Sinku Manera pa Haña un Estudio di Beibel
1. Kiko nos mester hasi si ta difísil pa haña un estudio di Beibel den teritorio?
1 Bo ta haña ku ta difísil pa haña un hende ku ke un estudio di Beibel? Si esei ta e kaso, no entregá. Yehova ta bendishoná esnan ku no ta stòp di hasi su boluntat. (Gal. 6:9) Ban wak sinku sugerensia ku por yuda bo.
2. Kon nos por usa e método direkto pa kuminsá un estudio di Beibel?
2 Usa e Método Direkto: Hopi hende sa ku nos ta ofresé E Toren di Vigilansia i ¡Despertad!, pero kisas nan no sa ku nos ta ofresé estudio di Beibel. Pues dikon bo no ta purba ofresé un estudio di Beibel dirèkt na hende den sirbishi? Tambe bo por puntra bo rebishitanan si nan ke un estudio di Beibel. Si nan no ke, bo por sigui hiba literatura i kultivá nan interes. Pa hopi aña un ruman hòmber tabatin un ruta di revista ku un pareha kasá. Na un okashon, despues ku el a duna nan e revistanan mas resien, el a bira pa bai pero a disidí di puntra nan: “Boso lo a deseá un estudio di Beibel?” Pa su sorpresa nan a kontesta ku sí. I awor nan tur dos ta batisá.
3. Pakiko nos no mester asumí ku tur hende ku ta bini reunion ya tin un estudio di Beibel?
3 Ofresé Estudio na Hende Ku Ta Bini Reunion: No asumí ku tur hende ku ta asistí na e reunionnan ya tin un estudio di Beibel. Un ruman hòmber a konta: “Mas ku mitar di e estudionan ku mi a kondusí tabata ku hende ku a bishitá e reunionnan.” Un señora tímido tabatin 15 aña ta bishitá e reunionnan huntu ku su yunan muhé, kendenan tabata batisá kaba. E señora tabata drenta Salòn di Reino nèt ora reunion kuminsá i sali manera e kaba. Riba un dia un ruman a aserká e señora i a ofres’é un estudio di Beibel; e señora a aseptá i despues a bini den e bèrdat. E ruman muhé a skirbi: “Ta duel mi ku mi a warda 15 aña pa puntr’é si e ke studia.”
4. Kon nos por laga otronan sa ku nos ta disponibel pa kondusí estudio?
4 Laga Hende Sa Ku Bo Ta Disponibel: Un ruman muhé tin kustumber di kompañá otro publikadó na nan estudionan di Beibel. Na final di e estudio, ku pèrmit di esun ku ta kondusí, e ta puntra e studiante si e sa di otro hende ku tambe lo ta deseá un estudio. Si bo ofresé un rebishita e buki Beibel Ta Siña, lo bo por puntr’é: “Bo sa di otro hende ku lo tin gana di haña e buki akí?” Tin biaha un publikadó òf pionero no por studia ku un persona ku el a haña den e teritorio. Pues laga rumannan sa ku bo ta disponibel pa kondusí estudio di Beibel.
5. Dikon lo ta bon pa puntra kasá no kreyente di un miembro di kongregashon si e ke studia?
5 Puntra Kasá No Kreyente: Tin publikadó den bo kongregashon ku nan kasá no ta Testigu? Algun kasá no kreyente no ke papia tokante Beibel ku nan kasá Testigu pero sí nan lo aseptá un estudio serka un publikadó ku no ta parti di e famia. Semper ta bon pa papia promé ku e kasá Testigu pa asina wak kua ta e mihó manera pa trata ku e situashon.
6. Dikon ta importante pa hasi orashon ora nos ke logra haña un estudio?
6 Pidi Yehova den Orashon: No balotá e poder di orashon. (Sant. 5:16) Yehova a primintí nos ku e ta skucha nos petishonnan si nan ta di akuerdo ku su boluntat. (1 Huan 5:14) Un ruman hòmber ku tabatin un bida hopi drùk a kuminsá hasi orashon pa haña un estudio di Beibel. Su kasá a puntra su mes si su esposo tabatin tempu pa yuda un studiante, spesialmente si e studiante tabatin hopi problema. Pues e esposa a papia ku Yehova tokante esaki ora e tabata resa pa su kasá haña un estudio. E kontesta pa nan orashon a bini mas o ménos dos siman despues ora un pionero den nan kongregashon a haña un mener ku kier a studia, i a pas’é pa e ruman hòmber. E esposa a skirbi: “Tur publikadó ku ta pensa ku nan lo no por kondusí un estudio di Beibel, mi ta rekomendá nan pa nan no stòp di pidi pa un estudio, i pa nan ta spesífiko den nan orashonnan. Nunka nos a pensa ku nos lo a haña asina tantu goso.” Si bo sigui perseverá, bo tambe lo por haña un estudio di Beibel i sinti e goso di yuda un hende subi e kaminda ku ta “hiba na bida.”—Mat. 7:13, 14.