Observando E Mundu

Un Hábito Caru di Drogadiccion

Un informe dje gobiernu di Merca ta calculá cu na 1995 mericanonan a gasta 57,3 mil miyon dollar na droganan ilegal. Cocaina a forma dos tercer parti dje benta, miéntras cu heroina, marihuana i otro droga ilegal a componé e resto. Segun e informe di Associated Press, e director dje Departamento di Maneho Nacional di Control di Droga di Cas Blancu, Barry McCaffrey, a remarcá cu e cantidad di cen gastá na e droganan aki por a paga un educacion universitario di cuater aña pa un miyon hende of 83 mil miyon liter di lechi pa alimentá baby malnutrí. Ademas, den e cifra aki nan no a conta e gastunan social, manera mas crímen, kiebro den bida personal i di famia i plamamentu di malesa manera hepatítis i AIDS.

Un Ley Lubidá

Cuantu dje Dies Mandamentu den Bijbel bo por bisa for di cabes? Un estudio na Rio de Janeiro a saca na cla cu mas cu 1 di cada 4 brazileño no por a mencioná ni un di nan! Veja ta informá cu di esnan cu tabata sa por lo ménos un dje mandamentunan, 42 porciento a mencioná “no mata” of “no horta.” Otronan a corda “no cudishá e casá di bo próhimo” (38 porciento), “onra [bo] tata i mama” (22 porciento), i “no lanta testimonio falsu” (14 porciento). Solamente 13 porciento di esnan cu a respondé a corda e di tres mandamentu: “No mencioná e nomber di Dios sin mester.”

Test di IQ Trempan pa Muchanan

Científiconan cu ta studia inteligencia humano ta kere awor cu e celebro di un baby ta pasa dor di su fase mas importante di desaroyo entre nacementu i tres aña di edad. Nan ta kere tambe cu durante e fase aki, e celebro dje baby ta establecé coneccionnan permanente como reaccion riba stimulacion mental. P’esei, segun Modern Maturity, algun mayor a cuminsá laga nan yunan pasa testnan di IQ hopi promé cu nan bai kleuterschool, pa yuda nan haña un bentaha riba otro mucha. Sin embargo, Dr. Barry Zuckerman, presidente dje departamento di pediatria n’e Universidad di Medicina na Boston, a expresá preocupacion tocante mayornan cu ta sinti nan “presioná pa ‘stimulá’ nan baby cada minuut” den un intento pa producí un “super baby.” Richard Weinberg, profesor di sicologia infantil ta agregá: “Hopi bes, si bo forsa e muchanan competí muchu trempan, bo ta haña resultadonan net contrario. Laga bo yunan disfrutá di nan infancia.”

Copistanan Cuidadoso

E texto cu ta componé e Scritura Griego di Bijbel a ser copiá meticulosamente i pasá over cu hopi cuidou, segun Dr. Barbara Aland, hefe dje Instituto pa Investigacion di Testament Nobo, na Münster, Alemania. “Tin masha tiki eror of cambio hací pa motibunan teológico,” Westfälische Nachrichten ta informá. Desde 1959 e instituto a examiná mas cu 5.000 manuscrito skirbí na man, cu ta data di Edad Medio i di antigwedad clásico. Nan a graba mas of ménos 90 porciento dje manuscritonan riba microfilm. Pakico e copistanan di Bijbel a tene asina tantu cuidou pa no haci eror? Pasobra nan “a considerá nan mes ‘copista’ i no autor,” e korant ta bisa.

Di Berdad E Ta Sin Cafeina?

Hopi bes esnan cu ta sensitivo na cafeina ta bai over na bebidanan sin cafeina como un alternativa. Pero cuantu chens bo tin di haña kofi cu di berdad no ta contené cafeina ora bo pidi p’e? Segun un reportahe den The New York Times, esei ta rond di 1 den 3 biaha. E Administracion di Alimento i Remedi di Merca ta definí kofi sin cafeina como kofi cu tin dos te cincu miligram di cafeina. Pero muestranan for di 18 lugá cu ta sirbi kofi den New York City a revelá cu e cantidad di cafeina den un kop’i kofi di cincu ons a varia masha hopi: di 2,3 miligram te 114 miligram di cafeina! Segun e Asociacion Nacional di Kofi, un kopi standard di kofi regular ta contené entre 60 pa 180 miligram di cafeina.