9 Identidat

LOKE ESAKI TA NIFIKÁ

Loke ta identifiká bo no ta solamente bo nòmber i bo aparensia pero tambe bo normanan moral, bo kreensia i bo personalidat. Ku otro palabra, bo identidat ta tur loke bo ta, tantu di paden komo di pafó.

DIKON ESEI TA IMPORTANTE?

Ora bo sa ken bo ta, bo ta defendé loke bo ta kere aden en bes di laga hóbennan di bo edat preshoná bo.

“Hopi hende ta meskos ku un pòpchi ku bo ta wak den showcase. Nan mes no ta skohe loke nan ta bisti; otro hende ta skohe pa nan.”—Adrian.

“Mi a siña kon pa defendé loke ta korekto aunke ku esei no ta fásil. Mi ta haña sa ken mi berdadero amigunan ta na nan manera di aktua i kon ami ta aktua ora mi ta ku nan.”—Courtney.

PRINSIPIO DI BEIBEL: “Stòp di laga e mundu akí forma boso, ma transformá boso mes dor di renobá boso mente.”—Romanonan 12:2.

LOKE BO POR HASI

Pa bo haña sa ken bo ta awor i e sorto di persona ku bo ke bira, wak kiko ta bo puntonan fuerte, bo puntonan débil i loke bo ta kere aden. E siguiente preguntanan por yuda bo eksaminá bo mes.

Puntonan fuerte: Ki talento i abilidat mi tin? Kiko ta mi puntonan fuerte? (Por ehèmpel: Mi ta puntual? Mi tin dominio propio? Mi ta un bon trahadó? Mi ta generoso?) Kiko mi ta bon den dje?

UN SUGERENSIA: Akaso ta difísil pa pensa kiko bo ta bon den dje? Puntra un mayor òf un bon amigu ki puntonan fuerte bo tin i dikon nan ta pensa esei.

PRINSIPIO DI BEIBEL: “Laga kada un di boso analisá su mes akshonnan, anto e ora ei lo e tin motibu pa ta masha kontentu ku su mes, sin kompará su mes ku otro hende.”—Galationan 6:4.

Puntonan débil: Riba ki aspekto di mi personalidat mi mester traha mas duru? Ki ora mi ta ser tentá mas lihé pa hasi algu malu? Den ki aspektonan mi por tin mas dominio propio?

PRINSIPIO DI BEIBEL: “Si nos ta deklará: ‘Nos no tin piká,’ nos ta gaña nos mes.”—1 Huan 1:8.

Loke bo ta kere aden: Kiko ta mi normanan moral, i dikon? Mi ta kere den Dios? Kiko a konvensé mi ku Dios ta eksistí? Kiko mi ta konsiderá inhustu, i dikon? Kiko mi ta kere ku lo pasa den futuro?

PRINSIPIO DI BEIBEL: “Diskreshon [òf kapasidat di pensa] lo warda bo; komprondementu lo kuida bo.”—Proverbionan 2:11.