Intolerancia Religioso Awe

“Tur hende tin derecho riba libertad di pensamentu, di concenshi i di religion; e derecho aki ta incluí e libertad pa cambia su religion of creencia, i e libertad pa, sea su so of huntu cu otronan i sea den público of den privá, e manifestá su religion of creencia den siñansa, práctica, adoracion i ceremonia religioso.” Articulo 18, Declaracion Universal Di Derechonan Humano, 1948.

ABO ta disfrutá di libertad di religion den bo pais? Mayoria pais na mundu supuestamente ta di acuerdo cu e principio noble aki. I hopi bes nan a hink’é den declaracionnan internacional. Sin embargo, segun cálculo, tin un bon cantidad di pais unda intolerancia i discriminacion ta realidadnan desagradabel. Miyones i miyones di hende awe no tin libertad di religion. Di otro banda, hopi hende ta biba den sociedadnan multiracial, multiétnico of multireligioso caminda ley ta garantisá libertad i ta parce manera e cultura dje nacion ta considerá tolerancia como algu sagrado.

Pero tog, asta den e lugánan aki, e libertad religioso di algun hende ta na peliger. “Discriminacion basá riba religion of creencia ta existí den casi tur sistema económico, social i ideológico i na tur parti di mundu,” segun Angelo d’Almeida Ribeiro, ex-Informadó Special nombrá dor dje Comision Riba Derechonan Humano di Nacionnan Uní. Den e buki Freedom of Religion and Belief—A World Report (Libertad di Religion i Creencia—Un Informe Mundial) publicá na 1997, e editornan Kevin Boyle i Juliet Sheen ta bisa: “Na fin di siglo 20, persecucion di gruponan religioso minoritario, [i] prohibicion di creencianan i discriminacion tur caminda . . . ta sucesonan diario.”

Sin embargo, discriminacion religioso no ta afectá gruponan religioso minoritario so. Profesor Abdelfattah Amor, Informadó Special riba Intolerancia Religioso, dje Comision Riba Derechonan Humano di Nacionnan Uní, ta considerá cu “ningun religion no ta scapa di violacion.” Ta masha probabel anto, cu algun religion caminda bo ta biba ta enfrentá intolerancia i prehuicio.

Diferente Forma di Discriminacion

Discriminacion religioso por tuma hopi forma. Algun pais ta djis excluí tur religion, cu excepcion di un cu nan ta haci e religion di Estado. Den otro paisnan, nan ta pasa ley cu ta restringí e actividad di cierto religionnan. Algun pais a pone ley na vigor cu hende a interpretá manera nan a haña ta bon. Tuma por ehempel, con hopi hende lo por abusá di un proposicion di ley na Israel cu ta castigá importacion, imprenta, distribucion of posesion di foyetonan of material “den cua tin un incentivo pa combertimentu religioso.” P’esei, no ta un sorpresa cu e korant International Herald Tribune ta informá: “Na Israel, nan a molestiá i a atacá Testigonan di Jehova.” Nan a kibra drenta un Salon di Reino di Testigonan di Jehova na Lod tres biaha i fanáticonan ortodox a vandalis’é dos bes. Polis a nenga di interferí.

E buki Freedom of Religion and Belief ta cita otro ehempelnan di intolerancia: “Herehia i herehe no ta un imágen di pasado so. . . . Rechaso, persecucion i discriminacion contra esnan cu a tuma un caminda diferente ta keda un dje causanan principal di intolerancia. E amadisnan na Pakistan i e [bahainan] na Egipto, Iran i Malasia ta algun ehempel di esaki; tambe Testigonan di Jehova na vários pais di Oost Europa, na Grecia i Singapur.” Ta bisto cu libertad di religion ta na peliger den hopi parti di mundu.

En bista di esaki, Federico Mayor, director general dje Organisacion di Nacionnan Uní pa Educacion, Ciencia i Cultura, a declará cu e mundu di futuro cercano cu nos ta mira ta surgi “no ta masha cos di gaba. . . . E bientunan di libertad a bolbe waya e candela di odio.” E director dje Centro di Derechonan Humano dje Universidad di Essex, Reino Uní, a confirmá e temornan aki, ora el a remarcá: “Tur evidencia ta mustra den direccion dje conclusion cu den e mundu moderno, intolerancia religioso . . . ta aumentá en bes mengua.” E aumento di intolerancia ta un menasa pa libertad di religion, kisas pa bo libertad di religion. Pero pakico libertad di religion ta asina importante?

Kico Ta den Wega?

Sociólogo Bryan Wilson a skirbi den su buki Human Values in a Changing World (Normanan Humano den un Mundu cu Ta Cambiando): “Libertad religioso ta un rekisito fundamental promé cu bo por describí un sociedad como liber. . . . Sin libertad di religion i e derecho di plama bo creencianan, no por existí e derecho di concenshi ni ningun berdadero democracia.” I, manera un corte na Francia a reconocé recientemente, “libertad di creencia ta un dje elementonan fundamental di libertadnan público.” Pues, sea cu bo ta religioso of no, bo mester ta interesá pa libertad di religion keda protehá.

Tambe, e actitud di un pais pa cu libertad di religion ta un factor fuerte cu ta determiná ki reputacion i credibilidad internacional e pais tin. Un raport presentá na 1997 na un reunion dje Organisacion pa Siguridad i Cooperacion na Europa, cu ta consistí di 54 nacion, a declará: “Libertad di religion ta un dje normanan mas haltu den e constelacion di derechonan humano, pasobra e ta toca e esencia mes di dignidad humano. Ningun sistema cu ta violá e derechonan aki, of cu ta permití un violacion sistemático, tin derecho di afirmá cu e ta parti di un comunidad di estadonan hustu i democrático cu ta respetá derechonan humano fundamental.”

Libertad di religion ta manera parti dje fundeshi di un edificio. Otro libertadnan—civil, político, cultural i económico—ta basá riba dje. Si debilitá e fundeshi, henter e edificio ta sufri. Profesor Francesco Margiotta-Broglio ta duna un bon descripcion den poco palabra: “Ki ora cu violá libertad [di religion], otro libertadnan ta e siguientenan pa sufri.” Si kier protehá otro libertadnan, mester protehá libertad religioso promé.

Pa por dicerní cua ta e mihó manera pa protehá algu, ta esencial pa comprend’é promé. Con libertad di religion a cuminsá? Con a logra establec’é, i a costo di kico?

[Plachi na página 4]

Intolerancia religioso tin un historia largu