Capítulo 28

Con mi por recobrámi di un enamoracion?

SEGUN un revista skirbí pa hovenan, “Pa casi tur hoven, enamoracion ta tanto común como grip.” Casi tur hoven ta experimenta enamoracion, i casi tur ta logra sobrebiba te cu nan ta bira grandi, cu nan orguyo i sintimento di humor intacto. Sin embargo, ora cu un enamoracion ta tenébo den su gara, tin poco den esei pa hari. Segun un hoven, “Mi a keda frustrá pasobra mi no por a haci nada tocante dje. Mi tabata sa cu e mucha muher tabata mucho bieu pa mi, pero mi a gusté. Mi realmente a keda den un mal estado tocante tur e cuenta.”

Profil di enamoracion

No ta picá pa tene sintimento fuerte pa un persona​—con tal cu bo sintimento no ta inmoral of incorrecto (tal como sintimento pa hende casá). (Proverbio 5:​15-18) Pero, ora bo ta hoven, “deseo incidental den hubentud” hopi bez ta domina bo pensamento i accion. (2 Timoteo 2:22) Siñando ainda pa domina deseo nobo i potente cu ta sosode den hubentud, hovenan por ta yen di sintimento romántico instigá​—i no tin manera pa expresánan.

Además, “mucha muher ta alcanza equilibrio i trankilidad social na un edad mas hoven cu mucha homber.” Como resultado, “hopi bez mucha muher ta haya cu mucha homber di scol ta falta madurez i no por excitánan manera meneer di scol” of otro homber di mas edad i inalcanzable. (Segun e revista Seventeen) P’sei, un mucha muher por imaginele cu un meneer favorito, un cantante popular, of un conocir di mas edad ta e homber “ideal.” Hopi bez mucha homber ta keda encantá asina. Pero, e amor cu nan ta sinti pa persona lehano asina claramente tin raíz mas tanto den fantasía en bez di realidad.

Pakico enamoracion por perhudica

Aunque mayor parti di enamoracion asina ta fayece lihé, toch nan por perhudica hovenan hopi. Entre otro cosnan, hopi enamorá di hovenan simplemente no ta bale la pena. Un homber sabí a bisa: “Co’i bobo a ser poní den hopi puesto halto.” (Eclesiastés 10:6) Asina hoven ta yega di adora un cantante pasobra nan tin boz suave of bon tipo. Pero nan moral ta merece elogio? Persona asina ta “den Señor” como un cristian dedicá?​—1 Corintio 7:39.

També e Bijbel ta adverti: “Amistad cu mundo ta enemistad cu Dios.” (Santiago 4:4) No ta pone bo amistad cu Dios den peliger si bo ta enamora na un persona kende su conducta Dios ta condena? Además, e Bijbel ta manda, “Warda boso di ídolo.” (1 Juan 5:21) Kico bo ta yama dornamento cu hovenan ta haci di muraya di nan camber cu portret di cantante? E palabra “idolatría” no ta apropiado? Con esei posiblemente por agrada Dios?

Algun hoven asta ta laga nan fantasía domina nan sano huicio. Un mucha muher a bisa: “Ora mi ta puntré con e ta sintié​—e semper ta nenga cu e tin sintimento pa mi. Pero mi por mira den su expresion di cara i actuacion cu esei no ta berdad.” E homber hoven cu e ta stima ta haci esfuerzo pa ser bondadoso expresando su falta di interés den e mucha muher, pero e simplemente no kier acepta esei.

Un otro mucha muher a skirbi tocante su enamoracion cu un cantante popular: ‘Mi kier pe enamora di mi, i mi a pidi den oracion pa esei sosode! Mi tabata drumi cu su album pasobra mi no por a yega mas cerca dje. Mi ta ne punto cu si mi no por hayé, lo mi mata mi mes.’ Tal pasion irrazonabel por agrada Dios, cu ta mándanos sirbié cu “sano huicio”?​—Romano 12:3.

Segun e Bijbel den Proverbio 13:12: “Anticipacion dilatá ta haci curazón malu.” Cultivacion di ‘anticipacion’ romántico pa un relacion imposibel, pues, ta insaludabel, i docter ta bisa cu enamoracion sin un enamorá ta un causa di “depresion, ansha, i afliccion general . . . perdimento di soño of cansancio, dolor di pecho of falta di rosea.” (Compara cu 2 Samuel 13:​1, 2.) Un mucha muher locamente enamorá a admiti: “Mi no por come. . . . Mi no por studia mas . . . . mi ta soña lantá tocante dje. . . . Mi ta miserabel.”

Corda, també, e prehuicio cu bo ta causa ora bo ta laga fantasía domina bo bida. Dr. Lawrence Bauman a bisa cu un evidencia pronto di enamoracion fuera di control ta “flohamento di esfuerzo den scol.” També, isolacion for di amigo i famía ta un resultado común. També por tin humiliacion. Autor Gil Schwartz a bisa: “Mi ta sinti bergüenza di admiti esei, pero mi a actua manera un idiota durante mi enamoracion cu Judit.” Hopi tempo despues cu e enamoracion ta pasa, e memoria ta keda den bo cabez di a sigi tras di un hende, causando spectáculo den público, i en general haciendo co’i bobo.

Enfrentando e realidad

Rey Salomón, un homber di mas sabí cu a yega di biba, a enamorá desesperadamente di un mucha muher cu no a stimé bek. El a basha riba e mucha muher algun dje poesía di mas bonita hamás skirbí, bisando cu e tabata “bonita mescos cu luna yen, puro manera e solo relumbrante”​—pero no a logra absolutamente nada cuné!​—Cantar de cantares 6:10.

No obstante, despues Salomón a bandona su esfuerzo pa gané. Con abo, també, por bolbe domina bo sintimento? “Ken cu ta confia den su mes curazón ta stúpido,” segun e Bijbel. (Proverbio 28:26) Esei ta specialmente cierto ora cu fantasía romántico ta dominábo. Sin embargo, “ken cu ta camna den sabiduría ta esun cu lo scapa.” Esei kier men mira cosnan manera nan tá.

“Con bo por distingi speranza legítimo for di speranza sin fundeshi?” ta loke Dr. Howard Halpern a puntra. “Door di considera cuidadosa i obhetivamente e echonan.” Considera: Cuanto oportunidad tin pe desaroyo di un berdadero romance cu e persona? Si e persona ta un strea, probablemente bo ni sikiera lo contra cu tal hende nunca! Tal posibilidad ta igualmente swak ora bo ta enamora cu hende di mas edad, tal como maestro di scol.

Además, e persona cu bo ta gusta te awor a mustra algun interés cualkiera den bo? Si no, bo tin un berdadero motibo pa kere cu cosnan lo cambia den futuro? Of bo simplemente ta leza interés romántico den palabra i accion inocente di su parti, sea cu ta homber of muher? Incidentalmente, den casi tur país e costumber ta pa homber tuma iniciativa den romance. Mucha muher por humiya nan mes sigiendo agresivamente tras di homber cu simplemente no ta interesá den dje.

Además, kico lo bo haci si e persona realmente a enamorele di bo? Bo ta cla pe responsabilidad di casamento? Si no, anto “kita shagrinamento for di bo curazón” nengando di pensa riba fantasía. Tin ‘un tempo pa enamoracion,’ i esei por ta hopi aña despues ora bo ta mas bieu.​—Eclesiastés 3:8; 11:10.

Analiza bo sintimento

Dr. Charles Zastrow a bisa: “Enamoracion loco ta sosode ora hende ta idealizá e persona di ken nan ta enamorá asina como ‘e amante perfecto’; esta, ta conclui cu e otro persona tin tur característica cu e ta deseá den un casá.” Sin embargo, ningun “amante perfecto” asina ta existi. “Pasobra tur a peca i no ta alcanza e gloria di Dios,” segun e Bijbel.​—Romano 3:23.

Pues, puntra bo mes, Ki bon mi realmente ta conoce e persona di locual mi a enamora? Mi ta enamora di un imagen? Mi ta ciega mi mes pa defecto dje persona? Un solo bista obhetivo di e amante di bo soño por sacábo for di bo soño romántico! També ta útil pa analiza e clase di amor cu bo ta sinti pe persona. Segun autor Kathy McCoy: “Enamoracion inmaturo por bini i bai den un momento . . . bo atencion ta dirigí na bo mes, i bo simplemente ta enamora cu e idea di cu bo ta enamorá . . . Enamoracion inmaturo ta pega, ta domina, i ta jaluz. . . . Enamoracion inmaturo ta exigi perfeccion.”​—Compara cu 1 Corintio 13:​4, 5.

Eliminé for di bo mente

Admitidamente, tur razonamento den mundo no ta elimina henteramente con bo ta sintíbo. Pero bo por evita di cultiva e sintimento. Lezamento di novela romántico apasioná, wakmento di novela romántico na TV, of simplemente scuchamento di cierto sorto di música por empeora bo sintimento di soledad. Pues, nenga di pensa riba tal situacion. “Unda cu no tin palu e candela ta paga.”​—Proverbio 26:20.

Fantasía di romance no ta sustituto pa hende cu realmente ta stimábo i ta interesá den bo. No ‘isola bo mes.’ (Proverbio 18:1) Probablemente bo por haya cu bo mayornan por yudábo hopi. Apesar di tur bo esfuerzo pa sconde bo sintimento, probablemente nan a ripara caba cu algo ta faltábo. Pakico no acudi na nan i deshogábo. (Compara cu Proverbio 23:26) Cristian maduro també por resulta di ser bon scuchador.

“Keda ocupá,” ta e conseho també di autor tiener Esther Davidowitz. Cuminza un hobby, haci ehercicio, studia un idioma, cuminza un proyecto di investigacion bíblico. Keda ocupá den actividad útil i esei por suaviza e dolor di desenamoracion basta hopi.

Recobramento for di un enamoracion no ta fácil. Pero cu e pasamento di tempo, e dolor lo mengua. Bo por a siña hopi cos tocante bo mes i bo sintimento, i lo bo ser mihor prepará pa trata cu berdadero enamoracion si esei ta bini den futuro! Pero, con bo por reconoce “berdadero enamoracion”?

Pregunta pa consideracion Capítulo 28

◻ Pakico enamoracion ta común den hovenan?

◻ Ken hopi bez ta persona di fantasía romántico di hovenan, i pakico?

◻ Pakico enamoracion por perhudica?

◻ Menciona algun cos cu hovenan por haci pa recobránan di enamoracion.

◻ Con hovenan por evita di cultiva fantasía romántico?

[Komentario na página 223]

‘Mi no por come. Mi no por studia mas. Mi ta soña lantá tocante dje. Mi ta miserabel’

[Plachi na página 220]

Enamoracion di hende dje otro sexo di mas edad i indisponibel ta basta común

[Plachi na página 221]

Tiramento di un bista calmo i obhetivo na tal persona por curábo di bo ideanan romántico