E Crisis Ta Mundial

E MASACRE teribel di muchanan di caya na Brazil ta un ehempel mas cu ta mustra con vulnerabel mucha indeseá ta. Informenan for dje pais ei a bisa cu hende ta asesiná cientos di mucha tur aña.

Tabatin atakenan brutal riba muchanan na Dunblane, Escocia, i na Wolverhampton, Inglatera, i den hopi otro área. Por ehempel, imaginá e sufrimentu di Maria di 12 aña di edad, un huérfano angoles cu nan a violá i cu a sali na estado. Caba el a hañ’é forsá ta cana un 320 kilometer, despues di cua el a duna lus na un baby prematuro cu a biba dos siman so. Maria a muri un siman despues, malu i malnutrí.

Na 1992 un raport dje Fondo di Nacionnan Uní pa Mucha (UNICEF) a bisa cu “ ‘guera contra mucha’ ta un invento di siglo 20.” Segun un raport di 1996 di UNICEF, e punto di bista di algun hende ta cu ‘mester eliminá tambe futuro generacionnan dje enemigu, esta, e yunan dje enemigu.’ Un comentarista político a expres’é asina aki: “Pa caba cu e djakanan grandi, bo tin cu caba cu e djakanan chikitu.”

Dos miyon mucha a muri un morto violento den un periodo recien di dies aña. Un cuater miyon mas a keda mancá, ciegá of cu daño celebral debí na minanan di tera, i nan ta sobrebibiendo lo mihó cu nan por huntu cu e hopi miyones cu a perde nan cas den guera. No ta straño anto cu un informe a carga e titular: “Imágennan Spantoso dje Brutalidad di Guera Riba Mucha.”

E atrocidadnan aki cometé contra mucha ta un plaga pa humanidad, un prueba sigur di cu muchanan ta den crísis, no den un par di pais so, sino na tur parti di mundu. I hopi mucha abusá a ser traicioná tambe.

Traicioná dor di Esnan Cu Nan A Confia

Traicion dje confiansa di un mucha por laga sicatrisnan teribel atras. Esaki ta cierto foral ora cu esun cu a traicioná e confiansa dje mucha ta un mayor, un amigu of educadó. Por mira e magnitud di abusu di mucha na man di mayornan, n’e ola di yamada cu un hot line a ricibí, despues cu nan a pasa un programa yamá “Ketu di Spantu: Ban Exponé i Pone Fin na Abusu di Mucha,” presentá dor di Oprah Winfrey, anfitrion di un talk-show na Merca. E revista Children Today a cita e productor ehecutivo, Arnold Shapiro, bisando cu “e yamadanan mas horibel tabata di muchanan chikitu, cu a bel yen di miedu, i cu kier a scapa dje dolor di abusu físico of sexual.”

E programa aki a contribuí hopi na core cu e nocion di cu abusadó di mucha ta hende desconocí, curpa grandi i spantoso. Echo ta cu “mayornan i famia djacerca ta cometé e gran mayoria di abusu,” segun Shapiro. Otro investigacion ta confirmá esaki i ta indicá tambe cu amigunan di cas di confiansa tin biaha a prepará e mucha i e famia pa despues por cometé un abusu bon planeá contra e mucha. Incesto ta e traicion mas escandaloso di confiansa.

Abusu sexual dor di pedofil ta un otro menasa pa mucha na tur parti di mundu. E boletin Trends & Issues in Crime and Criminal Justice ta duna e definicion aki: “Pedofilia ta referí na atraccion sexual pa cu mucha hopi chikitu. . . . Semper pedofilia ta encerá cometé crímennan manera atake sexual, indecencia i ofensanan relacioná cu pornografia di mucha.”

Informenan repugnante di rednan di pedofil, cu golosmente ta explotá mucha sexualmente, ta basha drenta for di tur parti di mundu. (Mira e cuadro na página 7.) E víctimanan ta tantu mucha homber como mucha muher chikitu. Hombernan sin escrúpulo ta lok nan, abusá di nan sexualmente i despues ta menasá nan of ta malcriá nan cu masha hopi cos pa nan keda parti dje “club.” Hopi bes e hombernan cu ta planea i efectuá e actonan baho aki ta lidernan prominente den comunidad i tin biaha ta haci esei cu pleno conocimentu i proteccion di cuerpo policial i hudicial.

Abusu sexual di mucha na man di clero tambe ta causando indignacion. Informenan di noticia for di tur parti di mundu ta revelá e grado di abusu di mucha na man di clero, tin biaha asta den nomber di Dios. Por ehempel, un pastor anglicano cu a ser condená, a bisa su víctima di dies aña cu “Dios tabata papia via dje [e pastor], i cu Dios a stima kico cu e haci of kico cu [e mucha homber] haci i p’esei e ta bon.”

Na Australia un reseña dje buki The Battle and the Backlash: The Child Sexual Abuse War (E Bataya i e Contragolpe: E Guera di Abusu Sexual di Mucha) a comentá riba abusu di mucha na man di clero i otro hende den posicion di confiansa. E reseña a bisa cu e organisacionnan enbolbí a parce mas interesá den limitá e daño na nan propio imágen i den protehá nan mes, cu den protehá muchanan vulnerabel.

Efectonan Devastador

Por lo general un mucha ta duna su confiansa completo, sin ningun reserva. P’esei, si traicioná e confiansa ei, e tin un impacto devastador riba un mente hóben i confiá. E publicacion Child Abuse & Neglect (Abusu i Negligencia di Mucha) ta comentá: “Persona i lugánan cu anteriormente a nificá siguridad of apoyo, ta ser asociá awor cu peliger i miedu. E mucha su mundu ta bira ménos predicibel i controlabel.”

Como resultado di tal abusu, di cua gran parti ta tuma lugá pa hopi aña, algun mucha a desaroyá problemanan social i sikiátrico mas despues den bida, asta te ora nan ta adulto. E traicion aki di confiansa ta asina perhudicial, pasobra a probechá di un mucha debí cu e ta un mucha. Sin embargo, hopi mucha cu nan abusá di dje nunca no ta raportá e asuntu, un echo cu abusadónan di mucha ta conta mashá ariba.

Den añanan recien, evidencia di abusu di mucha na tur parti di mundu a sigui crece, di manera cu awe tin un monton di evidencia asina cu hende no por nenga ni ignorá mas. Pero mayoria hende ta di acuerdo cu ta un tarea inmenso pa eliminá abusu di mucha. Pues, e preguntanan aki ta lanta: No tin niun hende cu di berdad por protehá nos muchanan? Con nos cu ta mayor por protehá e herencia cu Dios a duna nos i cuida bida di nos yu chikitunan vulnerabel? Cerca ken mayornan por acudí pa yudansa?

[Kuadro/Plachi na página 7]

Razia Contra Internet

Un par di luna pasá, den un dje accionnan mas grandi di razia di agente secreto contra pornografia di mucha riba Internet, polis den 12 pais a invadí cas di mas cu 100 presunto pedofil. Di un solo red di pedofil cu base na Merca, nan a confiscá riba 100.000 potret pornográfico di mucha.

E detective británico cu a coordiná e investigacion di cincu luna di Internet a declará: “E potretnan sigur lo boltu stoma di cualkier persona bon di cabes.” E muchanan tabata di tur dos sexo, tabatin for di dos aña di edad. Polis belga a bisa cu e potretnan di Internet tabata “e representacionnan mas repugnante di pornografia di mucha. . . . A bai asina leu cu hende a abusá di nan propio yunan pa por presentá e potretnan mas yamativo.” Un homber tabatin potret caminda e mes ta violá su subrina i a hinca esakinan den su computer.

Entre e sospechosonan tabatin maestronan di scol, un científico, un studiante di ley, un studiante di medicina, un lider di padvinder, un accountant i un profesor di universidad.

[Plachi na página 6]

Un explosivo a manca man drechi dje mucha homber aki

[Rekonosementu]

UN/DPI Photo by Armineh Johannes

[Plachi Rekonosementu na página 7]

Photo ILO/J. Maillard