Pregunta Di Lektor

Kiko Hesus tabata ke men ora el a bisa: “No pensa ku mi a bini pa pone pas”?

Hesus a siña hende pa ta na pas ku otro. Pero, na un okashon el a bisa su apòstelnan: “No pensa ku mi a bini pa pone pas riba tera; mi no a bini pa pone pas, sino spada. Pasobra mi a bini pa kousa desunion: entre un yu hòmber i su tata, entre un yu muhé i su mama i entre un esposa hóben i su suegra.” (Mat. 10:34, 35) Kiko e tabata ke men?

Hesus no tabata ke pa tin desunion den famia, pero e tabata sa sí ku loke e tabata siña hende por a kousa esei den algun famia. P’esei, un hende ku ke bira disipel di Kristu i batisá mester ta konsiente ku su famia kisas lo no keda kontentu ku su desishon. Anto si ta su kasá òf un famia ku e ta será kuné ta opon’é, kisas lo ta difísil p’e keda fiel na Hesus su siñansanan.

Beibel ta bisa ku kristiannan mester “keda na pas ku tur hende.” (Rom. 12:18) Pero, Hesus su siñansanan por bira manera un “spada” den algun famia. Esei por pasa ora un miembro di famia aseptá Hesus su siñansanan miéntras ku e otronan ta rechasá òf oponé e siñansanan ei. Si esei pasa, e famianan ei ta hasi nan mes enemigu di esun ku ta siñando e bèrdat.—Mat. 10:36.

Un disipel di Kristu ku ta biba huntu ku su famia ku ta pertenesé na un otro religion tin biaha mester demostrá ken e stima mas: Yehova i Hesus òf su famia. Por ehèmpel, algun famia por pone preshon p’e selebrá dianan di fiesta. Ken lo e hasi felis? Hesus a bisa: “Esun ku tin mas kariño pa tata òf mama ku pa mi, no ta digno di mi.” (Mat. 10:37) Ta klaru ku Hesus no tabata ke men ku pa nos bira su disipel nos no por stima nos mayornan manera ántes mas. Pero, loke e tabata ke pa nos komprondé ta ku nos mester skohe kiko ta e kos di mas importante den nos bida. Si un famia di nos ta oponé nos i ta purba di stòp nos di sirbi Yehova, nos ta keda stima nan. Pero, nos amor pa Dios ta bini na promé lugá.

Sin duda, oposishon di famia ta hasi hopi doló. Pero, Hesus su disipelnan ta keda kòrda loke el a bisa: “Ken ku no aseptá su staka di tormento i sigui mi, no ta digno di mi.” (Mat. 10:38) Ku otro palabra, kristiannan ta mira oposishon di famia komo parti di e sufrimentu ku disipelnan di Kristu ta dispuesto pa soportá. Na mes momento, nos ta sigui karga e speransa ku nos bon kondukta lo yuda nos famia kambia di pensamentu i haña gana di siña tokante Beibel su mensahe.—1 Ped. 3:1, 2.