Bo Tabata Sa?

Un inskripshon ku ta konfirmá loke Beibel ta bisa

NA HERÚSALÈM, den Bible Lands Museum, tin un piedra ku inskripshon ku ta data mas o ménos di aña 700 pa 600 promé ku Kristu. Nan a haña e piedra ei den un kueba ku tabata usa komo graf, no muchu leu for di Hebròn na Israel. Riba dje tin skirbí: “Ku Yahweh Sabaot maldishoná Hagaf yu di Hagav.” Kon loke tin pará skirbí ei ta konfirmá loke Beibel ta bisa? Wèl, e ta mustra ku e nòmber di Dios, Yehova, skirbí na hebreo antiguo ku e lèternan YHWH, tabata bon konosí i hende tabata us’é tur dia den tempu bíbliko. De echo, den e kuebanan ei tambe a haña otro inskripshon ku ta mustra ku hende tabata usa e kuebanan ei pa reuní òf pa skonde. Hopi biaha nan tabata skirbi riba e murayanan e nòmber di Dios i nòmber di hende ku ta inkluí parti di Dios su nòmber.

Refiriendo na e inskripshonnan ei, Dr. Rachel Nabulsi di University of Georgia a bisa: “E echo ku a usa YHWH asina tantu ta hopi importante. . . . E teksto i e inskripshonnan ta mustra ku YHWH tabata importante den bida di hende na Israel i Huda.” I esei ta kuadra ku loke nos ta mira den Beibel kaminda Dios su nòmber YHWH, skirbí ku e lèternan hebreo, ta aparesé míles di biaha. Anto hopi biaha hende su nòmber tabata inkluí nòmber di Dios.

E palabranan “Yahweh Sabaot,” ku tin skirbí riba e piedra ku nan a haña, ta nifiká “Yehova di ehérsitonan.” Ta parse ku tabata masha normal ku hende tabata usa tantu e nòmber di Dios komo e ekspreshon “Yehova di ehérsitonan.” P’esei, ta di komprondé ku uso di e ekspreshon “Yehova di ehérsito” ta aparesé mas ku 283 biaha den e Skritura Hebreo, prinsipalmente den e bukinan di Isaías, Yeremías i Zakarías.