Bou di e Reino di Dios Lo “Tin Abundansia di Pas”

Pronto e Reino di Dios—un gobièrnu mundial ku Dios a establesé—lo trese pas i union aki riba Tera. Manera Salmo 72:7 ta primintí, lo “tin abundansia di pas.” Pero na ki tempu e Reino di Dios lo kuminsá goberná Tera? Kon e Reino di Dios lo goberná? I kon abo por benefisiá di e Reino di Dios?

NA KI TEMPU E REINO DI DIOS LO KUMINSÁ GOBERNÁ TERA?

Beibel a profetisá un seri di suseso impaktante ku ta forma parti di un “señal” ku ta indiká ku e Reino di Dios lo kuminsá goberná pronto. Algun di e susesonan akí ta guera, hamber, malesa, hopi temblor i oumento di maldat.—Mateo 24:3, 7, 12; Lukas 21:11; Revelashon 6:2-8.

Un otro profesia ta bisa: “Den e último dianan lo bini tempunan krítiko, difísil pa trata kuné. Pasobra hende lo stima nan mes, stima plaka; nan lo ta . . . desobediente na mayornan, malagradesí, desleal, sin kariño; nan lo no ta dispuesto pa sera ningun akuerdo; nan lo ta kalumniadó, sin dominio propio, feros, sin amor pa loke ta bon, . . . hinchá di orguyo, ku ta stima plaser en bes di stima Dios.” (2 Timoteo 3:1-4) Semper tabatin hende asina, pero no hopi manera awor.

E profesianan ei a kuminsá kumpli na 1914. Asta e historiadónan, polítikonan i eskritornan a komentá kon mundu a kambia djei padilanti. Por ehèmpel, e historiadó danes Peter Munch a skirbi: “E guera ku a kuminsá na 1914 a trese un kambio grandi den historia di humanidat. For di un époka briante di progreso, . . . nos a drenta un époka di desaster, horor i odio, ku insiguridat tur kaminda.”

Pero e bon ta ku despues di tristesa ta bini alegria. E señal ku nos a menshoná ta mustra ku e Reino di Dios pronto lo goberná Tera. Hesus a menshoná ku e señal lo inkluí un suseso positivo, bisando: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.”—Mateo 24:14.

E bon notisia ei ta e tema prinsipal di e mensahe di Testigunan di Yehova. P’esei nan revista prinsipal yama E Toren di Vigilansia Anunsiando e Reino di Yehova Dios. E ta papia tokante tur e kosnan maravioso ku e Reino di Dios lo hasi pa humanidat i pa tera.

KON E REINO DI DIOS LO GOBERNÁ?

Ban konsiderá kuater suseso importante ku lo kontestá e pregunta ei:

1. Ningun di e lidernan polítiko di mundu lo no forma parti di e Reino di Dios.

2. E lidernan polítiko di mundu lo no ke entregá nan poder i lo bringa kontra e Reino di Dios. Nan lucha lo ta inútil.—Salmo 2:2-9.

3. E Reino di Dios lo destruí tur gobièrnu ku ke sigui dominá hende. (Daniel 2:44; Revelashon 19:17-21) E delaster konflikto mundial akí yama Armagedon.—Revelashon 16:14, 16.

4. Tur esnan ku ke biba bou di e Reino di Dios lo sobrebibí Armagedon i lo biba den un mundu nobo kaminda lo tin pas. Beibel ta bisa ku nan lo forma parti di “un multitut grandi” ku probablemente lo konsistí di miónes di hende.—Revelashon 7:9, 10, 13, 14.

KON ABO POR BENEFISIÁ DI E REINO DI DIOS?

Un di e promé kosnan ku nos mester di dje pa nos bira súpdito di e Reino di Dios ta konosementu. P’esei ora Hesus a hasi orashon na Dios, el a bisa: “Pa haña bida eterno, nan tin ku siña konosé bo, e úniko Dios berdadero, i esun ku bo a manda, Hesukristu.”—Huan 17:3.

Ora nos siña konosé Yehova Dios komo Persona, nos ta benefisiá den hopi manera. Ban konsiderá dos di nan. Promé, nos ta haña un fe firme den Dios. Un fe ku ta basá riba evidensia ta konvensé nos ku e Reino di Dios ta un realidat i ku pronto lo e kuminsá goberná. (Hebreonan 11:1) Di dos, nos amor pa Dios i pa nos próhimo lo bira mas fuerte. Amor pa Dios ta motivá nos pa obedes’é di kurason i amor pa próhimo ta motivá nos pa apliká loke Hesus a yama e Regla di Oro. El a bisa: “Manera boso ke pa hende hasi ku boso, boso mester hasi meskos ku nan.”—Lukas 6:31.

Meskos ku un tata amoroso, nos Kreador ke lo mihó pa nos. Manera Beibel ta bisa, Yehova ke pa nos disfrutá di “loke realmente ta bida.” (1 Timoteo 6:19) E “bida” ei no ta loke nos tin awe. Pa miónes di hende, bida ta un lucha. Pa nos por tin un idea kon bida lo ta den futuro, ban wak algun di e kosnan maravioso ku e Reino di Dios lo hasi pa su súpditonan.