Un Conferencia Sobresaliente Riba Cirugia sin Sanger na Moscú

ALTERNATIVANAN PA TRANSFUSION DEN cirugia tabata nomber di un conferencia médico internacional tené na Moscú, Rusia, dia 6 di october 1998. Tabatin mas cu 800 dokter presente na e Instituto di Cirugia di Vishnevskij pa e simposio cu nan a tene en conhunto cu e di Seis Congreso Ruso di Anestesiólogo i Specialista di Intensive Care.

Profesor Andrey Ivanovich Vorobiev, kende ta hefe di hematologia dje Academia Ruso di Ciencianan Médico na Moscú, a yama e dokternan bon biní na loke el a yama “e simposio aki, dedicá na haña alternativanan pa transfusion di sanger.”

Vorobiev a describí di con e conferencia tabata vital, dor di duna un relato tocante e “desasternan grandi cu transfusion di sanger.” El a declará cu como resultado di transfusion di sanger, mayoria mucha cu hemofilia den paisnan manera Merca, Hapon i Alemania a haña AIDS. Anto, despues di duna e estadísticanan riba e plamamentu di hepatítis via transfusion di sanger, el a lamentá: “E estadísticanan ta absolutamente asombroso. Prácticamente tur pashent di hemofilia ta infectá cu hepatítis.”

Vorobiev a señalá cu e opinion médico tabata cu si un hende “perde un liter di sanger, mester reemplas’é cu un liter di sanger.” Pero “esei ta un ekibocacion!” el a bisa. Concluyendo su remarkenan di introduccion, el a bisa: “Nos a apoyá transfusion di sanger, i awor huntu nos lo eliminá e punto di bista anticuánan ei.”

Hopi dje expertonan médico cu a duna discurso tabata di Rusia, pero tambe tabatin oradornan for di Francia, Suecia, Bélgica i Merca. Ademas di describí e desaroyonan den trata pérdida di sanger cu alternativanan pa transfusion di sanger, e dokternan a mustra kico ta e peligernan di transfusion di sanger, incluyendo e rísico di reaccionnan inmunológico adverso.

Un Programa na Television

E television público di Rusia cu ta alcansá 235 miyon hende, a duna un bon reportahe dje conferencia. E moderadó, Elena Malysheva, a splica: ‘Ciruhano, anestesiólogo i hematólogonan bon conocí i internacionalmente renombrá a reuní na Moscú pa contestá un solo pregunta: Por haci cirugia sin duna sanger?’

Elena a informá su televidentenan dje malesanan cu por ser transferí huntu cu sanger i a splica: “Esei ta loke a pone e dokternan busca un solucion. I nan a hañ’é. E yama cirugia sin sanger. Tur hende cu mester haci un operacion por papia dje métodonan di cirugia sin sanger cu su dokter.”

Ora nan a pasa Andrey Vorobiev na television, el a bisa: ‘Sanger di donante ta contené proteinanan cu ta desconocí pa e curpa i por causa reaccion cu bo no por predicí ni evitá. Ademas, ni maske kico nos haci, un donante por infectá un pashent cu vírus cu e tin i cu nos no por detectá.’ Di manera cu el a concluí: ‘Nos tin cu reducí transfusion di sanger di donante na pashentnan.’

Jean-François Baron, hefe di anestesiologia i intensive care dje Hospital Broussais na Paris, Francia, tambe tabata den e programa na television. El a splica: “Den mi institucion nos a desaroyá líkidonan special cu por carga oxígeno. Nan tur tin e característica di sanger di transportá oxígeno, pero no ta contené ningun cel corá di sanger [cu por transmití malesa]. El a predicí cu “den e futuro cercano lo usa e líkidonan aki den prácticanan rutinario.”

Esaki a pone e moderadó dje programa corda e profesor ruso Felix F. Beloyartsev, kende a introducí, un 20 aña pasá, un líkido cu ta transportá oxígeno como substituto pa sanger. El a remarcá cu n’e tempu ei, e comunidad médico no a aceptá e descubrimentu di Beloyartsev i el a “cometé suicidio debí na e persecucion sinfin cu su descubrimentu a caus’é.”

Artículonan den Revistanan Médico

E korant médico Meditsinskaya Gazeta tambe a duna un reportahe dje conferencia. El a bisa: “Por formulá e conclusion principal dje Simposio como lo siguiente: Ta necesario pa usa alternativanan pa transfusion di sanger tur ora cu ta posibel i mester dicidí pa usa sanger solamente despues di a evaluá e nivel di rísico riba un base individual pa cada pashent i solamente den situacionnan cu bida ta na peliger.”

E korant a referí tambe na e echo cu algun dokter no kier respetá un pashent su nengamentu pa tuma sanger. Por ehempel, Testigonan di Jehova no ta aceptá transfusion di sanger debí na e instruccion bíblico pa ‘abstené di sanger.’ (Echonan 15:28, 29) Sin embargo, relacioná cu e asuntu aki, nan a cita palabranan di Michel de Guillenchmidt, profesor di ley na Francia:

‘Nos mester ta gradicidu na Testigonan di Jehova, pasobra ta dor cu nan a lanta e cuestion aki, nan a hala atencion na nan mes derechonan, pero tambe a yuda henter e comunidad médico comprendé e peligernan di transfusion di sanger. Esaki, na su turno, ta impulsá científiconan pa busca métodonan mas sofisticá pa cirugia sin sanger.’

Un dje artículonan den Meditsinskaya Gazeta a cuminsá bisando: “Hende a yega di bisa cu transfusion di sanger ta mescos cu matrimonio: Niun hende no sa kico lo e trece.” Anto despues di remarcá cu ‘sanger humano ta manera e fingerprint di un hende, i no tin dos fingerprint idéntico,’ e korant a puntra: “Ta posibel awe pa duna un garantia total cu e pashent lo no haña ningun infeccion como resultado di transfusion?” El a contestá: ‘Asta den paisnan unda a logra resultadonan impresionante den medicina, no tin un control eficiente pa productonan di sanger.’

E artículo a concluí bisando: ‘Pues, mirando e auditorio yen-yen i e interes bisto dje delegadonan den e problemanan cu a ser considerá, nos ta mira cu tin un cambio ta tumando lugá den e manera cu dokternan ta pensa.’

A Percurá un Servicio

Pafó dje sala di conferencia, Testigonan di Jehova tabatin un stènd unda nan tabata duna e dokternan un pakete di artículo sacá for di revistanan médico riba e uso di métodonan alternativo pa trata pérdida di sanger. Cientos di dokter a aceptá esakinan gustosamente.

Ta bisto cu profesionalnan médico informá ta bayendo den e direccion di limitá uso di sanger den medicina.

[Plachinan na página 26]

Testigonan di Jehova a duna cientos di dokter e artículonan mas recien tocante investigacionnan riba sanger