Pakiko Moisés A Hui

MIRA Moisés huyendo for di Egipto. Bo ta mira e hendenan ta persiguié? Bo sa pakiko nan ke mata Moisés? Laga nos mira si nos por haña sa.

Moisés a lanta den kas di Fárao, e gobernante di Egipto. El a bira un hòmber masha sabí i importante. Moisés a komprondé ku e no tabata egipsio, ma ku su berdadero mayornan tabata esklabo israelita.

Un dia, tempu e tabatin 40 aña di edat, Moisés a disidí di bai mira kon ta bai ku su pueblo. E moda ku nan a wòrdu tratá tabata teribel. El a mira un egipsio suta un esklabo israelita. Moisés a wak rònt, i ora el a mira ku niun hende no tabata wak, el a dal e egipsio, i e egipsio a muri. Anto Moisés a skonde su kurpa den santu.

Su siguiente dia Moisés a bai pa mira su pueblo atrobe. El a pensa ku e por a yuda nan pa nan no mester ta esklabo mas. Pero el a mira dos hòmber israelita ta bringa ku otro, i p’esei Moisés a puntra esun ku tabata hasi malu: ‘Pakiko bo ta gòlpia bo ruman?’

E hòmber a puntra: ‘Ken a hasi bo nos gobernante i hues? Bo ta bai mata mi manera bo a mata e egipsio?’

Moisés a haña miedu. El a komprondé ku hende a haña sa kiko el a hasi ku e egipsio. Asta Fárao a tende di dje, i el a manda hende pa mata Moisés. P’esei Moisés tabatin ku hui for di Egipto.

Ora Moisés a sali for di Egipto, el a bai leu te na e tera di Madian. El a topa ei ku famia di Jetro, i a kasa ku un yu muhé di dje yamá Séfora. Moisés a bira wardadó di karné i a kuida e karnénan di Jetro. El a biba 40 aña na e tera di Madian. Awor e tabatin 80 aña di edat. Anto un dia ora Moisés tabata kuida e karnénan di Jetro, un kos asombroso a sosodé ku a kambia e bida di Moisés por kompletu. Bira e blachi i laga nos mira kiko tabata e kos asombroso ei.