Aids na Africa—Cuantu Responsabilidad Cristiandad Ta Carga P’e?

Dje coresponsal di Spierta! na Africa

E palabra “cristiandad” mencioná den e artículo aki ta referí na nacionnan cu ta yama nan mes cristian, na contraste cu cristianismo di e Bijbel.

Cristiandad

“E partinan di mundu unda e mayoria dje pueblo ta pretendé di ser dje fe cristian.”—Webster’s New World Dictionary.

AIDS (SIDA)

“Un condicion di curpa cu a adkerí un deficiencia inmunológico causá dor di un retrovirus cu a infectá celnan dje sistema inmunológico.”—Webster’s Ninth New Collegiate Dictionary.

AIDS ta un epidemia mundial. Segun calculacion, tin 17 miyon hende cu a ser infectá caba cu HIV, e vírus cu ta causa AIDS. I e ta plama lihé.

Aunke a presta hopi atencion na cuestionnan médico, político, i emocional relacioná cu e epidemia aki, a bisa mashá poco tocante e cuestion religioso encerá den dje. Awor, e idea di cu religion ta relacioná cu e plamamentu di AIDS por parce muchu leu buscá pa algun lector. Pero, e no ta absurdo ora bo considerá e situacion cu a desaroyá n’e continente di Africa.

AIDS a dal Africa specialmente duru.a Algun hende ta bisa cu Africa ta e continente unda tin 67 porciento di tur caso di AIDS na mundu. Na Chad e cantidad di caso raportá durante e último cincu añanan a ­aumentá 100 bes. Pero, nan ta calculá cu solamente un tercera parti di tur caso a ser raportá. Segun un informe di Banco Mundial, AIDS a bira e causa mas comun di morto den hende adulto den hopi stad africano.

Religion A Hunga un Papel?

Siguramente, ningun hende por acusá cu cristianismo—e religion cu Jesucristo a siña—ta responsabel p’e desaster. Sin embargo, manera ta ser mustrá aki bou, e palabra “cristiandad” ta incluí e paisnan unda hende ta yama nan mes cristian. I cristiandad ta claramente enbolbí. No cu religion a crea of a plama directamente e vírus di AIDS. Pero AIDS a plama den Africa principalmente debí na relacion sexual inmoral entre homber i muher.b P’esei, AIDS por ser yamá un problema moral i, como tal, ta haci presentá algun cuestion religioso trabahoso. En todo caso, ­“cristianismo” africano ta un transplante directo di ­paisnan europeo. Guianan religioso, a tuma riba nan mes e tarea di combertí africanonan na nan religion, pretendiendo cu esei ta ofrecé un moda di biba superior cu moda africano tradicional. E influencia di cristiandad realmente a mehorá e moralidad di miembro africano nobo? E crísis di AIDS ta demostrá gráficamente cu net lo contrario a sosodé.

Por ehempel, considerá e nacion di Chad. Di cuater stad principal di dje, tres tin poblacion “cristian” grandi. E otro ta principalmente musulman. Sin embargo, ta den e tres stadnan “cristian” e vírus ta plamando desenfrenadamente awor! Den tur parti di Africa tin e mésun suceso. Africa Central i Sur, locual pa nomber ta cristian, tin un porciento hopi mas haltu di infeccion cu Nort Africa, unda e mayoria ta musulman.

Con Africa A Bira “Cristian”

Pakico AIDS ta plama asina lihé den hende cu ta yama nan mes siguidor di Cristo? En realidad, aunke hopi africano ta yama nan mes cristian, relativamente poco realmente ta cumpli cu leynan moral di cristianismo, locual ta pará skirbí den e Bijbel. Esaki ta parce di ser un resultado directo dje manera cu misioneronan di cristiandad a haci “combertimentu” di pueblo africano.

Durante siglo 18 i 19, creencia tradicional di cristiandad a hañ’é bou di atake. Crítica ­intelectual di religion a bira popular, locual segun hopi hende, a rebahá e Bijbel te na simplemente un pida di literatura di antigwedad. Tambe, mas hende a cuminsá aceptá e teoria di evolucion, incluyendo asta e clero. Esei a sembra simia di duda. Fe den e Scritura Santu a ser cuestioná. Den un clima asina no tabata un sorpresa cu esfuerso di cristiandad pa “combertí” africano a concentrá mas riba asuntu seglar. Misionero religioso a predicá un evangelio social, dunando hopi mas énfasis na obra humanitario en bes di yuda miembro nobo cumpli cu ley bíblico di moralidad. Kisas sin intencion, misioneronan realmente a yuda ­saboteá e structura moral cu a existí.

Por ehempel, poligamia tabata un custumber bieu den hopi civilisacion africano. Sin ­embargo, inmoralidad sexual tabata raro, siendo cu casi tur tribu tabatin ley severo tocante adulterio. Joseph Darnas, un maestro di scol pensioná, cu ta bon conocí den Chad, a bisa Spierta! cu promé cu misionero religioso a yega, “e pueblo a kere cu adulterio a resultá den mala suerte.” Como resultado, “esnan culpabel a ricibí castigu severo pasobra nan a pone e comunidad den peliger—i hopi bes tabata duná e castigu di morto.” Supersticion? Sí, pero kerementu asina a frena inmoralidad.

Anto misionero di cristiandad a yega. Nan a predicá contra poligamia pero a haci poco pa pone na vigor leynan bíblico di moralidad. Aunke e Bijbel ta bisa cu fornicador i adúltero cu no ta arepentí mester ser expulsá for dje congregacion cristian, rara bes religion di cristiandad ta disipliná ofensornan. (1 Corintionan 5:11-13) Te n’e dia djawe, hopi político africano prominente ta notorio pa nan bida inmoral, i tog nan ta permanecé como miembro di nan religion cu un bon nomber. Fieldad den matrimonio ta raro pa hende yamá cristian na Africa.

Anto tin mal ehempel di miembronan dje clero mes. Den e cultura africano cu ta orientá rond dje famia, ta normal pa hende casa i haña un cantidad di yu. Kisas esei ta pakico un cantidad sorprendente di pastor católico ta kere cu ta hustu pa despreciá nan voto di castidad i celibato. The New York Times di 3 di mei, 1980 a informá: “Den hopi parti di campo, . . . pastor i obispu ta poligamista.”

Naturalmente, tal matrimonio no ta legalisá, i e “esposanan” realmente ta simplemente concubina. Mal conducta asina no por ta pasá por haltu como insignificante. Segun ­Times, “un clero católico prominente” a admití cu “pastor africano ta un símbolo di autoridad, un persona cu poder en bes di un sirbidor di Jesucristo.” E mensahe biniendo di tal “persona cu poder” ta parce di ser, “Haci loke mi ta bisa pero no haci loke mi ta haci.”

Invasion di Diberticion di Occidente

No mester pasa por haltu tampoco dje diluvio di diberticion inmoral sexual cu a basha drenta Africa den añanan recien. Na Chad sala público di video sin supervision cu ta ofrecé tal diberticion a nace na tur parti—den cas di famia, den garashi, i, cu mas frecuencia, den curá di cas ora bira scur. Presentacionnan asina no ta caru, costando asina poco como 25 franc (9 cen antiano). Muchanan ta asistí. Di unda tal diberticion ta bini? Hopi di dje ta bini di Merca—un pais cu ta yama su mes principalmente cristian!

Pero e invasion aki di cultura occidental tabatin un berdadero efecto riba televidente? Un misionero di Testigo di Jehova, cu 14 aña di experencia na Africa Central, ta bisa: “Hopi bes hende local tin mashá poco contacto cu e mundu occidental fuera di loke nan ta mira riba videocaset. Nan kier bira mescos cu hende occidental cu nan ta mira den e películanan aki. Mi no a descubrí ningun evidencia documentá pa duna prueba di esaki, pero ta parce bisto na mayoria di hende aki cu tal diberticion en berdad ta stimulá inmoralidad ­sexual.”

Ta ki irónico cu miéntras cu oficial di departamento di salubridad ta purba di para e progreso di malesa fatal transmití sexualmente, nacionnan yamá cristian ta lansa propaganda cu ta promové conducta inmoral sumamente peligroso! Aunke religion ta haci poco pa frena e marcha ni den nan mes pais ni den estranheria, algun gobiernu africano, tal como Chad i Camerun, a purba di prohibí of por lo ménos limitá drentamentu di material pornográfico den nan pais. Pero, frecuentemente nan esfuerso a malográ.

E resultado final di tur esaki ta un decadencia moral na tur parti den pueblo africano “cristian.” E situacion económico malu tambe tin un efecto perhudicial. Pa motibu cu empleo ta scars, hopi bes hende homber ta keda obligá di bai leu sin nan famia pa hopi luna a la bes pa nan haña trabou. Homber asina ta cliente prospectivo pa prostituta local. Pero, prostituta asina tambe ta generalmente víctima di pobresa. Mayornan cu ta exigí bruidsprijs extravagante tambe ta un factor. Hopi homber no ta casa pasobra nan no por lanta e placa necesario pa paga e bruidsprijs. P’esei algun di nan ta hiba un bida di relacion sexual inmoral cu hopi muher. Den un clima moral i económico asina, AIDS a plama lihé.

E Solucion p’e Crísis

Ta keda bisto cu cristiandad no ta keda henteramente responsabel pa e crísis di AIDS na Africa. Pero, ta keda escandalosamente claro cu cristiandad ta hopi responsabel. Esaki tin un efecto serio riba hende cu kier uni cu esnan cu Jesus a yama “adoradornan berdadero.”—Juan 4:23.

Apesar dje responsabilidad, kico nan por haci pa para e epidemia di AIDS? Gobiernu africano a lansa campaña pa prevení AIDS, promoviendo e uso di condon. Pero Dr. Sam­uel Brew-Graves, representante dje Organisacion Mundial di Salú pa Nigeria, a admití francamente: “Hende tin cu adoptá un moda di biba saludabel . . . , miéntras cu e famia mester . . . evitá relacion sexual inmoral.”

Hopi tempu promé cu hende a tende di AIDS, Bijbel a condená relacion sexual inmoral i a promové decencia, dominio propio, i fieldad den matrimonio. (Proverbionan 5:­18-20; 1 Corintionan 6:18) Cientos di miles di Testigo di Jehova na Africa por duna prueba personal cu siguiendo principio bíblico ta duna hopi proteccion contra AIDS i otro malesa transmití sexualmente. Nan obedencia na ley bíblico ta un berdadero denuncia di cristiandad. E cristiannan berdadero aki ta pone nan speransa tambe den e binidero mundu nobo den cua “husticia lo tin cu biba.” (2 Pedro 3:13) Pa hende di fe, esaki ta e solucion completo p’e crísis di AIDS.

[Notanan]

[Komentario na página 20]

“Den hopi parti di campo, . . . pastor i obispu ta poligamista.”—The New York Times

[Plachi na página 20]

Mal ehempel dje clero di cristiandad a cria epidemia di relacion sexual inmoral na Africa

[Plachi na página 21]

Diberticion inmoral biniendo di nacion “cristian” ta contaminá hóbennan