Kaha di Pregunta

E “esklabo fiel i prudente” ta aprobá gruponan independiente di Testigunan di Yehova ku ta reuní huntu pa investigá e Skritura òf debatí riba dje?—Mat. 24:45, 47.

Nò, e no ta aprobá esei. I tòg, na vários parti di mundu, tin algun miembro di nos organisashon ku a forma gruponan ku ta hasi investigashon independiente riba tópikonan relashoná ku Beibel. Algun a forma grupo di estudio independiente di e idiomanan bíbliko hebreo i griego pa asina nan por analisá e eksaktitut di e Tradukshon di Mundu Nobo. Otronan ta investigá tópikonan sientífiko relashoná ku Beibel. Nan a krea website i chat room ku e propósito di interkambiá nan punto di bista i debatí riba esakinan. Ademas, nan a tene konferensianan i a produsí publikashonnan pa presentá loke nan a saka afó i pa komplementá loke e esklabo fiel ta perkurá na nos reunionnan kristian i mediante nos literatura.

Rònt mundu, e pueblo di Yehova ta risibí un abundansia di instrukshon spiritual i animashon na e reunionnan di kongregashon, asamblea- i kongresonan i tambe mediante e publikashonnan di e organisashon di Yehova. Bou di guia di su spiritu santu i ku su Palabra di bèrdat komo e base, Yehova ta perkurá loke ta nesesario pa tur ku ta forma parti di su pueblo por ta “uní den e mesun mente i den e mesun opinion” i keda ‘establesí den fe.’ (1 Kor. 1:10; Kol. 2:6, 7) Sin duda nos ta gradisidu pa e provishonnan spiritual ku Yehova ta proveé den e último dianan aki. P’esei, “e esklabo fiel i prudente” no ta aprobá ningun literatura, reunion òf website ku no a ser produsí òf organisá bou di su supervishon.—Mat. 24:45-47.

Personanan ku ke usa nan abilidat di pensa pa apoyá e bon nobo meresé elogio. Sin embargo, ningun meta personal no mester minimisá loke Hesukristu ta logrando mediante su kongregashon riba tera awe. Den promé siglo, apòstel Pablo a spièrta kristiannan pa nan no enbolbé nan mes den tópikonan ku ta agotador i ku ta tuma tempu, manera “genealogianan sin fin, kuanan mas bien ta lanta spekulashon na lugá di e obra di Dios ku ta pa medio di fe.” (1 Tim. 1:3-7) Tur kristian mester hasi esfuerso pa “evitá kontroversianan bobo i genealogianan i pleitu i diskushonnan tokante di Lei; pasobra nan ta sin probecho i no ta bal nada.”—Tito 3:9.

Nos ta rekomendá kristiannan ku ke hasi estudio di Beibel i investigashon adishonal pa usa e volúmennan Perspikasia pa Komprondé e Skritura, e buki “Tur Skritura Ta Inspirá di Dios i Probechoso” i otro publikashonnan di nos, manera esnan ku ta splika e profesianan den e bukinan di Beibel, Daniel, Isaias i Revelashon. E publikashonnan aki ta proveé un abundansia di informashon pa estudio di Beibel i meditashon. Pues ta nan por yena nos ‘ku e konosementu di Dios su boluntat den tur sabiduria spiritual i komprondementu, pa nos kana na un manera digno di Yehova, pa agrad’é den tur sentido, dunando fruta den tur bon obra i kresiendo den e konosementu di Dios.’—Kol. 1:9, 10.