E gobierno cu lo restora paradijs
Ora Jesus tabata riba tera, el a bisa su sigidornan pidi binimento dje Reino di Dios: “Laga bo reino bini. Laga bo boluntad ser cumplí, como den cielo, també riba tera.” (Mateo 6:9, 10) També el a papia constantemente tocante e “bon nobo di reino.” (Mateo 4:23) Realmente, el a papia mas tocante e Reino cu el a papia tocante cualkier otro cos. Pakico? Pasobra e Reino ta e instrumento cu Dios lo usa pa soluciona problema cu ta haci bida tanto dificultoso awe. Usando e Reino, Dios pronto lo pone fin na gera, hamber, maleza, i crimen, i lo efectua unidad i paz.
Bo no ta deseá di biba den un mundo manera esei? Si ta asina, anto bo mester sigi leza e foyeto aki. Den dje bo por siña cu e Reino ta un gobierno, pero ta mihor cu cualkier gobierno cu a goberna humanidad na cualkier tempo. També bo por mira e manera emocionante cu Dios gradualmente a splica na su sirbidornan su propósito tocante e Reino. Además, bo por mira con e Reino por yudábo asta awe.
Realmente, bo por bira ciudadano bao dje Reino di Dios ne tempo aki. Pero, promé cu bo ta decidi di haci esei, bo tin cu sa mas tocante dje. P’sei nos ta animábo pa leza e foyeto aki. Tur loke e ta bisábo tocante e Reino ta sacá for di Bijbel.
Primeramente, láganos mira pakico nos tin tanto necesidad pe Reino di Dios.
Na principio di existencia humano, Dios a traha un homber perfecto i a poné den paradijs. Ne tempo ei no tabatin necesidad dje Reino.
Sin embargo, Adam i Eva, nos promé mayornan, a scucha Satanás, un angel rebelioso. El a papia mentira tocante Dios i a hácinan també rebela contra Dios. P’sei nan a merece morto, pasobra “pagu cu picá ta paga ta morto.”—Romano 6:23.
Hende imperfecto i pecador no por haya yiu perfecto. Pues, tur yiu di Adam a nace imperfecto, pecaminoso i muribundo.—Romano 5:12.
Dje ora ei padilanti hende tabatin necesidad pe Reino di Dios yúdanan recobránan for dje maldicion di picá i morto. E Reino també lo haci e nomber di Dios limpi di mentira cu Satanás a papia contra dje.
Jehova Dios a priminti un “simía” (of desendiente) special cu lo nace pa salba hende for di picá. (Génesis 3:15) E “simía” ta e Rey dje Reino di Dios.
Ken ta e Rey?
Rond di 2.000 aña despues cu Adam a peca, a biba un homber mashá fiel yamá Abraham. Jehova Dios a bisa Abraham bandona su mes stad i bai biba den tent den e tera di Palestina.
Abraham a haci tur loke Jehova Dios a bisé, incluyendo un cos mashá dificultoso. Jehova Dios a bisé sacrifica su único yiu via Sara, riba altar.
Jehova Dios realmente no tabata kier un sacrificio humano. Ma e kier sa cuanto Abraham a stimé. Abraham tabata ne punto di mata Isaac ora Jehova Dios a paré.
Debí ne gran fe di Abraham, Jehova Dios a priminti di duna e tera di Palestina na su desendiente i a bisa cu e Simía primintí lo ser di su desendencia, i di desendencia di su yiu Isaac.—Génesis 22:17, 18; 26:4, 5.
Isaac tabatin yiu morocho, Esau i Jacob. Jehova Dios a bisa cu e Simía primintí lo bini via Jacob.—Génesis 28:13-15.
Jacob, cu Jehova Dios també a yama Israel, tabatin 12 yiu homber, tur locual cu tempo tabatin yiu. Asina yiu di Abraham a cuminza aumenta.—Génesis 46:8-27.
Ora tabatin un secura grandi den e tera, Jacob i su famía a bai biba den Egipto, aceptando e invitacion di faraó, gobernante di Egipto.—Génesis 45:16-20.
Den Egipto Dios a revela cu e Simía primintí lo ser desendiente di Hudá, yiu di Jacob.—Génesis 49:10.
Cu tempo Jacob a muri i su yiunan a aumenta na cantidad te cu nan tabata manera un nacion. Anto egipcio a haya miedu di nan i a haci esclabo di nan.—Exodo 1:7-14.
Cu tempo Jehova Dios a manda Moisés, un homber mashá fiel, pa exigi pa faraó dje tempo ei laga yiu di Israel sali liber.—Exodo 6:10, 11.
Faraó a nenga, pues Jehova Dios a manda diez plaga riba egipcio. Como e último plaga, el a manda un angel di morto pa mata tur yiu mayor di Egipto.—Exodo, capítulo 7 te 12.
Dios a bisa israelita cu si nan mata un lamchi pa nan cena i pone su sanger riba kozijn di porta, e angel di morto lo pasa nan cas forbij. Asina yiu mayor di israelita a scapa.—Exodo 12:1-35.
Como resultado, faraó a manda israelita sali for di Egipto. Pero e ora ei el a cambia di idea i a corre tras di nan pa trécenan bek.
Jehova Dios a habri camina di escape pa israelita door di Lamá Corá. I ora faraó i su ehército a purba di síginan, nan a hoga.—Exodo 15:5-21.
Jehova Dios a hiba yiu di Israel ne ceru yamá Sinaí den desierto. Ei, el a dúnanan su Ley i a bisa cu si nan wardé, nan por bira un reino di sacerdote i un nacion santo. Asina, israelita tabatin oportunidad di ser despues un parti importante dje Reino di Dios.—Exodo 19:6; 24:3-8.
Ora israelita a keda na Ceru di Sinaí pa rond di un aña, Jehova Dios a híbanan den direccion di Palestina, e tera cu el a priminti na Abraham nan antepasado.
Den Palestina, Dios despues a permiti rey goberna israelita. Ne tempo ei Dios tabatin un reino riba tera.
E segundo rey di Israel tabata David, un desendiente di Hudá. David a vence tur enemigo di Israel i a haci Jerusalem e stad capital dje nacion.
Sosodimento durante e reinado di David ta mustra cu ora Jehova Dios ta apoya un rey, ningun gobernante terrenal por vencele.
Jehova Dios a bisa cu e Simía primintí lo ser un desendiente di David.—1 Crónica 17:7, 11, 14.
Salomón, yiu di David a reina despues di dje. E tabata un rey sabí, i Israel a prospera bao di su reinado.
També Salomón a traha un tempel excelente pa Jehova Dios den Jerusalem. E situacion den Israel bao di reinado di Salomón ta mústranos algun bendicion cu e Reino binidero di Dios lo trece pa humanidad.—1 Rey 4:24, 25.
Sin embargo, hopi rey despues di Salomón tabata mashá infiel.
Pero mientras cu desendiente di David tabata goberna den Jerusalem ainda, Jehova Dios a usa su profeta Isaías pa profetiza di un futuro Yiu di David cu lo goberna tur e tera den fieldad. Esei ta e Simía primintí.—Isaías 9:6, 7.
Profeta Isaías a profetiza cu su reino lo ser asta mas glorioso cu e reino di Salomón.—Isaías, capítulo 11 i 65.
Awor, mas cu nunca, sirbidor di Dios tabata puntra nan mes ken e “simía” lo tá.
Sin embargo, promé cu e Simía a yega, rey di Israel a bira asina perverso cu na aña 607 PEC Jehova Dios a permiti babilónico domina e nacion i hiba mayor parti di pueblo preso na Babilonia. Pero Dios no a lubida su promesa. E Simía ainda tabatin cu presenta den desendencia di David.—Ezekiel 21:25-27.
Loke a sosode Israel ta mustra cu maske un rey humano sabí i fiel por trece beneficio, tal beneficio ta limitá. Homber fiel ta muri i nan sucesor tal bez no ta fiel. Ki solucion tabatini? E “simía” primintí.
Cu tempo, despues di miles di aña di spera, e “simía” a presenta. Ken tabata e “simía”?
Un angel di Dios a duna e contesta na un soltera israelita yamá María. El a bisa María cu lo e haya un yiu homber cu lo ser yamá Jesus. Lo sigiente ta loke e angel a bisé:
“Esei lo ser grandi i lo ser yamá Yiu di Haltísimo; i Jehova Dios lo duné e trono di David su tata, i lo e reina como rey.”—Lucas 1:32, 33.
Pues Jesus ta e Simía primintí i despues a bira Rey di Reino di Dios. Pero pakico Jesus tabata distinto di homber fiel cu a biba promé cuné?
E nacimento di Jesus tabata un milagro. Su mama tabata birgen, i e no tabatin tata humano. Jesus a biba na antes den cielo i e spiritu santo of forza activo di Dios a transporta e bida di Jesus foi cielo ne matriz di María. Asina e no a hereda e picá di Adam. Durante tur su bida, Jesus no a peca.—1 Pedro 2:22.
Ora Jesus tabatin 30 aña di edad el a bautiza.
El a bisa hende tocante e Reino di Dios i cu tempo a introduci su mes como Rey dje Reino.—Mateo 4:23; 21:4-11.
El a haci hopi milagro també.
El a cura hende enfermo.—Mateo 9:35.
Milagrosamente el a percura cuminda pa hende hambriente.—Mateo 14:14-22.
E asta a lanta hende morto.—Juan 11:38-44.
Milagro asina ta mustra ki sorto di cosnan Jesus lo haci pa humanidad como Rey di Reino di Dios.
Bo ta corda con rey David a haci Jerusalem e stad capital di su reino? Jesus a splica cu e Reino di Dios no ta riba tera, sino ta den cielo. (Juan 18:36) P’sei mes e Reino ta ser yamá “Jerusalem celestial.”—Hebreo 12:22, 28.
Jesus a menciona ley cu hende cu ta ciudadano bao di Reino tin cu obedece. Tal ley ta den e Bijbel awor. Ley di mas importante ta cu hende tin cu stima Dios i stima otro.—Mateo 22:37-39.
Jesus també a revela cu e so no ta reina den su Reino. Tin otro hende escogí pa bai cielo i reina ei hunto cuné. (Lucas 12:32; Juan 14:3) Cuanto lo tini? Revelacion 14:1 ta contesta: 144.000.
Si 144.000 so ta bai cielo pa reina cu Jesus, ki speranza tini pa otronan di humanidad?
E Bijbel ta bisa: “E hustonan mes lo tene e tera den nan poder, i nan lo biba riba dje pa semper.”—Salmo 37:29.
Hende cu lo biba riba tera pa semper ta hende yamá “otro carné.”—Juan 10:16.
Pues, tin dos speranza. Tin 144.000 cu Jehova Dios ta invitá pa bai cielo i reina cu Jesucristo. Pero miyones di otronan, un multitud grandi, tin e speranza sigur di biba riba tera pa semper como ciudadano di su Reino.—Revelacion 5:10.
Satanás a odia Jesus i a oponele. Despues cu Jesus a predica pa tres aña i mei, Satanás a causa su aresto i morto, clabá na staca. Pakico Dios a permiti esei?
No lubida cu door di ser desendiente di Adam, nos tur ta peca i ta merece morto.—Romano 6:23.
Tampoco no lubida cu door dje manera milagroso cu Jesus a nace, e tabata perfecto i no a merece morto. Sin embargo, Dios a laga Satanás ‘machica Jesus den su hilchi,’ pa maté. Pero Dios a resusita Jesus na bida atrobé como un spiritu inmortal. Siendo cu e tin derecho ainda na bida humano perfecto, awor e por usa esei pa rescatános como hende for di picá.—Génesis 3:15; Romano 5:12;
Pa yúdanos comprende completamente loke e sacrificio di Jesus ta nifica, e Bijbel ta mencioné usando modelo profético.
Por ehempel, bo ta corda con Jehova Dios a bisa Abraham sacrifica su yiu como un prueba di su amor?
Esei tabata un modelo profético dje sacrificio di Jesus. E ta mustra con e amor di Jehova Dios pa humanidad ta asina grandi cu el a permiti su Yiu, Jesus, muri pa nos afin cu nos por haya bida.—Juan 3:16.
Bo ta corda e manera cu Jehova Dios a salba israelita for di Egipto, i israelita a salba nan yiu mayor, lagando e angel di morto pásanan forbij? Esei ta e ocasion cu nan a celebra tur aña, celebrando pascu.—Exodo 12:12, 13.
Esei tabata un modelo profético. Mescos cu sanger dje lamchi a nifica bida pa yiu mayor di israelita, e sanger dramá di Jesus ta nifica bida pa hende cu ta kere den dje. I mescos cu sosodimento dje anochi ei a nifica libertad pa israelita, e morto di Jesus ta produci pa humanidad libertad for di picá i morto.
P’sei mes Jesus ta ser yamá e “Lamchi di Dios cu ta kita picá di mundo.”—Juan 1:29.
Sin embargo, ora Jesus tabata riba tera, e també a reuni disípel i a entrenánan pa predica i siña e bon nobo di Reino asta despues di su morto.—Mateo 10:5; Lucas 10:1.
Eseinan tabata e promé hendenan cu Dios a scoge pa reina cu Jesus den su Reino.—Lucas 12:32.
Bo ta corda cu Dios a priminti na hudío cu si nan warda e Ley, nan lo ser un “reino di sacerdote”? Awor nan tabatin oportunidad di ser parti dje Reino di Dios i sirbi como sacerdote celestial si nan acepta Jesus. Pero mayor parti di nan a rechaza Jesus.
Pues, dje tempo ei padilanti, hudío no tabata e nacion escogí di Dios; Palestina no tabata e Tera Primintí mas.—Mateo 21:43; 23:37, 38.
Dje dia di Jesus te na nos dia, Jehova Dios a recoge hende cu lo reina den cielo cu Jesus. Ainda tin algun mil di nan na bida riba tera awe. Nos ta yámanan e resto ungí.—Revelacion 12:17.
Awor bo ta cuminza mira loke ta e Reino di Dios. Esei ta un gobierno den cielo, su Rey ta Jesucristo, i 144.000 hende di tera ta uni cuné. E Reino lo goberna riba fiel humanidad na tera i lo tin e poder di trece paz pe tera.
Despues di su morto, Dios a resusita Jesus i el a subi na cielo. Den cielo, el a spera pa Dios bisé e tempo pe cuminza reina como Rey di Reino di Dios. (Salmo 110:1) Esei ta cua tempo?
Tabatin bez cu Jehova Dios a haci hende soña pe bísanan den soño cosnan tocante su Reino.
Den dia di Daniel, Jehova Dios a haci Nabucodonosor, rey di Babilonia, soña asina. El a soña di un palu enorme.—Daniel 4:10-37.
E palu tabata cortá i e troncón den e tera tabata banchá pa siete aña.
E palu a representa Nabucodonosor. Mescos cu e troncón tabata banchá pa siete aña, Nabucodonosor a bira loco pa siete aña. Anto su sanidad mental tabata restorá.
Tur esei tabata un modelo profético. Nabucodonosor a simboliza gobernacion mundial di Jehova Dios. Na principio, el a eherce esei usando desendiente di rey David den Jerusalem. Ora Babilonia a domina Jerusalem na 607 PEC, e liña di rey a kibra. Nunca tabatin un otro rey di desendencia di David “te esun ta bini cu tin derecho legal.” (Ezekiel 21:27) Esei tabata Jesucristo.
Cuanto tempo a pasa despues di 607 PEC te cu Jesus a cuminza reina? Siete aña profético. Es decir, 2.520 aña. (Revelacion 12:6, 14) I 2.520 aña despues di 607 PEC ta híbanos na 1914 EC.
Pues, Jesus a cuminza reina den cielo na 1914. Kico esei a nifica?
E Bijbel ta bísanos usando vision cu apóstol Juan a mira.
El a mira un hende muher den cielo duna luz na un yiu homber.—Revelacion 12:1-12.
E hende muher a simboliza e organizacion celestial di Dios, componí di tur sirbidor angelical di Dios den cielo. E yiu homber ta simboliza e Reino di Dios. Esei a “nace” na 1914.
Kico a sosode sigientemente? E promé cos cu Jesus a haci como Rey tabata di tira Satanás, i tur angel cu a rebela cuné, foi cielo i abao ne tera.—Revelacion 12:9.
E Bijbel ta bísanos e resultado: “Alegra, cielo i boso cu ta biba den dje! Ai dje tera i di lamá, pasobra e Diabel a baha cerca boso, teniendo mashá rabia, sabiendo cu e tin poco tempo mas.”—Revelacion 12:12.
Pues, ora Jesus a cuminza reina den cielo, su enemigonan a bira mashá activo riba tera. Segun cu e Bijbel a profetiza, Jesus a cuminza reina meimei di su enemigonan.—Salmo 110:1, 2.
Kico esei a nifica pa humanidad?
Jesus a bísanos: gera, scarcidad di cuminda, maleza, i temblor.—Mateo 24:7, 8; Lucas 21:10, 11.
Nos a mira tal cosnan sosode desde 1914, locual ta un otro motibo pa nos sa cu e Reino a cuminza reina ne tempo ei.
També tabatin “ansha dje nacionan, sin conoce e salida . . . mientras cu hende a desmaya di miedu.” (Lucas 21:25, 26) Nos a mira esei, també, desde 1914.
Apóstol Pablo a agrega cu hende lo ta “stimador di nan mes, stimador di placa, . . . desobediente na mayornan, . . . no ta dispuesto pa ningun acuerdo, calumniador, sin dominio propio.”—2 Timoteo 3:1-5.
Awor bo sa pakico bida ta asina duro awe. Satanás ta mashá activo. Pero, e Reino di Dios ta activo també.
Pronto despues di 1914, e resto di esnan cu ta spera di reina den cielo cu Jesus a cuminza declara e bon nobo di cu e Reino ta establecí caba. E trabao a plama awor te na tur parti dje tera, net manera Jesus a bisa.—Mateo 24:14.
Kico ta e propósito dje trabao di predica?
Promé, bisa hende tocante e Reino di Dios.
Segundo, yuda hende decidi si nan kier bira ciudadano dje Reino of no.
Jesus a bisa cu den nos dia tur humanidad lo ta partí como hende semehante di carné i hende semehante di cabrito.—Mateo 25:31-46.
“Carné” ta hende cu ta stimé i su rumanan. “Cabrito” ta hende cu no ta haci esei.
“Carné” ta haya bida eterna i “cabrito” no ta hayé.
E trabao di separá hende ta ser hací door di predica e bon nobo di Reino.
Lo sigiente ta un profecía di profeta Isaías.
“I mester sosode den e parti final dje dianan cu e montaña dje cas di Jehova lo bira firmemente establecí mas halto cu punto di montaña, i siguramente lo ser hizá mas halto cu ceru; i tur nacion mester basha den dje.”—Isaías 2:2.
Humanidad awor ta enfrenta e “parti final dje dianan.”
E “cas” di adoracion di Jehova Dios ta ser “hizá” mas halto cu religion falso.
“I hopi hende siguramente lo bai i bisa: ‘Bam, i láganos subi cerca e montaña di Jehova, cerca e cas dje Dios di Jacob; i lo e instruínos di su camina, i nos lo camna den su berea.’”—Isaías 2:3.
Pues, hopi hende di tur nacion lo bini pa adora Jehova Dios i invita otro hende pa uni cu nan. Nan ta siña comportánan manera Jehova Dios kier.
“I nan lo tin cu bati nan spada na ploeg i nan lanza na chapi. Nacion lo no hiza spada contra nacion, ni nan lo no siña di gera mas.”—Isaías 2:4.
Hende cu ta adora Jehova Dios ta uní i ta na paz cu otro.
E resultado dje actividad dje Reino di Dios ta cu awor tin casi tres miyón hende mundialmente cu ta ciudadano dje Reino.
Nan ta reuní rond dje resto, e resto di esnan cu tin e speranza di bai cielo i reina cu Cristo.
Nan ta recibi alimento spiritual via e organizacion di Dios.—Mateo 24:45-47.
Nan ta un hermandad internacional di hende cristian cu berdaderamente ta stima otro.—Juan 13:35.
Nan ta disfruta di trankilidad di alma i speranza pe futuro.—Filipense 4:7.
Pronto e bon nobo lo a ser predicá. E “carnénan” lo ta den e curá. Anto kico e Reino lo haci?
Bo ta corda con fiel rey David a vence tur enemigo dje pueblo di Dios? Wel, Rey Jesus lo haci mescos.
Rey Nabucodonosor tabatin un soño ayá di un imagen grandi cu a simboliza tur imperio mundial di su dia te na nos dia.
Anto el a mira un piedra cortá for di montaña i el a kibra e imagen na pida pida. E piedra a representa e Reino di Dios.
Esei kier men destruccion dje mal sistema di cosnan actual. (Daniel 2:44) Esei ta e “tribulacion grandi” for di locual e “multitud grandi” ta wordu salbá.—Revelacion 7:9, 14.
Lo sigiente ta algun cosnan cu e Reino lo derota.
Religion falso lo desparce, mescos cu piedra di molina tirá den lamá.—Revelacion 18:21.
P’sei mes tur amante di Dios ta ser consehá pa sali for di religion falso AWOR.—Revelacion 18:4.
Sigientemente, Rey Jesus lo “dal e nacionan . . . i lo pastoreánan cu un bara di heru.”—Revelacion 19:15.
P’sei, Testigo di Jehova, aunque nan ta paga belasting i ta obedece ley dje país, nan no ta métenan den político.
Finalmente, Satanás mes, e “dragón” grandi, ta ser tirá den abismo.—Revelacion 20:2, 3.
Solamente e “carnénan,” hende cu ta someténan na Jesus como Rey, lo sobrebiba tal tribulacion.—Mateo 25:31-34, 41, 46.
Apóstol Juan a mira un vision dje “carnénan” cu ta sobrebiba e tribulacion.
“Mi a wak, i, mira! un multitud grandi, cu ningun hende por conta, di tur nacion i tribu i pueblo i lenga, pará dilanti dje trono i dilanti dje Lamchi, bistí na mantel blancu; i nan tabatin rama di
palmita den nan man.” —Revelacion 7:9.
E “multitud grandi” ta componí di tur hende cu ta responde ne predicacion dje bon nobo.
Nan ta “sali for dje tribulacion grandi.”—Revelacion 7:14.
“Rama di palmita” ta mustra cu nan ta recibi Jesus como nan Rey.
Nan bistimento di “mantel blancu” ta simboliza cu nan tin fe den e sacrificio di Jesus.
E “Lamchi” ta Jesucristo.
Nan ta disfruta di cua bendicion e ora ei? Bo ta corda e felicidad den Israel ora fiel rey Salomón tabata reina? Esei a duna un cuadro chikito dje felicidad riba tera bao di Rey Jesus.
Lo tin paz mes den humanidad i entre hende i bestia, net manera Isaías a profetiza.—Salmo 46:9; Isaías 11:6-9.
Mescos cu Jesus a cura hende enfermo ora e tabata riba tera, asina lo e kita maleza for di tur humanidad.—Isaías 33:24.
Mescos cu el a duna cuminda ne multitud, asina lo e elimina scarcidad di cuminda for di tur humanidad.—Salmo 72:16.
Mescos cu el a lanta hende morto, asina lo e lanta hende morto cu no tabatin plena oportunidad di someténan ne Reino di Dios.—Juan 5:28, 29.
Gradualmente, lo e hiba humanidad bek ne perfeccion cu Adam a perde.
Esei no ta un futuro maraviyoso? Bo kier miré? Si ta asina, traha pa bo por sometébo awor ne Reino di Dios i bira un “carné.”
Studia e Bijbel i yega di conoce Jehova Dios i Jesucristo.—Juan 17:3.
Asociábo cu otronan cu també ta sumiso ne Reino.—Hebreo 10:25.
Siña ley dje Reino i obedecénan.—Isaías 2:3, 4.
Dedica bo bida ne sirbishi di Jehova Dios, i bautiza.—Mateo 28:19, 20.
Evita mal cosnan, tal como hortamento, gañamento, inmoralidad, i burachería, locual ta disgusta Jehova Dios.—1 Corintio 6:9-11.
Participa den predicamento dje bon nobo di Reino.—Mateo 24:14.
Anto cu yudanza di Dios, bo por mira restoracion dje Paradijs cu Adam a perde pa su desendientenan, i bo por mira e promesa aki cumplí: “Mi a tende un boz fuerte for dje trono bisa: ‘Mira! e tent di Dios ta cerca humanidad, i lo e biba cerca nan, i nan lo ser su pueblo. I Dios mes lo ser cerca nan. I lo e seca tur lágrima di nan wowo, i lo no existi morto mas, ni yoramento ni sclamamento ni dolor lo no existi mas. Cosnan di antes a pasa forbij.’”—Revelacion 21:3, 4.
[Tabèl na página 20]
(Pa e teksto den su formato kompleto, wak e publikashon)
607 PEC 1914 EC
PEC | EC
500 1.000 1.500 2.000 2.520
[Plachi na página 11]
Abraham
Isaac
Jacob
Hudá
David
[Plachi na página 14]
144.000
[Plachi na página 16]
Adam
Jesus