“Un Rayo di Lus den un Era Scur”

Dje coresponsal di Spierta! na Alemania

ASINA un historiadó a describí e historia di Testigonan di Jehova den e era nazi. E ocasion tabata e estreno mundial dje video documental Jehovah’s Witnesses Stand Firm Against Nazi Assault (Testigonan di Jehova Ta Para Firme Contra Persecucion dje Régimen Nazi), tené na e Monumento Conmemorativo di Ravensbrück, Alemania. E video aki ta duna un relato conmovedor di curashi i fe cu 24 sobrebibiente dje era nazi ta conta, huntu cu 10 experto riba tereno di historia i religion.

Un tempu tabatin cientos di Testigo di Jehova den e campo di concentracion di Ravensbrück. Algun Testigo cu a sobrebibí, encarcelá mas cu 50 aña pasá dor di nazi, tabata presente pa e estreno. Nan, huntu cu historiadónan i funcionarionan gubernamental, a recordá e dianan scur ora e régimen nazi a pasa dor di henter Europa cu un reinado di teror. E auditorio di rond di 350 persona a scucha e relatonan inspirador dje integridad cristian di cientos di Testigonan cu yen di curashi a preferá di enfrentá nan morto cu nenga nan fe.

E Medionan di Noticia Ta Tuma Nota

A tene un conferencia di prensa na un hotel na Berlin riba e mainta dje estreno, dia 6 di november, 1996. Periodistanan a mira clipnan dje video i despues a scucha e discursonan dje expertonan cu a comentá riba e importancia dje documental nobo cu ta conta di un aspecto di historia poco conocí pero importante. Dr. Detlef Garbe, director dje Monumento Conmemorativo di Neuengamme, a splica: “Mester soru pa nos—Testigonan di Jehova i no-Testigonan—no lubidá e historia dje prezunan cu e triángulo púrpura [e símbolo di prezunan Testigo]. Esaki tabata un rayo di lus den un era scur.”

Vários sobrebibiente Testigo cu a aparecé den Stand Firm tabata presente pa papia tocante nan experencianan. Nan tabata amargá dor di nan sufrimentunan? Nan caranan sereno i radiante a indicá cu no.

Despues di un sesion di pregunta i contesta, e reporteronan a ser invitá na e estreno caminda lo pasa e documental Stand Firm n’e Monumento Conmemorativo di Ravensbrück, un 60 kilometer leu djei. Prácticamente tur a aceptá e invitacion.

E Estreno

E shelu shinishi i e awa ceru cu tabata finfin riba e dia friu aki di otoño a ser reemplasá dor di un ambiente animá den e sala recien renobá banda dje Monumento Conmemorativo di Ravensbrück. Profesor Jürgen Dittberner, e tempu ei director dje Fundacion pa e monumentonan Conmemorativo di Ravensbrück, Sachsenhausen i Brandenburg, a bisa: “Mester respetá e curashi moral cu Testigonan di Jehova a demostrá bou dje socialismo nacional. . . . Nos ta onra e memoria dje hendenan aki cu no a traicioná nan fe i cu como resultado mester a sufri of asta muri.”

Angelika Peter, minister di educacion, hubentud i deporte pa Brandenburg, Alemania, a manda un mensahe cu a ser lesá. El a declará: “Ta importante pa nos recordá awe e firmesa ehemplar di Testigonan di Jehova.” Dr. Sigrid Jacobeit, director dje Monumento Conmemorativo di Ravensbrück, a bisa: “Mi ta anhelá e estreno aki cu anticipacion i goso. Esaki ta un dia special, mi ta kere, pa nos tur.”

Despues a baha e lusnan pa e comienso dje video. Pa 78 minuut no solamente e sobrebibientenan presente for di ocho pais, sino tambe tur esnan den auditorio a rebibá e tragedia i triunfo dje capítulo doloroso aki dje historia di Alemania. Hopi hende a haña cu tabata difícil pa contené nan lágrimanan segun cu e hendenan comun i coriente aki tabata conta di echonan extraordinario di amor i fe bou dje condicionnan di mas horibel.

Despues cu e tremendo aplauso a mengua, historiadó Joachim Görlitz a lesa e palabranan final di un Testigo cu a ser ehecutá na Brandenburg. Görlitz a haña e nota solamente dos siman promé ora e tabata haciendo investigacion n’e Monumento Conmemorativo i Archivo di Brandenburg, di cua e ta director. Su hemud a yena ora e tabata lesando e palabranan dje fiel homber cristian aki cu tabata animando su compañeronan creyente pa keda fiel na nan Señor. Despues Görlitz a concluí: “Damas i Cabayeros, mi ta kere cu e película tocante Testigonan di Jehova lo ta un aporte importante na nos trabou educacional.”

Historiadó Wulff Brebeck a declará cu “pa medio di e película aki un tesoro nobo importante a ser agregá—e bos di sobrebibientenan cu a ser scuchá demasiado poco, i . . . e bos di esnan cu no a sobrebibí.” Dr. Garbe a agregá: “Esakinan ta experencianan importante di hendenan kende nan fe den Dios i e confiansa den promesanan di Bijbel a duna nan e fortalesa pa resistí durante e tempu horibel ei.”

Como un conclusion apropiado n’e programa, un bes mas vários sobrebibiente Testigo a dirigí palabra n’e auditorio. Tabata obvio cu ainda tur e cristiannan fiel aki tin e mésun fe fuerte cu a sostené nan durante nan hopi pruebanan.

Desde e estreno, mas cu 340 artículo tocante Testigonan di Jehova i e documental Stand Firm a aparecé den corantnan rond Alemania. Vários programa radial, un di nan na un estacion di radio nacional, tambe a duna informenan excelente.

Finalmente e documental Stand Firm lo ser hací disponibel den por lo ménos 24 idioma. Cu tempu lo producí tambe un version redactá pa pasa den klas. Desde e produccion dje video, mas i mas educadó a cuminsá usa e documental Stand Firm como parti di nan curículo pa yuda hóbennan considerá asuntunan importante, manera prehuicio, presion di otronan i e bos di concenshi.

Den e mundu aki asina tantu dividí dor di odio i traicion, ta ki oportuno pa haci e historia aki di integridad conocí n’e público! En berdad, e sufrimentunan dje cristiannan fiel aki no tabata en bano.—Hebreonan 6:10.

[Plachi na página 31]

E conferencia di prensa na Berlin. Di robes pa drechi: Dr. Detlef Garbe, sobrebibientenan dje Holocausto Simone Liebster i Franz Wohlfahrt, i historiadó Wulff Brebeck