Buska e Hendenan Ku Ta Digno
1. Kon nos por mustra apresio pa e privilegio di sirbi den e ministerio?
1 Durante su ministerio, Hesus a hasi hopi esfuerso pa konsolá hende mansu ku e bon nobo. (Isa. 61:1, 2) Komo embahador i mensahero supstituto pa Kristu, nos tin e maravioso privilegio di imit’é den nos búskeda inkansabel i kuidadoso di hende digno den nos teritorio.—Mat. 10:11; 2 Kor. 5:20.
2. Kiko ta mustra ku Pablo a adaptá su mes, i ku ki resultado?
2 Adaptá Bo Mes: Apòstel Pablo tabatin kustumber di bai prinsipalmente den snoa pa prediká na e hudiunan i prosélitonan. (Echo. 14:1) Na Filipos, Pablo ku Silas a bai buska hende kaminda ‘nan a suponé ku tabatin un lugá pa hasi orashon.’ Nan a kuminsá duna testimonio na un grupo di hende muhé, i un di nan, esta Lidia, a aseptá e bèrdat masha lihé.—Echo. 16:12-15.
3. Ki otro método di duna testimonio nos tin fuera di predikashon di kas pa kas?
3 Fuera di e predikashon di kas pa kas, bo por prediká tambe na lugánan manera parada di bùs, den parke, ofisina di mediashon pa trabou, skina di kaya ku ta drùk, lugánan di negoshi i sentronan komersial den bo teritorio. Kiko di e hendenan ku ta biba den komplehonan di residensia será pa públiko i ku tin pòrtir na entrada òf apartamentonan ku bo no por yega na dje fásilmente? Bo por duna nan testimonio via karta òf telefòn. Si nos opservá i adaptá na kambionan ku tuma lugá den teritorio, nos lo tin hopi di hasi “den e trabou di Señor.”—1 Kor. 15:58.
4. Ki otro posibilidat nos tin si nos kongregashon no tin hopi teritorio?
4 Hopi publikadó tabatin oportunidat di ekspandé nan sirbishi dor di muda pa un otro kongregashon sea den nan pais òf na un otro parti di mundu. Otro publikadónan a siña un otro idioma pa nan por prediká na hende ku a bini di un otro pais.
5. Kon nos mester mira e tempu ku nos ta bibando aden, i kiko mester ta nos determinashon?
5 Nos tur mester tene kuenta ku “e kunuku ta e mundu.” (Mat. 9:37; 13:38) Debí ku e fin di e sistema di kosnan ta serka, kada un di nos mester pensa seriamente riba su situashon, abilidatnan, oportunidatnan i posibilidatnan pa ekspandé su ministerio. Yehova ta sigurá nos ku si nos pone e interesnan di Reino na promé lugá den nos bida, lo e bendishoná nos esfuersonan sinsero pa ekspandé nos ministerio.—Mat. 6:33.