá fruta di e spiritu. Bo ta hasi esfuerso pa kultivá fruta di e spiritu di Dios dor di studia i meditá regularmente riba e Palabra di Dios? (Fil. 1:​9-⁠11) No keda sin pidi Dios pa su spiritu santu ya ku esaki por produsí den bo kualidatnan ku ta glorifiká Yehova i ku por yuda bo sigui progresá spiritualmente.​—⁠Luk. 11:⁠13; Juan 13:⁠35.

³ Ademas, ora nos ta kultivá fruta di e spiritu esei por yuda nos bira predikadónan mas seloso. Por ehèmpel, amor i fe ta motivá nos pa saka tempu di nos programa drùk pa partisipá regularmente den e ministerio. Kualidatnan manera pas, pasenshi, bondat, suavedat i dominio propio ta yuda nos reakshoná na un manera apropiá ora nos topa hende ku ta oponé nos. Goso ta yuda nos haña satisfakshon den e ministerio asta ora hende no ta reakshoná bon.

⁴ Fruta di Reino: Nos tin ku karga òf produsí fruta di Reino tambe. Esei ta enserá ofresé “un sakrifisio di alabansa na [Yehova], esta, e fruta di lepnan ku ta duna gradisimentu na su nòmber.” (Heb. 13:⁠15) Nos ta hasi esaki ora nos prediká e bon nobo ku entusiasmo i konvikshon. Bo ta hasiendo esfuerso pa mehorá bo sirbishi personal pa asina bo karga mas fruta di Reino?

⁵ Hesus a indiká ku kada un di su siguidónan fiel lo a karga un sierto kantidat di fruta. (Mat. 13:23) P’esei, nos no mester kompará nos mes ku otro publikadó. Mas bien, nos tin ku duna Yehova lo mihó ku nos por. (Gal. 6:⁠4) Un análisis onesto di nos sirkunstansianan personal ku yudansa di e Palabra di Dios lo yuda nos sigui glorifiká Yehova dor di “karga hopi fruta.”​—⁠Juan 15:⁠8.