Hóbennan Sa Puntra . . .

Pakico Otro Hóbennan so Ta Gosa?

Jason, di 15 aña di edad, a keha: “Tur loke nos kier ta pasa pret, pero esei ta asina difícil.”

TA SOLAMENTE natural pa bo deseá di gosa—specialmente ora bo ta hóben! P’e mayoria di hóbennan, gosamentu ta mes importante cu come i drumi. Bou di instigacion di otro hóben i medionan di comunicacion público, hóbennan ta sigui cu anhelo tras di un gran variedad di actividad di recreo. Segun un investigacion, bishitá amigu, wak television, bai cine, bai fiesta, i bailamentu tabata promé riba e lista di pasatempu faborito djanochi pa hóbennan. Lesamentu, hunga wega i deporte, i scucha música tambe tabata popular.

Cu tantu actividad pa gosa, mayornan por tin dificultad pa comprendé pakico algun hóben, manera Jason, ta haña cu nan no ta gosa suficiente. Pero, esei ta exactamente loke algun hóben cristian ta keha! E hobencita Casey, un Testigo di Jehova, a splik’é asina: “Bo ta mira tur bo amiganan na scol bai fiesta i haci cosnan, i bo realmente ta sintí bo bandoná.” Ma, en berdad e situacion ta asina malu?

Bijbel ta prohibí gosamentu? Al contrario. E Bijbel ta yama Jehova “e Dios felis.” (1 Timoteo 1:11) P’esei, no mester sorprendé bo cu rey Sálomon a bisa: “Tin un tempu señalá pa tur cos, . . .  un tempu pa yora i un tempu pa hari; un tempu pa lamentá i un tempu pa dal salto.” (Eclesiástes 3:1, 4) E palabra hebreo original aki pa “hari” i palabranan relacioná por nificá tambe “celebrá,” “hunga,” “pasa pret,” ‘ofrecé diberticion,’ i “gosa.”—2 Samuel 6:21; Job 41:5; Huesnan 16:25; Exodo 32:6; Génesis 26:8.

Aya den tempu bíblico, e pueblo di Dios a disfrutá di un variedad di actividad saludabel, tal como toca instrumento musical, canta, baila, combersá, i hunga wega. Tambe nan tabatin ocasionnan special pa fiesta i asociacion gososo. (Jeremías 7:34; 16:9; 25:30; Lucas 15:25) Sí, Jesucristo mes a bai na un celebracion di matrimonio!—Juan 2:1-10.

P’esei, gosamentu saludabel no ta prohibí den hóbennan cristian djawe. Realmente, e Bijbel ta bisa: “Alegrá, hóben, den bo hubentud, i laga bo curason haci bon pa bo den bo tempu como un homber hóben.” Sin embargo, Sálomon a pone e palabranan aki di cautela acerca: “Pero sabi cu pa motibu di tur esakinan e Dios berdadero lo hibá bo na huicio.” (Eclesiástes 11:9) Sí, bo ta responsabel dilanti Dios pa e decisionnan cu bo ta tuma. P’esei bo mester “vigilá cuidadosamente p’e manera cu boso ta cana no ta manera hende imprudente sino manera hende sabí,” ora esei ta toca recreo. (Efesionan 5:15, 16) Pa ki motibu? Hopi hóben ta tuma decisionnan mashá malu den tal asuntu.

Ora Gosamentu Ta Bai for di Control

Tuma na cuenta loke a sosodé aya den tempu bíblico. Algun israelita a perde control di balansa den e asuntu di recreo, poniendo fiestanan desenfrená cu a dura henter anochi! Profeta Isaías a bisa: “Ai di esnan cu ta lanta mardugá pa nan por busca licor sterki so, cu ta tarda lat te den scuridad djanochi p’e biña mes inflamá nan! I mester resultá di tin arpa i instrumento di cuerde, tamborin i fluit, i biña na nan fiesta.” No cu tabata malu pa nan reuní huntu i disfrutá di cuminda, música, i bailamentu. Pero Isaías a bisa tocante e paranderonan aki: “Nan no a tuma na cuenta e actividad di Jehova.”—Isaías 5:11, 12.

Hopi hóben djawe ta haci mescos—nan no ta tuma Dios na cuenta ora nan ta busca recreo. Den sinbergwenseria nan ta violá normanan bíblico, participando den relacion sexual promé cu casamentu, vandalismo, abusu di droga, i otro conducta desenfrená pa “pasa pret.” Pero, den otro casonan, hóbennan realmente no ta purba di haci malu. Pero, nan no ta haci cosnan na moda moderá i no ta evitá di bai muchu leu. (Proverbionan 23:20; 1 Timoteo 3:11) Pues, ora nan ta reuní pa pasa un ratu huntu, cosnan tin e tendencia di bai fo’i control.—Compará cu 1 Corintionan 10:6-8.

Recientemente, Spierta! a puntra algun hóben, “Kico ta pasa na fiestanan mundano djawe?” Un hobencita a contestá: “Droga, i bebementu. E realmente ta sosodé.” E hóben yamá Andres a bisa tocante algun mucha homber di su scol cu ta bai fiesta: “Tur loke nan ta haci ta broma tocante cuantu nan a bebe.” Jason asta a bai asina leu cu el a bisa: “Na un fiesta mundano casi semper cosnan malu ta sosodé.” Siendo cu e Bijbel ta condená “paranda,” of “fiestanan desenfrená,” hóbennan temeroso di Dios ta evitá reunionnan social caminda tin prácticanan asina.—Galationan 5:21; Byington.

Por tin peliger scondí den algun forma di recreo cu ta parce inocente. Por ehempel, hopi dje películanan di mas popular djawe, ta mustra desnudes, relacion sexual cu luho di detaye, i violencia repugnante. Hopi bes cantica popular ta contené letra pornográfico. Ta comun pa na conciertonan di rock tin abusu di droga, hacimentu di bochincha i violencia.a

Ora Mayornan Ta Bisa No

Cua ta e conseho final? Si bo ta un cristian, bo simplemente no por haci tur loke otro hóbennan ta gusta haci. En todo caso, Jesus a bisa cu siguidor di dje “no ta parti dje mundu,” i esei kier men ser diferente cu otro hende. (Juan 15:19) Si bo mayornan ta temeroso di Dios, nan ta intensamente conciente di tal echo. Pues, avéces den nan deseo pa protehá bo, bo mayornan por desconsehá bo contra cierto cosnan of prohibí nan firmemente—cosnan cu otro hóbennan ta permití di haci. No ta fácil pa aceptá esei tur ora. Un hobencita a insistí cu “Hende kier gosa! Nos mayornan a gosa ora nan tabata hóben, pero tin bes cu ta parce cu nan kier tene nos cerá.”

Por ta cu no ta fácil pa sigui e conseho di bo mayornan den tal asuntunan, ni sikiera ora bo básicamente tin e mésun punto di bista. Un hóben cu aparencia atlético cu nos lo yama Jared, ta corda: “Mi tabata kier a hunga basketball den e ekipo di scol. Hopi hende tabata presioná mi pa hunga, i esei a molestiá mi un tiki. Pero, e ora ei mi a papia cu mi mayornan.” E mayornan di Jared a mencioná e peliger di “mal asociacion” i a hacié corda cuantu tempu su actividadnan deportivo por ocupá. (1 Corintionan 15:33) “Esei a pone fin n’e cuenta,” Jared a bisa cu tristesa. El a sigui e conseho di su mayornan, pero tog el a sintié malu pasobra e no a logra hunga bala.

‘Mi Ta Perde Algu!’

Sea loke sea bo situacion, abo tambe por keda desanimá de bes en cuando ora bo tende compañeronan di scol gaba dje dushi ratu cu nan a pasa. Tal bes bo ta puntra, ‘Pakico otro hóben so ta gosa?’ Sí, con bo por vence e sintimentu di cu bo ta perde algu?

Kisas ta un yudansa pa bo lesa Salmo 73 i meditá riba e experencia di Asaf, un skirbidor bíblico. Den versículo 2 i 3, el a admití lo siguiente: “En cuanto ami, mi pia casi a desviá, mi pasonan casi a wordu hací slip. Pasobra mi a bira envidioso di e bromadornan.” Sí, miéntras cu Asaf a hiba un bida frená, otronan a broma cu nan por haci tur loke nan kier—aparentemente sin ningun mal resultado. Ta parce cu nan tabatin hopi cos i semper tabata haña mas. (Versículo 12) Pues, Asaf a bira asina desanimá cu el a sclama: “Ta por nada, anto, cu mi a mantené mi mes puru i no a cometé picá?”—Salmo 73:13, Today’s English Version.

Afortunadamente, Asaf a bolbe na su sano huicio promé cu el a haci algu imprudente. El a haci un bishita na “e gran santuario di Dios,” i den tal ambiente saludabel, el a pensa seriamente riba e asuntu. Pronto, Asaf a saca un conclusion notabel tocante buscador di placer malbado: “Siguramente riba suela cu ta slip ta caminda bo ta pone nan. Bo a haci nan cai den ruina.”—Salmo 73:17, 18.

Mescos por ta bisá di hopi otro hóben cu ta busca placer. Nan por kere cu nan ta gosa awor. Pero, gosamentu di picá ta solamente temporal! (Hebreonan 11:25) Pa motibu cu nan no ta sigui normanan bíblico, nan ta para riba “suela cu ta slip” i ta den peliger constante di experenciá un caimentu teribel—di ripiente i sin aviso. E Palabra di Dios ta declará: “Kico cu hende sembra, esaki lo e cosechá tambe.” (Galationan 6:7) Siguramente bo a tende di hóbennan di bo mes edad cu a muri prematuramente, a contagiá cu malesa sexual, a haña nan cu embaraso no-deseá, of a bai prizon como resultado di “goso” di paranda? No ta probechoso pa bo, anto, pa evitá tal cosnan?—Isaías 48:17.

Sálomon ta duna bon conseho ora el a bisa: “No laga bo curason ser envidioso di pecador, sino keda den temor di Jehova henter dia. Pasobra den e caso ei ta existí un futuro, i bo mes speransa lo no ser cortá.” (Proverbionan 23:17, 18) Sí, no tin “goso” cu tin e balor di bo speransa di biba pa semper den Paradijs riba tera.

Entretantu, con bo por satisfacé bo deseo natural di berdaderamente gosa de bes en cuando? Tin maneranan sigur i saludabel pa bo gosa? Con ta para si placa i otro recursonan ta limitá? Spierta! a pidi hóbennan rond di mundu duna algun sugerencia i idea. Lo tin un consideracion di eseinan den un artículo di futuro den e seri aki.

[Nota]

[Plachi na página 26]

Bo mester kere cu bo ta perde algu ora bo no por participá den loke mundu ta yama goso?