Capítulo 1
Pakico leza e Bijbel?
Nos ta biba den un mundo cu tin demasiado problema i mashá poco solucion. Miles di miyones di hende ta víctima constante di hamber. Un cantidad aumentante ta adicto na droga. Cada bez mas famía ta kibra. Incesto i violencia den famía ta mencioná constantemente den noticia. E aire cu nos ta respirá i e awa cu nos ta bebe ta ser venená poco poco. Mientras tanto, cada bez mas hende ta bira víctima di crimen. Bo ta kere cu lo tin solucion pronto pa problema asina?
1. (Inclui introduccion.) Menciona problema djawe cu ta mustra cu hende tin mester di un guía.
ADEMAS, nos ta biba den un era di decision difícil. Por ehempel, hopi hende ta redondamente contra aborto i ta yamé asesinato di yiu cu no a nace. Otronan tin opinion firme di cu hende muher tin autoridad riba nan mes curpa i mester decidi tal asunto pa nan mes. Hopi hende ta considera homosexualidad, adulterio, i relacion sexual sin casa como inmoralidad grosero. Otro hende ta kere cu tal práctica ta un asunto di decision personal. Ken por bisa cua tin razón i cua no tin?
2, 3. Con hopi hende djawe ta considera e Bijbel?
2 E Bijbel ta ofrece guía den asunto di moralidad, i ta duna solucion efectivo pa problema di crimen, hamber, i contaminacion. Pero, tin un dificultad: casi ningun hende djawor ta considera e Bijbel como un autoridad den tal asunto. Tabatin un tempo ora hende a scucha e Bijbel cu respet—por lo menos den Occidente. Aunque hende a skirbi e Bijbel, na antes e mayoría di cristiandad a acepté como e Palabra di Dios i a kere cu Dios mes a inspira su contenido.
3 Sin embargo, awendia ta común pa hende keda dudoso tocante tur cos: costumber, idea, moralidad, i asta existencia di Dios. Specialmente, hende ta duda e balor dje Bijbel. Ta parce cu e mayoría ta considera e Bijbel como ouderwets i no ta aplica awe. Poco hende intelectual djawe ta considera e Bijbel como e Palabra di Dios. Casi tur hende mas bien ta di acuerdo cu escolástico James Barr, cu a skirbi: “Segun mi, e formacion di tradicion bíblico ta e relato di un obra humano. E ta un declaracion humano di nan kerimento.”1
4, 5. Pakico ta vital pa nos sa si Dios a inspira e Bijbel of no? Ki propósito e buki aki tini?
4 Esei ta bo opinion? Bo ta kere cu e Bijbel ta e Palabra di Dios of e palabra di hende? Sea loke sea bo contesta pe pregunta, considera lo sigiente: Si e Bijbel ta simplemente e palabra di hende, anto lógicamente no tin solucion claro pa problema humano. Hende simplemente tin cu lucha lo mihor cu nan por cu e speranza di evita di algun manera exterminacion di nan mes cu contaminacion of cu gera nuclear. Pero si e Bijbel tá e Palabra di Dios, e ta net loke nos mesté pa sobrebiba e tempo dificultoso aki.
5 E buki aki ta presentá evidencia di cu e Bijbel realmente ta e Palabra di Dios. I e speranza di publicador di dje ta cu despues cu bo considera e evidencia, lo bo sa cu e Bijbel ta contene e único solucion válido pa problema di hende. Pero, promé, nos kier hala bo atencion na algun echo cu, di nan mes, ta haci e Bijbel merece bo consideracion.
Semper di mayor benta
6, 7. Cua echo notable tocante e Bijbel ta exigi nos atencion?
6 Pa cuminza, e Bijbel semper ta e buki di mayor benta i mas plamá den mundo. Segun edicion di 1988 di campeón di mundo Guinness Book of World Records, nan ta calcula cu nan a druk 2.500.000.000 Bijbel entre 1815 i 1975. Esei ta un cantidad enorme. Ningun otro buki cu a existi sikiera ta yega cerca e cantidad di Bijbel cu tin.
7 Además, ningun otro buki a ser traducí na tanto idioma. Awor hende por leza e Bijbel completo of parti di dje na mas cu 1.800 diferente idioma. Segun e Sociedad Bíblica Americana e Bijbel ta disponibel pa 98 porciento di poblacion dje planeta. Imaginábo e enorme esfuerzo necesario pa produci tanto traduccion! Cua otro buki a recibi tanto atencion?
Un buki cu influencia
8, 9. Menciona algun expresion di hende cu ta mustra influencia cu e Bijbel ta eherce.
8 The New Encyclopœdia Britannica ta yama e Bijbel “probablemente e coleccion di buki cu mas influencia den existencia humano.”2 Heinrich Heine, poëta alemán di siglo 19 a admiti: “Mi ta bisa senciyamente cu mi ta debe mi iluminacion na lezamento di un buki . . . e Bijbel. Nan ta yamé hustamente e Santa Scritura. Ken cu a perde nan Dios por bolbe hayé den e buki ei.”3 Durante e mesun siglo, William H. Seward, opositor di sclabitud, a bisa: “Tur e speranza di progreso humano ta depende dje influencia semper aumentante dje Bijbel.”4
9 Abraham Lincoln, presidente número 16 di América, a yama e Bijbel “e mihor don cu Dios hamás a duna hende . . . Sin é, nos no por sa loke ta bon i loke ta malu.”5 E hurista inglés Sir William Blackstone a enfatiza e influencia dje Bijbel ora el a bisa: “Tur ley humano ta depende dje dos fundeshi, e ley di naturaleza i e ley di revelacion [e Bijbel], es decir, ningun ley humano mester ta permiti di contradicínan.”6
Odiá i stimá
10. Con hende a expresa oposicion ne Bijbel?
10 Ne mesun tempo, nos tin cu tuma nota di cu ningun otro buki a ser atacá pa tanto oposicion cruel i asta odio den tur e pasado. Nan a montona Bijbel i a kímanan na público desde siglo 5 te siglo 20. I lezamento di Bijbel of plamamento di dje a recibi e castigo di multa i encarcelacion asta den siglo 20. Den siglo di pasado, tal “crimen” hopi bez a resulta den tortura i morto.
11, 12. Con Tyndale a demonstra su amor pe Bijbel?
11 Paralelo cu esei ta e debocion cu e Bijbel a inspirá. Hopi hende a perseverá den e lezamento di dje apesar di persecucion sin fin. Considera William Tyndale, un inglés di siglo 16 cu tabata educá den Universidad di Oxford i a bira un instructor respetá di Universidad di Cambridge.
12 Tyndale a stima e Bijbel. Pero, den su tempo autoridad religioso a insisti di mantenele den latín, un idioma morto. Pues, pa paisano di dje por lezé, Tyndale a determiná di traduci e Bijbel na inglés. Siendo cu e ley a prohibi esei, Tyndale tabatin cu bandona su puesto académico cómodo i hui na Europa. El a hiba e bida dificultoso di un refugiado pa suficiente tempo pe traduci e Scritura Griego (“Testament Nobo”) i algun dje Scritura Hebreo (“Testament Bieu”) na su lenga natal; pero finalmente nan a aresté, a declaré culpabel di herehía, i a choqué, i a kima su curpa.
13. Menciona un cos cu ta haci e Bijbel realmente único.
13 Tyndale ta solamente uno di un gran cantidad di hende cu a sacrifica tur cos pa nan por leza e Bijbel of hacié disponibel pa otronan. Ningun otro buki a inspira tanto hende homber i muher gewoon pa demonstra e máximo curashi asina. Dje manera ei, e Bijbel ta berdaderamente sin igual.
Afirmacion di ser e Palabra di Dios
14, 15. Kico skirbidor di Bijbel a afirma frecuentemente?
14 E Bijbel ta único també debí na afirmacion di tanto skirbidor di dje. Mas cu 40 homber, incluyendo rey, wardador di carné, piscador, ambtenaar, sacerdote, por lo menos un general, i un docter, a participa den e skirbimento di diferente parti di Bijbel. Pero bez tras bez, skirbidor a bisa mescos: cu nan no a skirbi nan mes pensamento sino e pensamento di Dios.
15 P’sei, nos ta leza hopi bez den e Bijbel expresion tal como lo sigiente: “E spiritu di Jehova ta loke a papia pa medio di mi, i su palabra tabata riba mi lenga” of, “Esaki ta loke e Señor Soberano, Jehova di ehército, a bisa.” (2 Samuel 23:2; Isaías 22:15) Den un carta cu apóstol Pablo a manda na un otro evangelizador, el a skirbi: “Tur Scritura ta inspirá di Dios i ta probechoso pa siñá, pa reprendé, pa rectificá cosnan, pa disipliná den husticia, pa hende di Dios por ta henteramente competente, completamente equipá pa tur bon obra.”—2 Timoteo 3:16, 17.
16. E Bijbel ta trata cu cua cuestion?
16 Di acuerdo cu e afirmacion di cu e ta e Palabra di Dios i no di hende, e Bijbel ta contesta pregunta cu Dios so por contestá. Por ehempel, e ta splica pakico gobierno humano no por establece paz permanente, con hende por haya e mayor satisfaccion den bida, i loke ta bini den futuro pe tera i pa humanidad riba dje. Awor, como un hende pensativo, probablemente bo a haci pregunta hopi bez tocante esei i otro cuestion similar. Pakico no considera por lo menos e posibilidad di cu e Bijbel ta e Palabra di Dios i p’sei ta e único buki cu por duna contesta autoritativo?
17, 18. (a) Menciona algun acusacion cu hende ta haci contra e Bijbel cu e buki aki ta contesta. (b) E ta trata cu cua otro tema?
17 Nos ta animábo pa examina cu sumo atencion evidencia presentá den e buki aki. Algun capítulo di dje ta trata cu crítica cu hende ta haci hopi bez contra e Bijbel. E Bijbel ta contra ciencia? E ta contradici su mes? E ta contene berdadero historia of leyenda so? Milagro cu e Bijbel ta menciona realmente a sosode? Tin evidencia lógico pa contestá tal pregunta. Sigientemente, e ta trata cu prueba fuerte di inspiracion divino dje Bijbel: profecía di dje, su sabiduría profundo, i efecto notable cu e tin riba e bida di hende. Finalmente, nos lo mira ki efecto e Bijbel por tene riba bo bida.
18 Sin embargo, nos lo considera promé con nos a haya e Bijbel. Asta e historia dje buki asombroso aki ta duna prueba cu e tin mas cu simplemente un origen humano.
[Plachi di henter página 4]
[Plachi na página 6]
E Bijbel tae buki di mas plamá i mas traducí cu tin den tur historia
[Plachi na página 9]
Segun cu e plachi aki grabá den palu den siglo 15 ta mustra, hopi hende tabata kimá bibo pe “crimen” di lezamento di Bijbel
[Plachi na página 11]
Skirbidor di Bijbel a afirmá cu nan tabata inspirá di Dios