Frena Nos Lenga Meskos Ku Ta Frena Kabai
“E kabai ta wòrdu prepará pa e dia di bataya,” segun Rei Salomon, e rei sabí di antiguo Israel. (Proverbionan 21:31) Pa hopi tempu tropanan riba kabai a hunga un papel importante den yuda gana bataya. For di den antigwedat ehérsitonan a usa frena pa kontrolá e temperamentu i forsa di kabai.
Encyclopædia Britannica ta splika ku e frena “ta un sèt di faha ku ta tene e bit firmemente den boka di e bestia i asina ta garantisá ku hende tin kontròl riba dje mediante e riendanan.” Frena di antigwedat no ta diferensiá mashá for di esnan moderno, i nan a resultá sumamente balioso pa por hasi kabai mansu i kore nan.
Rei David, tata di Salomon, a referí na e importansia di e frena ora el a skirbi: “No sea manera kabai òf manera mula, ku no tin komprondementu, ku mester wòrdu dominá ku bosal i frena.” (Salmo 32:9) Unabes bo hasi un kabai mansu, e por a bira un fiel kompañero. Alexander e Grandi tabata apresiá su kabai Buséfalo asina tantu, ku komo muestra di onor na e kabai el a duna un stat na India e nòmber di e kabai.
Ounke hende pa míles di aña ku éksito a logra hasi kabai mansu, frena nos karakter imperfekto sí ta un otro asuntu. E disipel kristian Santiago a remarká: “Nos tur ta trompeká na hopi manera. Si un hende no ta trompeká den loke e ta bisa, e ta un hende perfekto, kapas pa frena henter e kurpa tambe.” (Santiago 3:2) En bèrdat, kua di nos por bati pechu bisa ku nunka e no a ekspresá un palabra deskonsiderá, sarkástiko òf rabiá?
Pero pakiko lucha pa frena nos lenga ingobernabel, un lenga ku “ningun hende no por mansa”? (Santiago 3:8) Wèl, hende ta dispuesto pa dediká tempu i esfuerso na mansa un kabai pasobra nan sa ku unabes e kabai ta di train, lo e resultá útil. Asina tambe, mas mihó nos train, òf kontrolá nos lenga, mas útil lo e ta.
Palabranan ku ta mustra konsiderashon por kalma i animá nos amigu-, kolega- i famianan. (Proverbionan 12:18) E tipo di palabranan ei por hasi bida mas dushi pa hende rònt di nos. Sin embargo, un lenga sin frena ta kousa problema. Beibel ta spièrta: “Es ku sa ki ora e papia, n’ta hañ’é den problema.” (Proverbionan 21:23, Beibel na papiamentu koriente) Na e grado ku nos logra frena nos lenga, na e grado ei nos ta yuda tantu nos mes komo esnan ku ta skucha nos.a
[Nota]
a Un punto interesante ta ku Beibel ta rekordá kristiannan ku nan manera di papia ta estrechamente ligá ku nan adorashon. E ta bisa: “Si un hende ta kere ku e ta religioso i tòg no ta frena su lenga, ma ta gaña su mes kurason, e hende aki su religion ta sin balor.”—Santiago 1:26.
[Plachi na página 31]
Alexander e Grandi
[Rekonosementu]
Alinari/Art Resource, NY