Kon Nan A Pèrdè Nan Lugá di Biba

MIRA kiko ta sosodé awor. Adam ku Eva ta wòrdu saká for di e bunita hòfi di Edén. Bo sa pakiko?

Esei ta pasobra nan a hasi algu masha malu. I p’esei Yehova a kastigá nan. Bo sa ki malu Adam ku Eva a hasi?

Nan a hasi algu ku Dios a bisa nan pa no hasi. Dios a bisa nan ku nan por kome kuminda di tur palu di e hòfi. Pero Dios a bisa nan pa no kome di un sierto palu, sino nan lo muri. Dios a warda e palu ei pa su mes. I nos sa ku ta malu pa tuma algu di otro persona, no ta bèrdat? Wèl, kiko a sosodé?

Un dia ora Eva tabata su so den e hòfi, un kolebra a papia kuné. Imaginá bo! El a bisa Eva pa kome fruta di e palu ku Dios a bisa nan no kome di dje. Pero, ora Yehova a traha kolebra, e no a traha nan pa nan por papia. Pues esei ta nifiká ku mester ta un otro persona a laga e kolebra papia. Ken esei tabata?

Esei no tabata Adam. Pues, e mester tabata un persona ku Yehova a traha hopi tempu promé ku el a traha tera. Personanan asina ta angel, i nos no por mira nan. Un di e angelnan a bira masha orguyoso. El a kuminsá pensa ku e mester ta un gobernante meskos ku Dios. I e tabata ke pa hende obedesé é en bes di obedesé Yehova. Esei tabata e angel ku a hasi e kolebra papia.

E angel a logra gaña Eva. Ora el a bisa Eva ku lo e bira meskos ku Dios si e kome e fruta, Eva a kere esei. P’esei Eva a kome e fruta i Adam tambe. Adam ku Eva a desobedesé Dios, i p’esei nan a pèrdè nan bunita lugá di biba den e hòfi.

Pero un dia Dios ta bai perkurá pa tur e tera bira mes bunita ku e hòfi di Edén. Mas despues den e buki aki nos lo siña kon bo por yuda hasi tera bunita. Pero awor, laga nos siña kiko a sosodé ku Adam ku Eva.