Barku A Kibra Riba Un Isla

MIRA! E barku ta den problema! E ta kibra na pida-pida! Bo ta mira e hendenan ku a bula na awa? Algun a yega tera kaba. Ta Pablo esei? Laga nos mira kiko a pas’é.

Kòrda ku nan a tene Pablo den prizon na Cesarea pa dos aña. Despues nan a barka e i otro prizoneronan pa Roma. Ora nan a pasa banda di e isla di Kreta, un mal tempu fuerte a suta nan. Tabatin asina tantu bientu ku nan no por a stür e barku. I nan no por a mira solo den dia ni strea durante anochi. Finalmente, despues di hopi dia, esnan na bordo a pèrdè speransa di ser salbá.

Anto Pablo a lanta para i a bisa: ‘Ningun di boso lo no pèrdè boso bida; e barku so lo bai pèrdí. Pasobra ayera nochi un angel di Dios a bin serka mi i a bisa mi: “No tene miedu, Pablo! Bo tin ku para dilanti di Cesar e gobernante romano. I Dios lo salba tur hende ku ta nabegando huntu ku bo.”’

Rònt di meianochi, dieskuater dia despues ku e mal tempu a kuminsá, e matrosnan a tuma nota ku e awa no tabata hopi hundu mas! Teniendo miedu ku e barku lo kibra riba baranka den skuridat, nan a tira anker. Su manisé nan a mira un boka. Nan a disidí di nabegá e barku te na e playa.

Wèl, ora nan a yega mas serka di e kosta e barku a dal den un banki di santu i a keda pegá. Anto laman a kuminsá sut’é i e barku a kuminsá kibra. E ofisial militar a bisa: ‘Tur hende ku sa landa, bula promé den laman i landa bai tera. Tur otro hende por bula despues di nan, i tene duru na e pidanan di e barku.’ I esei ta loke nan a hasi. Asina tur 276 hende na bordo a yega tera sano i salvo manera e angel a primintí.

E isla yama Malta. E habitantenan di e isla tabata masha bondadoso, i nan a kuida e hendenan di e barku. Ora tempu a mehorá, nan a pone Pablo riba un otro barku i a hib’é Roma.