Bida den un Trankilu Mundo Nobo

Ora bo ta wak e bista riba e tratado aki, ki sintimento bo ta experimenta? Bo curazón ta anhela e paz, felicidad, i prosperidad cu bo ta mira ei? Sigur cu sí. Pero, ta solamente un soño, of fantasía, pa kere cu tal situacion hamás lo existi riba tera?

Probablemente casi tur hende ta kere cu sí. E realidad djawe ta gera, crimen, hamber, maleza, i behez—pa menciona un poco so. Pero, tin un motibo pa speranza. Mirando den futuro, e Bijbel ta menciona un ‘cielo nobo i tera nobo cu nos ta spera segun e promesa di Dios, i den esei husticia lo biba.’—2 Pedro 3:13; Isaías 65:17.

Segun e Bijbel, e “cielo nobo i tera nobo” no ta un cielo nobo material ni un tera nobo literal. Dios a traha e cielo i tera fisical perfecto, i e Bijbel ta mustra cu nan lo permanece pa semper. (Salmo 89:36, 37; 104:5) E “tera nobo” lo ser un arreglo social husto di hende bibando riba tera, i e “cielo nobo” lo ser un reino of gobierno celestial perfecto, cu lo reina riba e arreglo social di hende riba tera. Pero ta realista pa kere cu “un tera nobo,” of glorioso mundo nobo, ta posibel?

Wel, considera e echo cu tal estado ideal tabata un parti dje propósito original di Dios pe tera. Dios a pone e promé pareha humano den e Paradijs di Eden riba tera i a dúnanan un asignacion maraviyoso: “Sea fructífero i bira hopi i yena e tera i dominé.” (Génesis 1:28) Sí, e propósito di Dios pa nan tabata di haya yiu i cu tempo extende nan Paradijs riba tur e tera. Aunque nan a scoge di desobedece Dios despues, asina dunando prueba cu nan no a merece di biba pa semper, e propóstio original di Dios no a cambia. I e mester ta cumplí den e mundo nobo!—Isaías 55:11.

Realmente, ora bo ta haci e oracion Nos Tata, pidiendo ‘Laga bo reino bini,’ bo ta pidi pa su gobierno celestial libra e tera di maldad i goberna e mundo nobo. (Mateo 6:9, 10) I nos por tene confianza di cu Dios lo contestá e oracion, siendo cu su Palabra ta primintí: “E hustonan mes lo tene e tera den nan poder, i nan lo biba riba dje pa semper.”—Salmo 37:29.

Bida den e mundo nobo di Dios

E Reino di Dios lo trece beneficio terrenal fuera di comparacion, logrando tur cos bon cu tabata e propósito original di Dios pa su pueblo goza riba tera. Odio i prehuicio lo no existi mas, i cu tempo tur hende riba tera lo ser berdadero amigo di tur otro. Den e Bijbel, Dios a priminti cu ‘gera lo no existi mas te na extremidad dje tera.’ “Nacion lo no hiza spada contra nacion, ni lo no siña di gera mas.”—Salmo 46:9; Isaías 2:4.

Cu tempo, tur e tera lo ser transformá na un estado di paradijs. E Bijbel ta bisa: “E desierto i tera sin awa lo alegra, i sabana di desierto lo ser gozoso i florece manera azafrán. . . . Pasobra awa tin cu brota den desierto, i rio den sabana di desierto. I e tera kimá pa calor tin cu bira manera tanki di awa, i tera secu manera fontein di awa.”—Isaías 35:1, 6, 7.

Lo tin tur motibo pa hende ser feliz den e tera paradísico. Nunca mas hende lo sufri di hamber, faltando cuminda. “E tera mes siguramente lo duna su producto,” segun e Bijbel. (Salmo 67:6; 72:16) Tur hende lo disfruta dje fruta di nan mes trabao, manera nos Creador a priminti: “Nan siguramente lo planta hofi di wijndruif i come fruta di dje. . . . nan lo no planta i otro hende come.”—Isaías 65:21, 22.

Den e mundo nobo di Dios, hende lo no biba riba otro mas den cas enorme di flat ni den choza kibrá, pasobra segun e propósito di Dios: “Nan siguramente lo traha cas i biba den nan . . . Nan lo no traha cas i otro hende biba den dje.” E Bijbel també ta priminti: “Nan lo no traha duro por nada.” (Isaías 65:21-23) Asina hende lo tene trabao productivo i satisfaciente. Bida lo no ser fastioso.

Cu tempo, e Reino di Dios asta lo restora e relacion trankilu cu a existi den e hofi di Eden entre bestia mes, i entre bestia i hende. E Bijbel ta bisa: “Lobo realmente lo biba pa un tempo cu lamchi macho, i leopardo mes lo sosega cerca cabritonchi, i bishé i león macho hoven i animal bon alimentá tur hunto; i simplemente mucha homber lo ser guía riba nan.”—Isaías 11:6-9; Oseas 2:18.

Imaginábo, den e tera paradísico tur maleza i enfermedad fisical també lo ser curá! E Palabra di Dios ta dúnanos e siguranza: “Ningun residente lo bisa: ‘Mi ta malu.’” (Isaías 33:24) “[Dios] lo seca tur lágrima di nan wowo, i lo no existi morto mas, ni yoramento ni sclamamento ni dolor lo no existi mas. E cosnan di antes a pasa caba.”—Revelacion 21:4.

Con esei ta posibel pa bo

Siguramente e promesa di Dios tocante bida den su mundo nobo di husticia mester conmovébo. I aunque algun hende ta considera realizacion di tal bendicion mucho bon pa ser e berdad, esei no ta mucho bon pa bini di man di nos amoroso Creador.—Salmo 145:16; Miqueas 4:4.

Naturalmente nos tin cu cumpli cu cierto requisito pa nos biba pa semper den e binidero tera paradísico. Jesús a mustra un requisito principal, bisando den oracion na Dios: “Esaki ta nifica bida eterna, nan logrando conocimento exacto di bo, e único Dios berdadero, i di esun cu bo a manda, Jesucristo.”—Juan 17:3.

Pues, si nos berdaderamente kier biba den e mundo nobo di Dios, nos tin cu siña promé e boluntad di Dios i cumpli cuné. Pasobra siguramente e “mundo ta pasando forbij i també su deseo, pero ken cu ta haci e boluntad di Dios ta permanece pa semper,” pa disfruta pa eternidad di bendicion cu nos amoroso Creador lo basha riba nos.—1 Juan 2:17.

Amenos cu tin otro indicacion, tur texto bíblico ta dje Traduccion di Mundo Nobo di Scritura Santo.