Lo Bo Ta Presente?
Durante e aña cu a pasa, mas cu 8.700.000 hende den tur e mundu a asistí na e Congreso di Districto “Alabadornan Gososo” di Testigonan di Jehova. Lo bo ta presente na un dje Congresonan di Districto “Mensaheronan di Pas Divino”? Bo ta cordialmente invitá pa asistí.
Na casi tur sitio, e congreso lo cuminsá 9:30 diabierne mainta cu un programa di música. E sesion di apertura lo presentá e discurso animador “Kico Dios Ta Rekerí di Nos?” Esaki lo incluí informacion cu nos por usa pa yuda miyones di otro hende haci loke Dios ta pidi.
E presentacion di atardi “Yuda Otronan Siña e Rekisitonan di Dios” por yuda delegadonan dje congreso participá mas eficasmente den e trabou di haci disipel. Despues, e simposio di dos parti “Tene Cuidou cu e Trampanan Scondí di Entretenimentu” lo duna spiertamentu tocante las di demoño pa evitá. E programa di diabierne lo concluí cu e discurso importante “Sosteniendo Lealmente e Integridad dje Palabra di Dios.”
E programa di diasabra mainta lo enfatisá e importancia dje trabou di haci disipel cu e simposio di tres parti “Mensaheronan Treciendo Bon Nobo di Pas.” E discurso final dje sesion lo trata cu dedicacion i bautismo, i e bautismo di disipelnan nobo lo sigui.
E presentacion di diasabra atardi “Considerá Con Jehova Ta Pensa Riba Asuntunan” lo contestá preguntanan di hopi hende riba tópiconan coriente. Lo bo gosa e simposio animador di dos parti “E Dios di Pas Ta Percurá pa Bo.” Anto e auditorio por disfrutá di algu special durante e discurso conclusivo dje sesion “Sigui Tras di Pas Divino den Bida di Famia.”
E simposio di tres parti di diadomingo mainta, “Identificando e Clase Corecto di Mensaheronan,” lo enfatisá e tema dje congreso, usando ehempelnan di profetanan bíblico. E programa di mainta lo concluí cu un drama presentá den pleno trahe i esenario antiguo cu lo resaltá lesnan balioso for dje relato bíblico di hues Gideon.—Huesnan 6:11–8:28.
E sesion final dje congreso diadomingo atardi lo presentá e discurso público titulá “Por Fin Berdadero Pas!—Di Ki Fuente?” Finalmente, e discurso motivador “Moviendo Padilanti Como Mensaheronan di Pas Divino” lo concluí e congreso.
Siendo cu tin congresonan planeá pa Aruba, Curaçao i Hulanda lo ta cumbiniente pa bo asistí. Puntra Testigonan di Jehova local tocante e ora i sitio dje congreso mas cerca di bo.