Tutela—Religion i Ley

DEN casonan di divorcio i di tutela, religion por ta un factor importante—anto unu complicá tambe. Por ehempel, preguntanan manera e siguientenan lo por lanta.

Un hues mester considerá e testimonio di esnan cu ta pretendé cu un mayor no ta apto pa haña tutela pa motibu cu e mayor ei ta miembro di un cierto religion, foral si ta trata di un religion chikitu? Un hues mester considerá e testimonio tocante creencia i prácticanan religioso dje mayornan pa asina e por determiná cua religion, na su opinion, lo ta mihó pa e yu? E mag di duna ordu e ora ei pa e yu lanta den e religion ei i prohibí pa e mucha ser exponé na otro religionnan?

Awe, mas i mas hende ta casa cu personanan di un otro religion i antecedente étnico cu esun di nan. Pues, ora e parehanan aki divorciá, ya caba e yunan lo por tin coneccion cu dos comunidad religioso. Tin biaha, un mayor cu ta den e trámitenan di divorcio a caba di adoptá un cierto religion cu ta diferente for di loke e mayor ei tabatin promé. E asociacion religioso nobo por ta un factor stabilisador den bida dje mayor ei i hopi importante p’e, pero algu straño pa e yunan. Pues, un otro pregunta ta lanta: Corte por prohibí e mayor di hiba e yunan na servicionan religioso dje religion aki djis pasobra e ta diferente for dje religion cu e mayornan a practicá promé?

Esakinan ta preguntanan difícil. Nan ta rekerí pa un hues considerá, no solamente e necesidadnan dje yu, sino tambe e interes i derechonan dje mayornan.

Derechonan Fundamental di Mayornan i Yunan

Ta cierto cu huesnan por ser influenciá dor di nan opinion personal tocante religion. Pero den hopi pais no ta probabel cu nan lo ignorá e derechonan religioso dje mayornan of dje yunan. E paisnan aki lo por tin constitucionnan cu ta prohibí e hues di restringí e derechonan fundamental dje mayornan pa dirigí e criansa dje yu, incluyendo e instruccion educacional i religioso dje yu.

Na su turno, e mucha tin e derecho di ricibí entrenamentu asina for di su mayornan. Promé cu un hues por interferí legalmente den e entrenamentu religioso di un yu, e corte mester tende evidencia convincente cu “cierto prácticanan religioso ta forma un menasa inmediato i substancial p’e bienestar físico dje yu.” (Letternan cursivo di nos.) Diferencianan so den religion, of asta pleitu entre e mayornan tocante religion, no ta suficiente rason pa Estado intervení.

Na Nebraska, Merca, e posicion razonabel cu un mama Testigo di Jehova a tuma den un disputa pa tutela, ta ilustrá con e percuracion legal aki ta protehá tantu e mayornan como e yunan. E tata cu no ta Testigo no tabata kier pa su yu muher asistí n’e servicionan religioso di Testigonan di Jehova na Salon di Reino. Un corte di promé instancia a duna e tata rason.

E ora ei e mama a apelá n’e Corte Supremo di Nebraska. E mama su argumento tabata cu no tabatin ningun evidencia cu cualkier actividad di Testigonan di Jehova tabata un menasa, sea inmediato of substancial, p’e bienestar dje yu. E mama a testificá “cu si e yu asistí i participá n’e actividadnan religioso di tur dos mayor . . . e yu lo tin un base pa por dicidí cua religion lo e preferá ora e yega edad suficiente pa comprendé.”

E corte superior a revocá e decision dje corte di promé instancia i a bisa cu “e corte [di promé instancia] a malusá su discrecion dor di pone limitacion riba e mama su derechonan di tutela pa controlá e criamentu religioso di su yu di menor edad.” No tabatin absolutamente ningun evidencia cu e mucha tabata ser perhudicá dor di asistí na servicionan religioso na Salon di Reino di Testigonan di Jehova.

Derechonan di Mayornan Cu No A Haña e Tutela

Tin biaha, mayornan divorciá ta purba usa disputanan tocante entrenamentu religioso como un medio pa haña control riba e yunan. Por ehempel, den Khalsa vs. Khalsa, un caso den e estado di New México, Merca, tur dos mayor tabata practicá e religion sikh durante nan matrimonio. Pero djis despues cu nan a divorciá, e mama a bira católico i a cuminsá desanimá e yunan pa sigui practicá e religion sikh.

E tata a rabia i a hiba e caso dilanti corte den un intento p’e haña mas autoridad pa entrená e yunan segun su religion sikh. Con corte di promé instancia a respondé na e peticion dje tata? El a rechasá su peticion. E corte a ordená cu “ora e yunan tabata cerca [e tata], nan no por a participá den ningun actividad sikh, sea nan tabata kier of no, incluyendo actividad di misa, campamentu of krèsh organisá pa e religion sikh.”

E tata a apelá e decision aki n’e Corte di Apelacion di New México. E corte superior aki a duna e tata rason i a revocá e decision dje corte di promé instancia. E corte di apelacion a bisa: “Cortenan mester pega na un proceder di ta imparcial en cuanto religion, i mester intervení den e área delicado i constitucionalmente protehá aki solamente ora tin evidencia claro i afirmativo cu e yunan ta ser perhudicá. Restriccionnan den e área aki ta presentá e peliger cu limitacionnan imponé dor di corte lo bai contra e constitucion dor cu e ta mishi cu e mayor su libertad di adoracion of lo por ser percibí como tal.”

Un decision asina ta sigui un liña largu di principionan cu ta bon establecí den hopi pais. Un mayor razonabel mester tuma e principionan aki na cuenta. Ademas, e mayor cristian lo pensa bon riba e necesidad dje yu pa por tin un relacion cu ámbos mayor, i tambe e deber dje yu pa mustra onor na tantu mama como tata.—Efesionan 6:1-3.

Mediacion Pafó di Corte

Maske un mediacion pafó di corte por ta ménos formal cu un audiencia dilanti un hues, un mayor no mester trat’é como algu casual. Cualkier acuerdo mutuo of stipulacion cu yega na dje den e proceso di tutela aki por bira obligatorio dor di órdennan di corte cu ser emití despues. P’esei, lo ta consehabel pa un mayor consultá un abogado cu experencia den derechonan di famia, pa haci sigur cu tur asuntu cu tin di haci cu tutela ta ser tratá debidamente i imparcialmente.

Cada mayor mester tuma tempu pa prepará pa e proceso di mediacion. E maneranan i conducta di un mayor durante e proceso di mediacion por influenciá e resultado masha tantu. Demasiado bes mayornan cu ta divorciando ta asina emocionalmente enbolbí den e acto di divorcio cu nan ta perde for di bista e asuntunan importante: Kico ta mihó pa e yu? Kico e yu tin mester pa asina e por desaroyá mental, emocional i físicamente?

Corda cu for di un punto di bista legal, e asuntu primario den mediacion no ta esun religioso, ni otro diferencianan personal, sino con e mayornan por yega huntu na un acuerdo p’e bienestar dje yunan. Kisas un mayor lo enfrentá prehuicio religioso of di otro índole, preguntanan inesperá of manipulacionnan intencioná pa trece agitacion i confusion. Tal bes e faltanan di cada mayor lo ser exponé of asta exagerá. Sin embargo, ora esnan enbolbí keda razonabel, por yega na un decision.

Tin biaha e proceso di mediacion por parce largu i frustrante. E alternativa ta procesonan extenso den corte cu su publicidad bergonsoso, carga financiero i efecto dañino riba e yu. Esei sigur ta ménos deseabel. Un mayor cristian lo kier considerá e proceso di mediacion, mescos cu tur problema serio den bida, huntu cu oracion, cordando e invitacion inspirá pa “lora bo caminda riba Jehova, i dependé riba dje, i e mes lo actua.”—Salmo 37:5.

Pero kico si no por yega na un solucion i e hues otorgá e tutela na e otro mayor? Of kico si un dje mayornan cu ta divorciando ta scomulgá dje congregacion cristian? Tambe, kico mester haci ora tur dos mayor tin poder paternal of ouderlijke macht? I ora un so ta e voogd? E siguiente artículo lo considerá e preguntanan aki i e principionan bíblico relacioná cu nan.

[Kuadro na página 6]

Tres Cualidad Importante

Spierta! a entrevistá un hues dje corte familiar, i el a bisa cu e cualidadnan importante cu e ta busca den un mayor ta, entre otro, e siguiente tresnan:

Razonabilidad—buena gana pa otorgá e otro mayor mas acceso posibel na e yu (basta no tin ningun menasa físico ni moral pa e yu)

Sensitividad—ta conciente dje necesidadnan emocional dje yu

Dominio Propio—un bida na cas balansá cu lo contribuí na un ambiente calmu den cua e yu lo por desaroyá bon

[Kuadro na página 6]

Un Guia Hudicial

Algun hues a purba prevení disputanan innecesario tocante e balornan religioso di un mayor dor di fiha cierto liñanan di guia. Por ehempel:

1. Mester tin un relacion significante entre e yu i ámbos mayor. John Sopinka, hues dje Corte Supremo di Husticia di Cánada, a bisa cu cada mayor mester ser permití “pa participá den e actividadnan cu ta contribuí na identificá e mayor pa loke e berdaderamente ta [incluyendo practicá su religion]. No ta ser sperá dje mayor cu ta co-tutor, p’e pretendé di ta algu cu e no ta of asumí un estilo di bida fingí durante e periodonan cu e mag pasa tempu cu e yunan.”

2. Prohibí e mayor co-tutor di siña e yu su creencianan religioso ta violá e mayor su libertad di religion. Cu excepcion di ora tin evidencia claro i afirmativo cu esei ta forma un peliger inminente i substancial p’e yu.

[Plachi na página 7]

Huesnan ta carga un responsabilidad pisá den casonan di tutela

[Plachi na página 8]

Un mediadó por yuda mayornan solucioná diferencianan sin procesonan largu den corte