Un Aliansa Mortal

NA 1959, trahadónan den e ramo di salubridad na Merca a predicí cu pronto tuberculósis (TB) lo ser eradicá. I berdad, den e añanan cu a sigui e malesa a baha asina drásticamente cu hopi hende a kere cu e tabata bou di control. Pero TB ta bek, i el a haña un aliado mortal: HIV, e vírus cu ta debilitá e sistema di inmunidad i cu hopi bes ta causa AIDS.

Maske tin mas cu dos mil miyon hende—rond di un tercer parti dje poblacion di mundu—cu ta carga e bacteria di TB, ora nan ser infectá nobo-nobo cuné nan tin solamente 10 porciento chens durante henter nan bida pa haña TB. Ta interesante cu hende cu HIV tin un rísico anual di 8 porciento di haña TB activo. P’esei, mas hende contraé HIV, mas ta den peliger inminente di haña TB.

Dr. Richard J. O’Brien di OMS (Organisacion Mundial di Salú) ta comentá cu durante e último añanan na Merca, tabatin un aumento di mas of ménos 15 porciento den casonan di TB. E ta bisa cu esaki ta “ser atribuí en gran parti n’e interaccion entre HIV i TB.” Sin embargo, e menasa ta mas serio den e paisnan den desaroyo. No ménos cu 90 porciento dje ocho miyon casonan nobo di TB tur aña ta ser hañá den e paisnan mas pober, i rond di tres miyon dje pashentnan aki ta muri.

Mundialmente, un 4,4 miyon hende ta lucha cu e duo mortal aki. OMS ta predicí cu den futuro cercano, TB lo kita un miyon bida entre esnan cu tin HIV. “E dos epidemianan aki huntu a bira e menasa mas serio di salubridad público dje década aki,” segun Peter Piot, director ehecutivo dje Programa Combiná di Nacionnan Uní Riba HIV/AIDS.

[Plachi Rekonosementu na página 25]

New Jersey Medical School—National Tuberculosis Center