E Kudu Aki A Corda
DJE CORESPONSAL DI SPIERTA! NA SUR AFRICA
E KUDU machu nechi, un antiloop cu cachunan impresionante den forma di spiral i oreanan distintivo, ta casi 1,50 meter haltu, di suela te na scouder, ora e ta adulto. E hembra, aunke normalmente e no tin cachu, tambe ta ser distinguí dor di su oreanan largu. Kudu ta un animal skiu, semper alerto i cla pa core bai pa busca proteccion. P’esei, loke a pasa cu Karen na Zimbabwe ta remarcabel.
Manera e revista African Wildlife a informá, un bisé hembra chikitu di kudu, cu a ser hañá pegá den un curá di waya, a ser rescatá i duná na Karen, kende a cri’é na botter pa algun siman. El a crece bon i a keda den becindario dje hacienda lechera caminda Karen i su famia tabata biba, hungando hopi bes cu e muchanan i e cachónan. Sin embargo, tempu-tempu e tabata bai mondi i tabata bolbe bek, te cu un dia, ora cu e tabata casi adulto, nan no a mir’é mas banda dje hacienda.
Rond di dos aña despues, miéntras Karen tabata coriendo auto riba e caminda dje hacienda, un kudu hembra na estado a sorprend’é ya cu e no a core bai ora su auto a yega cerca. Ni tampoco e kudu no a hui bai ora el a cuminsá cana bai den su direccion. Ya p’e ora aki Karen tabata sa cu esaki mester ta e mésun animal cu el a cria na botter, di manera cu el a papia suavemente segun cu al a acerk’é poco-poco. E kudu a reconoc’é tambe, pasobra el a baha su cabes i tabata hole Karen miéntras cu el a lagu’é bras’é.
Un par di luna despues, atrobe e kudu hembra tabata cerca dje caminda—e biaha aki cu un bisé chikititu. Karen a sinti cu e mama tabata introduciendo e bisé orguyosamente, i atrobe el a laga Karen carici’é. Algu similar a pasa algun siman despues ora a parce cu e kudu tabata manera warda riba Karen.
Un par di luna mas a pasa, i algun dje trahadornan riba e hacienda a raportá cu nan a mira e mésun kudu hembra aki cu un las rond di su nek. Nan a purba acercá e kudu pa kita e las, pero e kudu a core bai. Di manera cu Karen a bai busk’é den mondi, yamando e segun cu e tabata busca. Pronto, el a sali para dilanti di Karen. Karen a corda pa trece poco pan cuné, cu e kudu tabata gusta hopi, i miéntras e tabata ofrec’é e delicatesse aki, e esposo di Karen a kita e las molestoso.
E vínculo bisto cu a dura pa asina tantu tempu entre hende i bestia a duna e famia aki hopi deleite.