Con Bo Por Mantené un Actitud Mental Saludabel

NOS salú físico ta dependé hopi di loke nos ta tuma den nos curpa. Si un hende ta come ‘junk food’ riba un base regular, a lo largu su salú lo bai atras. Mescos ta cu nos salú mental.

Por ehempel, bo por compará loke nos ta hinca den nos mente cu un tipo di alimento mental. Alimento mental? Sí, e informacion cu nos ta absorbá for di buki, revista, programa di television, video, weganan di video, Internet i letra di cancion, por tin un influencia riba nos manera di pensa i nos personalidad, mescos cu alimento literal ta influenciá nos curpa. Con asina?

E ex-ehecutivo di publicidad, Jerry Mander, a skirbi relacioná cu e impacto cu television tin riba nos bida: “Mas cu cualkier otro efecto, television ta hinca imágennan den nos celebro.” Pero e imágennan mental ei, ta haci hopi mas cu djis entretené nos. E revista The Family Therapy Networker ta bisa: “E lenguahe, imágen, zonido, idea, caracter, situacion, balor i normanan di loke ta bunita cu medionan di comunicacion ta presentá, ta bira e tópico di nos pensamentu, sintimentu i imaginacionnan.”

Sí, sea cu nos ta realisá of no, loke nos ta mira na television i tambe via otro formanan di entretenimentu, por forma nos pensamentu i sintimentunan sutilmente. Anto einan e peliger ta. Manera Mander ta bisa, “poco-poco nos como hende, ta bira mescos cu e imágennan cu nos tin den nos mente.”

Veneno pa Celebro

Hopi hende cu ta wak masha bon mes loke nan ta come, ta manda cualkier alimento mental abou cu medionan di comunicacion ta sirbi nan. Por ehempel, casi sigur bo a yega di tende un hende bisa: “No tin nada drechi na television!” Algun hende ta parce di ta hipnotisá, i ta keda cambia canal sin stop sperando di haña algu cu ta bale la pena. Niun ora so nan no ta bini riba e idea di paga e television!

Ademas cu hopi programa ta kita asina tantu tempu di nos, nan ta presentá material cu cristiannan lo mester evitá. Gary Koltookian, cu ta skirbi tocante arte, ta bisa: “Fuera di palabra malu, awe tópiconan controversial i sexual ta aparecé cada bes mas i mas riba pantaya cu den pasado.” Sí, un estudio recien na Merca a mustra cu como promedio tin pa ora, 27 esena cu contenido sexual durante e tempu cu mayoria hende ta wak television.

Esaki ta pone bo puntra bo mes ta ki efecto e tin riba e manera cu hende ta pensa. Na Hapon, un telenovela popular a cautivá asina tantu hende, cu e medionan di comunicacion dje nacion a bisa cu el a provocá un “explosion di adulterio.” Ademas, e autornan dje buki Watching America ta bisa: “Awe, mayoria forma di conducta sexual . . . ta ser considerá como e estilo di bida personal cu hende tin mag di scoge.”

No obstante, programanan di television cu ta alabá temanan sexual ta solamente parti dje problema. Esenanan di violencia cu luho di detaye tambe ta masha comun. E preocupacion mas grandi ta e efectonan perhudicial cu programanan di television i películanan violento por tin riba mente hóben cu ta ser impresioná fácilmente. Segun David Grossman, un oficial di ehército penshoná i experto den sicologia di matamentu: “Ora mucha chikitu mira nan tira un hende, hink’é, viol’é, maltrat’é, humiy’é of mat’é na television, nan ta kere cu e ta ègt sosodé.” Comentando riba e mésun problema aki, The Journal of the American Medical Association a bisa: “Te cu e edad di 3 pa 4 aña, hopi mucha no por distinguí realidad for di fantasia den programanan di television, ni maske adultonan splica nan esei.” Cu otro palabra, asta si un mayor bisa un mucha: ‘E hendenan ei no a muri di berdad; ta haci nan ta haci manera nan a muri,’ tog e mente di un mucha no por distinguí e diferencia. Pa un mucha chikitu, violencia na television ta masha real.

E revista Time a resumí e impacto di “violencia den medionan di comunicacion,” bisando: “Masha poco investigadó ta wori mas pa discutí cu si dramamentu di sanger na television i den película tin efecto riba e muchanan cu ta mir’é.” Kico ta e efecto anto? “Décadanan di entretenimentu violento a logra cambia e percepcion i norma dje público,” segun crítico di película Michael Medved. E ta sigui bisa: “Nos no por bisa cu ta un desaroyo positivo pa un sociedad ora e no por sinti shok mas.” Nada straño cu un escritor a bisa cu hiba un mucha di cuater aña bai wak película violento ta “veneno pa [su] celebro.”

Naturalmente, esaki no kier men cu tur programa di television ta malu. Mescos ta conta pa buki, revista, video, wega di computer i otro formanan di entretenimentu. Pero ta obvio cu hopi di loke hende ta yama entretenimentu no ta apropiado pa esnan cu kier mantené un actitud mental saludabel.

Scoge Entrenamentu den un Manera Sabí

Imágennan transmití na nos mente via nos wowonan tin un influencia poderoso riba nos pensamentu i accionnan. Por ehempel, si nos ta alimentá nos mente regularmente cu entretenimentu inmoral, nos determinacion pa obedecé e mandamentu bíblico pa “hui di fornicacion” lo por bira swak. (1 Corintionan 6:18) Asina tambe, si nos ta gusta entretenimentu cu ta presentá “hombernan cu ta practicá loke ta perhudicial,” nos lo por haña cu ta difícil pa ta “pacífico cu tur hende.” (Salmo 141:4; Romanonan 12:18) Pa evitá esaki, nos tin cu kita nos bista for di loke “no ta sirbi pa nada.”—Salmo 101:3; Proverbionan 4:25, 27.

Ta cierto cu debí na nos imperfeccion heredá, nos tur tin cu lucha pa haci loke ta corecto. Apostel Pablo a admití francamente: “Realmente mi tin deleite den e ley di Dios segun e hende cu mi ta paden, pero mi ta contemplá den mi miembronan un otro ley cu ta haci guera contra e ley di mi mente i ta hiba mi catibu n’e ley di picá cu ta den mi miembronan.” (Romanonan 7:22, 23) Esaki kier men cu Pablo a entregá na su debilidadnan carnal? Absolutamente cu no! El a bisa: “Mi ta dominá mi curpa i ta hib’é manera un esclabo, pa . . . mi mes no bira desaprobá di algun manera.”—1 Corintionan 9:27.

Nos tampoco lo no kier usa nos imperfeccion nunca como excuus pa cometé picá. E escritor bíblico Hudas a bisa: “Stimánan, . . . mi a haña cu ta necesario pa skirbi boso pa exhortá boso pa hiba un lucha duru pa e fe cu una bes pa semper a ser entregá n’e santunan.” (Hudas 3, 4) Sí, nos tin cu “hiba un lucha duru” i alehá for di entretenimentu cu ta hiba nos na haci loke ta malu.a

Busca Guia Divino

No semper ta fácil pa cultivá un actitud mental saludabel den e sistema di cosnan aki. Pero Bijbel ta sigurá nos cu ta posibel pa mantené nos mes mentalmente i moralmente limpi. Con? Na Salmo 119:11, nos ta lesa: “Den mi curason mi a warda bo dicho manera un tesoro, pa asina mi no peca contra bo.”

Warda e dichonan di Dios manera un tesoro ta nificá mira nan como algu precioso of duna nan hopi balor. Claro cu nos lo no por apreciá Bijbel si nos no sa kico e ta bisa. Ora nos ta gana conocimentu exacto dje Palabra di Dios, nos ta absorbá e pensamentunan di Dios. (Isaías 55:8, 9; Juan 17:3) Esaki, na su turno, ta enrikesé nos spiritualmente i ta elevá nos manera di pensa.

Tin un manera pa determiná loke ta spiritualmente i mentalmente saludabel? Sí! Apostel Pablo a duna e siguiente conseho: “Cualkier cos cu ta berdadero, cualkier cos cu ta di consideracion serio, cualkier cos cu ta hustu, cualkier cos cu ta decente, cualkier cos cu ta amabel, cualkier cos cu tin bon reputacion, cualkier birtud cu tin i cualkier cos digno di alabansa cu tin, sigui considerá e cosnan aki.”—Filipensenan 4:8.

Pero pa nos haña berdadero beneficio, mas ta necesario cu solamente adkerí conocimentu di Dios. Bou di inspiracion, profeta Isaías a skirbi: “Ami, Jehova, ta bo Dios, Esun cu ta siña bo beneficiá bo mes, Esun cu ta haci bo stap den e caminda den cua bo mester cana.” (Isaías 48:17) Sí, nos no mester busca guia divino so, sino tambe actua di acuerdo cu e conocimentu ei.

Un otro manera pa beneficiá moralmente i spiritualmente ta dor di acudí na Jehova, e “Tendedor di oracion.” (Salmo 65:2; 66:19) Si nos acercá nos Creador cu sinceridad i humildad, lo e scucha nos súplica. I si nos “busk’é, lo e laga [nos] hañ’é.”—2 Crónicanan 15:2.

Pues, ta posibel pa mantené nos salú mental den e mundu violento i inmoral aki? Sí, ta posibel! Dor di nenga di laga e entretenimentu dje mundu aki haci nos mente sin heful, dor di fortalecé nos abilidad di pensa mediante un estudio dje Palabra di Dios i dor di busca guia divino, nos por mantené un actitud mental saludabel!

[Nota]

[Komentario na página 9]

“Hopi mucha no por distinguí realidad for di fantasia den programanan di television”

[Komentario na página 11]

“Décadanan di entretenimentu violento a logra cambia e percepcion i norma dje público”

[Kuadro na página 11]

Baha Bo Rísico di Haña Malesa di Curason

Nutrition Action Healthletter ta sugerí pa tuma e pasonan aki pa yuda bo baha bo rísico di haña malesa di curason.

• Stop di huma. Si bo stop awe, bo por baha bo rísico di haña malesa di curason den ménos cu un aña, asta si bo subi di peso.

• Baha di peso. Si bo tin sobrepeso, lo haci un diferencia caba asta si bo baha cincu pa dies liber so.

• Haci ehercicio. Ehercicio regular (por lo ménos tres bes pa siman) ta yuda baha e mal tipo di colesterol (LDL), ta pone cu preshon no ta subi i ta yuda mantené un bon peso.

• Come ménos vet saturá. Si bo LDL ta haltu, bai over na carni cu ménos vet i purba usa lechi cu 1 porciento di vet of lechi sin vet en bes di lechi cu 2 porciento di vet.

• Limitá consumo di alcohol. Tin indicacion cu esnan cu ta bebe biña corá cu moderacion lo por reducí e rísico di haña malesa di curason.

• Come mas fruta, berdura i otro alimento ricu den fibra cu ta disolvé lihé.

[Plachi na página 8]

Violencia na television ta manera veneno pa e celebro di un mucha

[Plachi na página 9]

Tin biaha mucha ta imitá e violencia cu nan ta mira na television

[Plachi na página 10]

Mayornan por yuda nan yunan dor di soru pa un variedad di bon material pa lesa