For di Nos Lectornan

E Artista Mayor Danki p’e seri “En Busca dje Artista Mayor.” (¡Despertad! di 8 di november di 1995) Ya cu mi mes ta un artista, mi a apreciá e artículonan mashá hopi mes. E gran variedad dje creacion di Dios, i tur arte poético di Salmo, i otro textonan bíblico bon expresá ta mustra cu Jehova no solamente ta crea arte sino ta disfrutá di dje tambe!

B. R., Merca

Ya cu mi ta enbolbí den arte pa mas cu 30 aña, mi kier encomendá tur esnan cu tabatin un parti den e preparacion di un artículo maraviyoso asina! E tabata nuebe blachi di lógica i razonamentu excelente en cuanto nos gran Dios, Jehova, i su capacidad creativo dinámico.

P. M., Merca

Mormon Mi a lesa e artículo “E Iglesia Mormon—Un Restoracion di Tur Cos?” cu anticipacion. (¡Despertad! di 8 di november di 1995) Mi a ser criá den un famia mormon i a bautisá i tabata ordená den su sacerdocio como mormon promé cu mi a bira un Testigo di Jehova. Pero, un declaracion a hala mi atencion. Boso ta bisa cu e “version [mormon] dje picá dje promé pareha casá a enbolbé relacion sexual i criamentu di yu.” Segun mi ta corda, nan a siña nos cu Adam i Eva a peca dor di come e fruta literal.

D. A., Merca

Ta duel nos si e declaracion aki a causa algun confusion. Nos no tabata kier men cu mormon ta kere cu e picá mes tabata relacion sexual, aunke hende por yega na tal conclusion for di relato dje buki “Book of Mormon.” (2 Nephi 2:22, 23, 25) Mas bien, nos a declará cu e picá a “encera” relacion sexual. Di ki manera? Pasobra, segun teologia mormon, relacion sexual a habri e caminda pa procreacion humano. Segun e buki “Mormon Doctrine,” di Bruce R. McConkie, promé cu su picá, Adam “no por a bin na yu. . . . Segun e plan preordená, Adam tabatin cu peca . . . Siendo mortal awor e por bin na yu.” Na contraste, e Bijbel no ta siña cu Adam tabatin cu peca pa procreá. (Génesis 1:28) Ni e no ta bisa cu nan picá tabata debí na un plan preordená di Dios. Mas bien e ta bisa cu esei tabata debí na nan mes deseo pa independencia. (Eclesiástes 7:29) Pues, aunke nos ta respetá e derecho di mormon di kere loke nan kier, e asuntu aki ta ilustrá cu e siñansanan di “The Book of Mormon” simplemente no ta na armonia cu Bijbel.—Red.

Como un hende cu realmente nunca tabata sa kico pa bisa den combersacion cu mormon, mi por bisa cu mi ta berdaderamente informá tocante nan awor, danki n’e artículonan aki. Con mormon por bisa cu nan ta kere cu tantu e Bijbel como The Book of Mormon ta di Dios pero no ta mira cu un ta contradicí e otro?

J. M., Merca

Pornografia di Computer Mi kier gradicí boso p’e artículo “Pornografia di Computer Disponibel pa Muchanan,” den “Observando e Mundu.” (¡Despertad! di 8 di november di 1995) Mi a lesa esei, i mi curason casi a para! E realmente a mustra ki peligroso tal programa ta i ki disponibel nan ta pa muchanan. E artículo aki por yuda cristiannan evaluá aspectonan positivo i negativo asociá cu tal tecnologia di computer.

D. P., Merca

Malesa cu Cuminda Ta Causa Mi a gosa boso artículo “Protehá Bo Mes di Malesa cu Cuminda Ta Causa.” (¡Despertad! di 22 di november di 1995) Mi ofishi ta chef-kok, i mi kier a duna un comentario. Si un persona ta gusta come carni casi curú, esei no por ta posibel ora tin interes pa evitá malesa cu cuminda ta causa. Ta cierto cu cushinamentu di carni na temperatura haltu tin e tendencia di seca e carni i hacié mas difícil pa digerí. Un bon manera pa cushiná carni cabalmente i no hacié secu ta di stob’é of lagu’é smor.

J. P. K., Merca

Danki p’e bon conseho.—Red.