E Biahe Extraordinario di Vasco da Gama

Awa di laman tabata spat bai laira cada bes cu e proa dje barcu di palu tabata dal den e olanan. Despues di lunanan riba laman i di hopi dificultad, Vasco da Gama i su tripulacion ta na punto di bira e promé europeonan cu ta yega India dor di nabegá pasa rond dje punta zuid di Africa. Un biahe asina mester tabata pisá asta cu e conocimentu i ekipo di nabegacion djawe. Pero pa e hombernan abordo dje tres barcunan chikitu di da Gama 500 aña pasá, e mester a parce casi manera un biahe pa luna. Kico a impulsá e exploradó portugues intrépido aki huntu cu su hombernan pa bai riba un aventura asina? Ki efecto esaki tabatin riba mundu?

PROME cu da Gama a nace, e prins portugues Henrique, yamá tin biaha e Nabegante, a pone e fundeshi p’e biahe ei. Bou dje patrocinio di Henrique, marina i comercio portugues riba laman ganchu a progresá mashá. Pa Henrique i e exploradónan despues di dje, descubrimentu, comercio i religion, tabata estrechamente ligá cu otro. E metanan di Henrique tabata pa haci Portugal ricu i promové catolicismo. E tabata gobernadó dje Orden di Cristo, e órden religioso-militar mas haltu na Portugal. Ta papa tabata sponser e órden ei, i el a paga gran parti dje gastunan dje proyectonan di Henrique for dje fondo cu a bira disponibel via dje órden aki. P’esei, tur su barcunan tabatin un crus corá riba nan bela.

Pa ora cu Henrique a muri, na aña 1460, e portuguesnan a explorá e costa west di Africa te leu na zuid n’e lugá cu awe ta conocí como Sierra Leone. Na aña 1488, Bartholomeu Dias a nabegá pasa rond dje punta di Africa. E ora ei rey João II a sintié confiá i a ordená pa prepará un expedicion pa India. E sucesor di João, rey Manuel I, a sigui cu e preparacionnan. N’e tempu ei, por a haña specerei di India na Europa solamente mediante rutanan via tera. Ta comerciantenan italiano i arabir tabata encargá cu esaki. E comerciantenan arabir moslim a dominá comercio riba e Océano Indio. Manuel tabata sa cu e lider dje expedicion mester tabata, segun e palabranan di un historiadó, “un homber cu tabatin tantu e curashi di un soldá, e astucia di un comerciante i e tacto di un diplomático.” Kisas cu eseinan na mente, Manuel a scoge Vasco da Gama.

E Biahe Extraordinario

Dia 8 di juli 1497, bou di bandera dje Orden di Cristo, da Gama cu su tripulacion di 170 homber a marcha dos-dos bai na nan barcunan recien construí. N’e playa un pastor a otorgá e i su tripulacion absolucion. Si cualkier un di nan muri durante e biahe, nan lo tabata absolvé di cualkier picá cu nan a cometé na caminda. Evidentemente da Gama a verwagt problema, pasobra el a bai ekipá cu cañon plus hopi kruisboog i lansa di diferente tamaño.

Da Gama a dicidí di evitá e bientu i corientenan di laman desfaborabel cu Dias a topa dies aña promé. Na Sierra Leone, el a hiba su barcunan zuidwest te ora cu e tabata mas cerca di Brazil cu di Africa. E ora ei e bientunan fuerte di Sur Atlántico a hib’é Africa bek i cerca di Kaap Goede Hoop. No tin registro cu un hende a yega di tuma e ruta aki promé cuné, pero despues di dje, tur barcu di bela cu tabata bai direccion dje Kaap a us’é.

Pasando e punto caminda Dias a bira bek, da Gama a hiba su flota a lo largu dje costa oost di Africa. Na Mozambique i na Mombasa, e sultannan local a traha complot pa mata da Gama cu su tripulacion. P’esei da Gama a sigui bai te na Malindi (awor zuidoost Kenya). Ei finalmente el a haña un loods experenciá pa gui’é crusa e Océano Indio.

West Ta Topa Oost

Dia 20 di mei 1498, despues di a nabegá pa 23 dia for di Malindi, un Vasco da Gama excitá huntu cu su tripulacion a baha anker cerca di Calicut, India. Da Gama a haña e zamorin (e rey) hindú ta biba den gran rikesa i luho. E marinero a splica cu su mision ta unu amistoso i cu e i su hombernan tabata en busca di cristian. Na principio e no a mencioná e comercio di specerei. Pero e comerciantenan cu a controlá e comercio den e área a mira e peliger pa nan posicion unbes i a consehá e rey pa caba cu e intrusonan. Nan a spiert’é cu si e haci negoshi cu e portuguesnan, lo e perde tur cos. E conseho aki a laga e rey indeciso. Pero finalmente el a duna da Gama loke e tabata kier—un carta pa e rey di Portugal den cua e zamorin ta bai di acuerdo pa haci negoshi cu e rey.

Un Mundu Cambiá

Da Gama a regresá Lisboa dia 8 di september 1499, caminda nan a ricibié manera un héroe. Mesora, rey Manuel a haci areglo pa laga haci mas expedicion. E siguiente tabata encabesá pa Pedro Álvares Cabral, kende a laga mas cu 70 homber na Calicut pa protehá interesnan portugues. Pero e comerciantenan no tabata bai tolerá un interferencia asina cu nan comercio. Un anochi un multitud grandi i desordená a mata mas cu mitar dje hombernan. Ora da Gama a regresá India na cabes dje di tres expedicion, el a tuma represaya, a bombardiá Calicut for di su flota di 14 barcu bon armá. Tambe el a capturá un barcu cu a caba di regresá for di Mecca i a kim’é, matando cientos di homber, muher i mucha. Maske nan a rogu’é pa tene misericordia, da Gama a para wak e masacre sin sinti duele.

E ora ei e portuguesnan a bira e potencia dominante den e Océano Indio. Cu tempu, nan a manda expedicionnan pa Malaca, China, Hapon i Moluca (Islanan di Specerei). Nan tabata di opinion cu e hendenan cu nan a topa tabata “fuera dje ley di Jesucristo” i p’esei tabata “condená na candela eterno,” segun João de Barros, un historiadó di siglo 16. P’esei e exploradónan a sinti nan liber pa usa violencia ki ora cu nan a haña ta necesario. Tal accionnan no-cristian a resultá den un rencor profundo contra cristianismo den Asia.

Da Gama su logronan a habri e ruta di laman entre Europa i Asia. Asina, un época nobo di exploracion a cuminsá, treciendo ideanan nobo na e hendenan cu e exploradónan a topa. Profesor J. H. Parry ta skirbi cu “ningun dje hendenan aki a scapa dje influencia europeo, sea ta den sentido social, religioso, comercial of técnico.” Te na cierto grado, ideanan oriental cu tabata bini bek cu e exploradónan, a cuminsá ehercé mas influencia na Europa. A lo largu, e intercambio aki di idea a yuda haci hende hopi mas conciente dje variedad inmenso den cultura humano. Sí, sea pa bon of pa malu, e mundu moderno ainda ta sinti e efectonan dje biahe extraordinario di Vasco da Gama.

[Mapa na página 24, 25]

E ruta di Vasco da Gama su promé biahe

[Rekonosementu]

Mountain High Maps® Copyright © 1997 Digital Wisdom, Inc.

[Plachi na página 26]

Un skèts di un dje barcunan di da Gama

[Rekonosementu]

Cortesia da Academia das Ciências de Lisboa, Portugal

[Plachi Rekonosementu na página 24]

Cortesia do Museu Nacional da Arte Antiga, Lisboa, Portugal, fotografia de Francisco Matias, Divisão de Documentação Fotográfica - IPM