“Ora Mi Ta Débil, e Ora Ei Mi Ta Fuerte”

MI A crece den un pueblito pa nort di San Francisco, California, yamá Petaluma. Mi mama tabata un poco religioso, pero mi tata no a gusta religion niun tiki. Ami semper a kere den un creador—solamente mi no tabata sa ken e tabata.

Mi tabatin un infancia felis. Cu hopi cariño mi ta corda con mi tabata disfrutá dje dianan sin preocupacion ei! Mi no tabatin ningun idea cu cosnan tabata pasando den mi curpa cu lo kita hopi di mi libertad. Tabata na 1960, mi último aña di scol secundario, cu mi ta corda cu mi tabata papiando cu mi mihó amiga tocante e dolor cu mi tabata haña den un par di dede.

Pronto mi pianan a cuminsá hací mi asina hopi dolor cu mi mama a hibá mi un hospital na San Francisco, caminda mi a keda pa rond di seis dia. E tempu ei mi tabatin 18 aña, i e resultado dje testnan a revelá cu mi tabatin artrítis reumático. Mi a cuminsá tuma inyeccion di sodium aurothiosulfate, despues prednisone i despues un otro forma di cortisone. Na tur, mi a tuma e medicamentonan ei pa 18 aña, i cada un a mengua e dolor pa un par di aña pero despues poco-poco no a sirbi mas, anto e ora ei mi a pasa pa e próximo medicamento. Mi no por a ignorá e dolor constante, i mi a cuminsá desesperá den mi búskeda pa un otro sorto di yudansa médico. Mi a haña algun tratamentu alternativo cu a yuda un tiki. Afortunadamente, awor aki mi no tin mes tantu dolor manera tempu cu e malesa tabata den su etapanan mas agresivo di progreso den mi curpa.

Un dia na 1975, mi yu homber a topa un buki di registro cu mi mama a tene di mi como baby. Mi a haña sa cu ora mi tabatin seis luna di edad, un dokter a cuminsá duná mi tratamentunan di rayo-X pa un klir hinchá. Mi ta kere cu e tratamentunan di radiacion prescribí p’ami den infancia por ta e motibu pa cua mi ta den e condicion aki awe. Si ta asina, ki un eror teribel esei tabata!

Mi a casa na 1962. Na 1968, durante e etapanan mas trempan dje malesa, ami cu mi esposo, Lynn, a traha huntu den un panaderia cu nos tabatin. Nos tabata lanta rond di 4:00 a.m., i mi casá tabata traha e mansa i despues tin biaha tabata cabishá sintá riba e sacunan di hariña miéntras cu e pannan tabata den fornu. Nos tabata slais nan i hinca nan den sacu i despues Lynn tabata entregá nan. De bes en cuando un bendedor di seguro tabata pasa cerca nos den e panaderia i tabata conta nos tocante Dios su Reino primintí. Nos a gusta loke nos a tende, pero nos tabata muchu druk. Nos ruta di pan tabata expandiendo, i nos a bira cargá cu asta mas trabou seglar. Pa nos deleite, un otro panaderia a cumpra nos negoshi di pan! Lynn a bai traha pa nan, i ami a bai traha den un salon di beyesa. Sin embargo, segun cu e artrítis a bira pió, mi por a traha solamente tres dia pa siman i finalmente mester a stop mes.

Durante e periodo ei, un Testigo di Jehova tabata pasa regularmente na cas i a ofrecé mi e revistanan Toren di Vigilancia i Spierta! Semper mi tabata dun’é un contribucion i tabata tuma e revistanan, pensando cu mi tabata hacié un fabor. Despues cu e bai, mi tabata laga nan riba un reki sin habri pa un par di dia, i despues un di nos semper tabata tira nan afó. Ki un pérdida esei tabata, ya cu awor nos ta apreciá nan balor spiritual. Pero n’e tempu ei, asuntunan religioso simplemente no a parce di ta masha importante.

Conciente di Nos Necesidad Spiritual

Un anochi ami cu mi casá tabata papiando di cu den bida mester tin algu mas cu come i drumi i traha asina duru. Nos a cuminsá busca pa e spiritualidad cu a falta den nos bida. Nos a dirigí nos atencion na un iglesia chikitu den nos caya, pero nos no a haña e animacion spiritual cu nos a spera di haña. E miembronan dje iglesia tabata papia mas tantu tocante nan problemanan local.

E Testigo cu tabata trece e revistanan tabata biniendo pa rond di un aña, pero mi rutina di aceptá e revistanan i despues benta nan afó no a cambia te ora cu finalmente mi a lesa e edicion di Spierta! di 8 di october, 1968, titulá “Ta Mas Lat cu Bo Ta Kere?” Mi a gusta loke mi a lesa, i felismente, el a afectá mi esposo den e mésun manera. Nos a cuminsá studia i a absorbá e berdad manera spons. Nos no a cansa di tende tur e cosnan maraviyoso cu nos tabata siñando. Na 1969 nos a bautisá.

Segun tempu a pasa, a bira difícil pa mi lanta para i cai sinta i tabata hopi mas duru pa cana. Mi tabatin cu forsa mi rudianan dobla pa mi drenta i sali for di auto. Mi a siña biba cu limitacionnan i cu dolor cu a hací mi yora casi henter ora. Pero despues mi tabata drecha mi makiahe, i sali nos ta sali bai reunion of den sirbishi di veld. Mi tabata cana di cas pa cas mas tantu cu mi tabata por. Mi tabata purba bai den sirbishi un of dos bes pa siman, te ora cu no tabata posibel mas pa motibu di rudia i pianan steif i e dolor den nan. Hopi bes mi tabatin miedu di cai sin por lanta bek. Ta un yudansa pa papia cu Jehova. Tin biaha mi ta yora na dje cu hopi lágrima.

Sin embargo, no tabata semper posibel pa acudí na lágrima. Un hende cu artrítis reumático por haña tambe wowonan secu. Tabatin tempu cu e sekedad tabata asina severo cu tabata difícil pa lesa. Ora esei sosodé, mi tabata scucha tape di Bijbel. Hopi bes mi a cana rond cu mi wowonan cerá pasobra moviendo mi klepnan di wowo tabata rasca mi wowo. Tabata mescos cu ta ciegu mi tabata. Tin biaha cu mi mester a tira lágrima artificial den mi wowonan cada cincu minuut. Pió ainda, mi mester a pone ungwento den mi wowo i tene nan mará cu verband pa cincu of seis dia te ora nan tabata mas mihó. No ta nada fácil pa ta gradicidu pa loke bo tin, ora bo mester lucha cu un malesa crónico di cua bo no por verwagt cu lo e kita den e sistema aki.

Na 1978, mi mester a recurí na un rolstoel. Tabata difícil pa tuma e decision ei. Mi a pospon’é mas tantu cu mi tabata por, pero ya mi no tabatin opcion mas. Mi tabata sa cu e dia ei lo yega, pero mi speransa tabata cu Dios su mundu nobo lo a bini promé. Lynn a cumpra un burostoel haltu, cu tin un base hanchu cu cincu wil. Cuné, mi por a pusha mi mes rond den cas.

Tabata frustrante pa mi saca man pa coge algu, ya cu mi no por a rek mi brasa leu i no por a gara bon cu mi dedenan tur doblá i trocí. P’esei, anto, mi ta usa un palu “garador.” Cuné mi por piki cos djabou, habri un cashi di cushina i coge un tayó, of saca algu for di frishider. Segun cu mi desaroyá abilidadnan nobo cu mi palu “garador,” mi por haci algun trabou di cas. Mi por cushiná, laba tayó, strika i dobla paña, i mop. Mi ta sintí mi un tiki orguyoso segun cu mi abilidadnan ta mehorá, i mi ta contentu cu ainda mi por contribuí cu algun dje trabounan di cas. Sin embargo, loke un tempu mi por a haci den algun minuut, awor ta tumá mi oranan.

Testificando via Telefon

A tuma tempu, pero finalmente mi a tuma e curashi pa purba testificá via telefon. Mi no a kere cu mi por haci esei, pero awor berdaderamente mi ta disfrutá di dje i tabatin algun bon éxito. Loke ta un sorpresa grandi pa mi ta cu e ta casi mescos cu bai di cas pa cas, den e sentido cu mi por papia cu hende tocante Jehova i su propósitonan.

Un dje presentacionnan cu mi ta usa ta cuminsá asina aki: “Halo, ta cu Sr.—? Ami ta Sra. Maass. Mi ta papiando brevemente cu hende, i si bo tin algun minuut, mi por a papia cu bo? (Un contesta típico ta: “Over di kico asina?”) Ta spantoso pa mira loke ta pasando den mundu awe, no ta berdad? (Mi ta permití comentario.) Lo mi kier compartí e pensamentu bíblico aki cu ta duna nos un berdadero speransa pa futuro.” E ora ei mi ta lesa e Oracion di Nos Tata i posiblemente 2 Pedro 3:13. Mi a yega di pasa rebishitanan over na otro rumannan muher cristian of na Lynn pa nan rebishitá pa mi.

Atrabes di añanan, mi tabatin hopi bon combersacionnan i por a manda foyeto, revista i bukinan na esnan cu a mustra interes. Algun a cuminsá studia Bijbel via telefon. Un señora cu mi a papia cuné a bisa cu el a haña cu tabata suficiente pa e studia riba su mes. Pero despues di vários combersacion, el a bai di acuerdo pa bin nos cas pa un studio di Bijbel, ya cu mi a cont’é di mi circunstancianan.

Un otro biaha ora mi tabata haciendo yamadanan, un ‘antwoordapparaat’ a duna un otro number. Aunke semper mi ta haci yamadanan local so i e number aki no tabata den e área local, mi a sintí mi impulsá pa yama e number tog. Despues di a papia un ratu cu mi, e señora cu a contestá e telefon a bisa cu e i su esposo kier a haña contacto cu hende cu ta berdaderamente cristian. Di manera cu ami cu Lynn a bai nan cas, casi un ora leu, pa studia cu nan.

Ainda mi ta haña goso i felicidad den papia cu otronan tocante Jehova i su promesa di shelu nobo i un tera nobo, caminda husticia lo tin cu biba. Recientemente, un señora cu ken mi tabata papia pa vários luna a bisá mi: “Ki ora cu mi papia cu bo, mi ta realisá cu mi ta adkiriendo mas conocimentu.” Mi sa cu e conocimentu cu mi ta compartiendo cu otronan ta hiba na bida eterno i ta producí un goso cu asta un aparencia mancaron manera esun di mi por reflehá. Tin biaha mi por haci mas den sirbishi cu otro biahanan, pero mi ta deseá cu mi por a haci hopi, hopi mas henter ora! Mi sa cu Jehova conocé e circunstancia di cada persona i cu e ta apreciá loke nos por haci, sin importá con tiki e por parce. Hopi bes mi a pensa riba Proverbionan 27:11: “Sea sabí, mi yu, i alegrá mi curason, pa mi por contestá esun cu ta desafiá mi cu desprecio,” i mi kier ta entre esnan cu ta proba cu Satanas ta un mentiroso.

Semper ta un gran animacion pa ta presente na e reunionnan, maske ta difícil pa mi yega ei. Jehova a haci asina tantu percuracion maraviyoso pa nos por ta bon alimentá spiritualmente cu mi kier probechá plenamente di nan. Ki contentu nos ta cu nos dos yunan a haci e berdad di nan mes! Nos yu muher, Terri, ta casá cu un excelente ruman homber, i nan tin cuater yu cu mi ta stima masha tantu. Cuantu e ta conmové nos curason di mira cu nos nietunan tambe stima Jehova! Nos yu homber, James, i su esposa, Tuesday, a scoge pa sirbi Jehova na Betel di Brooklyn, e sede mundial di Testigonan di Jehova, na New York.

Un Paradijs Terenal Mediante Jehova Su Poder

Mi ta trata di tene na mente Jehova su maraviyoso promesa di un tera paradísico. Asta awor, tin un abundancia di su creacion cu nos por haña goso aden. Mi ta disfrutá di un bunita bahada di solo. Mi ta deleitá den e variedad di flor i nan fragancia. Mi stima rosa! Mi no por sali for di cas hopi bes, pero ora mi por, mi ta disfrutá intensamente dje calor dje rayonan di solo. Mi ta cera mi wowonan i ta visualisá un bunita panorama den e cerunan, cu mi famia pasando bon den un sabana habrí yen di flor silvestre. Ata un awa ta core ei haciendo un murmuyo suave i un abundancia di patia zoet i hugoso pa tur hende! Ora mi por, mi ta pinta plachi dje cosnan cu ta yudá mi pensa dje binidero Paradijs terenal primintí. Miéntras cu mi ta pinta, mi ta imaginá mi mes einan. Mi sa cu Jehova por realisá e imágennan mental precioso cu mi ta atesorá asina tantu.

Mi ta gusta tene e texto di Santiago 1:12 na mente. E ta bisa: “Felis ta e hende cu ta sigui wanta prueba, pasobra ora e ta bira aprobá lo e ricibí e corona di bida, cu Jehova a primintí na esnan cu ta sigui stim’é.” Pablo a compará e malu cu e tabata padecé di dje cu un ‘angel di Satanas cu a sigui boft’é.’ El a pidi Jehova pa kita su hendikep, pero a bis’é cu e poder di Dios a ser hací perfecto den su debilidad. Pues Pablo su éxito apesar di su debilidad tabata evidencia di Dios su poder riba dje. Pablo a bisa: “Ora mi ta débil, e ora ei mi ta fuerte.” (2 Corintionan 12:7-10) Ami ta sinti cu e poco cu mi por haci awor apesar di mi limitacionnan ta solamente mediante Dios su poder riba mi.

Juan a registrá un relato cu berdaderamente ta animá mi. E ta tocante un homber cu pa 38 aña no por a lanta for di su cot. E, huntu cu otro enfermonan, tabata drumi yen di speransa cantu di un tanki di awa, deseando mashá pa refrescá su mes den dje. E no por a yega na e awa, cu el a pensa lo por a cur’é. Un dia Jesus a mir’é i a puntr’é: “Bo kier bira bon di salú?” Con mi lágrimanan di goso lo contestá e pregunta ei! “Jesus a bis’é: ‘Lanta, coge bo cot i cana.’” (Juan 5:2-9) Tin hopi di nos cu ta sperando ansiosamente pa tende un yamada asina!—Manera Luretta Maass a relat’é.

[Plachi na página 28]

Mi a pensa riba un mucha cu stima hende, i at’é ei, felis di dje ta crusa un sabana

[Plachi na página 29]

Den un beis alegre mi a visualisá un mucha homber aventuroso riba stelt, cu su cachó den su pia

[Plachinan na página 30]

Poniendo numbernan di telefon huntu pa sirbishi di veld

Marcando un number