Sigui Progresá den Bo Sirbishi
1. Menshoná algun ehèmpel di promé siglo ku ta mustra ku nos mester sigui mehorá den nos sirbishi.
1 Kristiannan mester hasi esfuerso pa mehorá den nan sirbishi. P’esei, Hesus a prepará i yuda su siguidónan pa bira mas kapas den nan asignashon di prediká. (Luk. 9:1-5; 10:1-11) Akila ku Priskila tambe a hasi esei ora nan a invitá Apolo na nan kas pa “splik’é e kaminda di Dios na un manera mas eksakto.” (Echo. 18:24-26) Pablo tambe a animá Timoteo, kende tabata un predikadó ku eksperensia, pa sigui dediká su mes na su siñansa “pa tur hende por mira bon kla” ku el a hasi progreso. (1 Tim. 4:13-15) Sí, nos mester sigui mehorá den nos manera di prediká e bon notisia sin importá kuantu tempu nos tin ta sirbi komo esklabo pa Señor.
2. Kon nos por siña for di otro publikadó?
2 Siña for di Otro Publikadó: Un manera ku nos por mehorá den sirbishi ta di siña for di otro publikadó. (Pro. 27:17) P’esei, ora bo ta den sirbishi presta bon atenshon na e manera ku bo kompañero ta hasi su presentashon. Pidi konseho serka esnan ku ta predikadónan efikas i skucha bon loke nan ta sugerí. (Pro. 1:5) Bo ta haña ku ta difísil pa hasi rebishita, kuminsá un estudio di Beibel òf partisipá den un otro rasgo di sirbishi? Tuma inisiativa pa aserká e superintendente di grupo òf un publikadó ku eksperensia i pidi nan yudansa. Kòrda tambe ku spiritu santu por yuda nos mehorá den nos sirbishi. Pues, regularmente pidi Yehova pa su spiritu santu.—Luk. 11:13.
3. Kon nos tin ku reakshoná si nos haña un konseho, aunke nos no a pidi p’e?
3 Si bo haña konseho tokante kon pa mehorá bo sirbishi, asta si bo no a pidi p’e, no sinti bo ofendí. (Ekl. 7:9) Meskos ku Apolo, humildemente aseptá e yudansa i keda kontentu. Hasiendo esei lo bo desplegá sabiduria.—Pro. 12:15.
4. Ki bon motibu Hesus a duna nos pa nos sigui mehorá den e trabou di prediká?
4 Nos Progreso Ta Glorifiká Dios: Hesus a usa un ilustrashon pa animá su siguidónan pa bira mihó predikadónan di e bon notisia. El a bisa ku e tabata manera un mata di wendrùif i ku su siguidónan ungí tabata e ramanan ku su Tata ta snui “pa nan por duna mas fruta.” (Huan 15:2) Meskos ku doño di un kunuku di wendrùif ta deseá pa su matanan produsí mas fruta, asina tambe Yehova ta deseá pa nos produsí “e fruta di nos lepnan” i sigui bira mas kapas den nos sirbishi. (Heb. 13:15) Kiko nos ta logra ora nos sigui mehorá den e trabou di prediká? Hesus mes ta duna nos e kontesta: “Mi Tata ta ser glorifiká den esaki: si boso sigui duna hopi fruta.”—Huan 15:8.