Programanan di Nacionnan Uní pa Hóbennan
Con Exitoso Nan Ta?
CASI 15 aña pasá, Nacionnan Uní a proclamá aña 1985 como e Aña Internacional di Hubentud. I un cuater aña pasá, Nacionnan Uní a adoptá e Programa Mundial di Accion pa Hóbennan te na Aña 2000 i Despues. Loke nan tabata kier ta pa e programanan aki yuda mengua e problemanan i aumentá e oportunidadnan pa e mas cu mil miyon hóbennan na mundu. Di berdad e programanan aki a haci un diferencia?
No tin duda cu den algun área sí. Choices, un revista publicá dor dje Programa pa Desaroyo di Nacionnan Uní, ta duna algun ehempel: Na Tailandia, mas cu mitar dje muchanan preescolar tabata malnutrí na 1982. Pero ménos cu dies aña despues, prácticamente a eliminá malnutricion moderá i severo. Den e pais di Oman, tabatin tres scol so na 1970, i ta 900 mucha homber so tabata asistí. Pero na 1994, casi 500.000 mucha den e pais ei a bai scol, i 49 porciento di nan tabata mucha muher. Sin duda, eseinan ta casonan caminda cos a bai bon.
Sin embargo, United Nations Action for Youth (Accion di Nacionnan Uní pa Hóbennan), un publicacion di Nacionnan Uní, ta remarcá cu foral den paisnan den desaroyo, casi no ta haci progreso mes, debí na e problemanan persistente relacioná cu educacion, empleo i pobresa. Esakinan ta djis algun dje áreanan cu e Programa Mundial kier mehorá.
Por ehempel, hopi pais den desaroyo lo no logra e meta pa, promé cu aña 2000, tur mucha bai scol básico. Hopi bes mayornan den e paisnan aki no por manda nan yu scol, dor cu no tin scol of nan no por paga scol. Segun United Nations Action for Youth, un consecuencia ta cu “e cantidad di hende analfabeta lo sigui crece.” Na su turno, analfabetismo ta contribuí na desempleo, i desempleo ta hiba na vários problema social, manera “falta di respet propio, circunstancianan marginal,” e pérdida di talentonan hóben i pobresa extremo. I aunke pobresa ta atacá tantu hóben como bieu, hóbennan ta mas vulnerabel na dje. E mésun fuente di Nacionnan Uní ta concluí cu, apesar di tur esfuerso, “hamber i malnutricion ta keda e menasanan mas serio i difícil pa trata di humanidad.”
Aunke programanan cu bon intencion i profesionalnan diligente ta logrando un poco mehoracion, nan no por kita e causanan dje problemanan di sociedad. Mas ta necesario pa logra esei. Manera e buki Mensenrechten en de noodzaak van wereldbestuur ta declará, lo solucioná e problemanan di mundu solamente ‘si bini un gobiernu mundial cu ta den posicion di tuma medidanan cu e por pone na vigor.’ No ta un sorpresa anto cu cristiannan, tantu hóben como bieu, ta anhelá p’e binimentu dje Reino di Dios, e gobiernu mundial cu Jesus a bisa su siguidónan pidi p’e den oracion. (Daniel 2:44; Mateo 6:9, 10) E gobiernu ei sí lo haci un diferencia!
[Komentario di plachi na página 31]
Educacion ta un derecho i necesidad fundamental di tur mucha
[Komentario di plachi na página 31]
FAO photo/F. Mattioli
[Komentario di plachi na página 31]
WHO photo by J. Mohr
[Komentario di plachi na página 31]
Logo: UN photo