Capítulo 39

Con mi por yega cerca Dios?

CERCA Dios? Pa hopi hende, Dios ta parce di ser e ‘Promé Causa’ impersonal, un persona remoto i leu. Pues, e idea di yega cerca dje por molestiábo, of asta spantábo.

Anto també, bo experencia por parce esei di un jufrow yamá Linda. Mayornan cristian a cria Linda i e ta corda: “Durante tur e añanan [di mi hubentud], rara bez mi a perde un reunion cristian, i mi nunca a laga un luna pasa sin participa den e trabao di predica, pero mi nunca a desaroya un relacion personal íntimo cu Jehova Dios.”

Sin embargo, bo futuro mes ta depende di si bo ta hala cerca Dios. Jesucristo a bisa: “Esaki ta nifica bida eterna, nan logrando conocimento di bo, e único Dios berdadero.” (Juan 17:3) Tal “conocimento” ta encerra mas cu e capacidad di siña of repiti datos​—hende sin Dios por haci esei. Esei ta enbolbe cultivacion di un relacion cu Dios, birando amigo di dje. (Compara cu Santiago 2:23.) Leu di ser inacercable, Dios ta invitános pa “busca . . . i realmente hayé,” pasobra “e no ta leu for di cada un di nos.”​—Echo 17:27.

Con bo por yega di conoce Dios

Bo nunca a wak strea leu, a scucha cu asombro e bramamento di lamá, a keda encantá cu zwefmento bonita di barbulet, of a straña ne boniteza delicado di foyo fini? Tur obra di Dios asina ta duna solamente un bistazo di su poder inmenso, su sabiduría i amor. “Calidad invisible” di Dios “ta ser mirá den e cosnan trahá, asta su poder eterno i divinidad.”​—Romano 1:​19, 20.

Sin embargo, bo tin cu sa mas tocante Dios cu loke e creacion so por revela. P’sei, Dios a percura su Palabra skirbí. E buki ei ta revela Dios di ser, no un persona sin nomber of un forza impersonal, sino di ser un berdadero Persona cu un nomber. E salmista a bisa cu “Boso tin cu sa cu Jehova ta Dios.” (Salmo 100:3) E Bijbel ta revela també cu e Persona cu tin e nomber Jehova “ta un Dios misericordioso i bondadoso, tardá pa rabia i abundante den bondad amoroso i berdad.” (Exodo 34:6) Registro en detaye dje Bijbel dje tratamento di Dios cu hende ta permitínos, en efecto, mira Dios na accion! Pues, lezamento di Bijbel ta un parti necesario di halamento cerca Dios.

Haci lezamento di Bijbel placentero

Admitidamente, e Bijbel ta un buki grandi pa leza. Hopi bez su tamaño mes ta spanta hovenan pa nan no lezé. També, algun hoven ta keha cu e Bijbel ta fastioso. Pero, e Bijbel ta e revelacion di Dios duná na hende. E ta bísanos con nos a yega di existi i unda nos ta bai. E ta splica exactamente loke nos tin cu haci pa biba pa semper den Paradijs riba tera. Di ki manera ta posibel pa esei ser fastioso? Claramente e Bijbel no ta fácil pa leza, i den dje tin “algun cosnan difícil pa comprende.” (2 Pedro 3:16) Pero lezamento di Bijbel no tin cu ser un trabao penoso.

E hoven yamá Marvín a menciona un manera práctica pa haci lezamento di Bijbel mas interesante, bisando: “Mi ta purba di imaginámi e situacion i pone mi mes den dje.” Por ehempel, considera e relato di Daniel capítulo 6. En bez di lezé inactivamente, purba di imaginábo cu bo ta Daniel mes. Bo a ser arrestá bao dje acusacion escandaloso di a reza na bo Dios. I duná cua castigo? Morto! Soldad persiano ta lastrábo cu brutalidad na bo kelder​—un cueba yená cu león hambrá.

Cu sonido manera temblor, nan ta hala un banda e piedra grandi cu a tapa e cueba. León den e cueba a saca bramamento cu ta haci bo curpa coge ril. Bo ta hala atrás spantá, soldad dje rey ta dominábo, ta tirábo den e cueba fatal i ta tapa e porta cu e piedra. I den e scuridad unda bo no por mira nada, bo ta sinti un bestia di lana pasa cerca bo . . .

Esei ta un relato fastioso? Apenas! Pero no lubida: Bo no ta lezé pa divertíbo. Purba di mira loke e relato ta siña tocante Jehova. Por ehempel, experencia di Daniel no ta demonstra cu Jehova ta permiti sirbidor di dje enfrenta prueba dificultoso?

També, purba di pone un ora pa leza cu regularidad. Sí, pakico no dedica 15 minut so pa dia na lezamento di Bijbel, bo por leza e Bijbel henter den un aña! ‘Cumpra tempo,’ es decir, kita tempo for di otro actividad menos importante​—tal como wakmento di TV. (Efesio 5:16) Mientras cu bo ta aplica bo mes na lezamento di Bijbel, bo tin cu sintíbo mas cerca Dios cu nunca.​—Proverbio 2:​1, 5.

Oracion ta halábo mas cerca Dios

Un hovencita yamá Laverne a bisa: “Ta difícil pa bisa cu bo realmente tin un relacion personal cu un persona si bo no ta papia cuné.” Como e “Scuchador di oracion,” Jehova ta invitános pa papia cuné. (Salmo 65:2) Si nos ta haci oracion na dje cu fe, “no ta importa loke nos ta pidi conforme cu su boluntad, e ta téndenos.”​—1 Juan 5:14.

Linda (cu nos a menciona caba) a siña esei for di experencia personal. E ta corda cu na un cierto punto den su bida, ora problema i tension tabata aumenta, el a ‘haci oracion continuamente pa hopi dia pidiendo solucion pa su problema.’ Aunque Dios a parce tanto leu na antes, el a cuminza parce cerca dje ora el a haya e fortaleza pa enfrenta su dificultad. Un otro hovencita yamá Catarina, di igual manera a siña e balor di oracion: “Tin bez cu bo simplemente kier expresa bo sintimento interno na un persona, i no tin ningun mihor cu Jehova pa bo expresánan na dje pasobra Jehova ta comprende, i bo sa cu e ta e único cu realmente por yudábo.”

Pero oracion simplemente ta dunábo alivio emocional? No, Santiago 1:​2-5 ta dúnanos e siguranza di cu ora varios prueba ta enfrentános, nos mester “sigi pidi Dios, pasobra e ta duna generosamente na tur i sin haci reproche; i lo e ser duná na dje.” Kizás Dios no ta percura escape for dje prueba, pero e ta garantizános e sabiduría pa enfrenta e prueba! E por hácibo corda principio bíblico cu ta trata cu e asunto. (Compara cu Juan 14:26.) Of e por percura pa cierto asunto ser halá na bo atencion mediante bo estudio personal di Bijbel of na reunion cristian. I no lubida, “lo e no lagábo ser tentá mas ayá cu loke bo por wanta, sino . . . també lo e habri camina di escape.” Sí, lo e no lagábo “sin yudanza.” (1 Corintio 10:13; 2 Corintio 4:9) Bo no por sintíbo mas cerca Dios despues di a experimenta su yudanza enfrentando un prueba?

Pero no haci oracion tocante problema personal so. Den su oracion modelo, Jesús a duna importancia primario ne santificacion dje nomber di Jehova, e binimento di su Reino, i e cumplimento di su boluntad. (Mateo 6:​9-13) “Súplica hunto cu agradicimento” també ta un ingrediente vital pa oracion.​—Filipense 4:6.

Pero, con ta para si bo simplemente ta haya cu rezamento ta dificultoso pa haci? Mencioná esei den oracion! Pidi Dios yudábo habri bo curazón dilanti dje. “Persevera den oracion,” i cu tempo bo por haya cu bo por papia libremente cu Jehova mescos cu bo ta papia cu amigo íntimo. (Romano 12:12) Segun e hovencita María: “Mi sa cu ki ora cu mi tin un problema, mi por acudi na Jehova pa haya guía i e lo yudámi.”

No ta necesario pa haci oracion na Dios usando idioma extravagante i pretensioso. Segun e salmista: “Drama boso curazón dilanti dje.” (Salmo 62:8) Duné di conoce bo sintimento, bo preocupacion. Pidi su yudanza pa bo trata cu bo debilidadnan. Pidié bendiciona bo famía i otro hende cristian. Pidi pordón ora bo ta haci fout. Gradicié tur dia pe don di bida. Ora oracion ta bira un parti di bo bida regularmente, esei por hibábo pa cera un relacion íntimo i feliz cu Jehova Dios.

Declara públicamente bo amistad cu Dios

Despues di a cuminza disfruta di un amistad cu Dios, bo no ta keda ansioso pa yuda otro hende alcanza tal relacion precioso també? Realmente, esei ta un requisito pa hende cu ta deseá di ser amigo di Dios, pa nan haci “declaracion público pa salbacion.”​—Romano 10:10.

Hopi hende ta cuminza door di comparti nan fe informalmente, den conbersacion cu compañé di scol, cu beciña, i cu miembro di famía. Mas tardi, nan ta compaña Testigo di Jehova den nan trabao di predica di “cas pa cas.” (Echo 5:42) Pero, pa algun hoven, tal trabao público ta un tropieza. Segun un hoven cristian: “Mi ta kere cu hopi hoven tin bergüenza di camna di cas pa cas. Nan tin miedu di loke nan amigonan lo pensa di nan.”

Pero, bo realmente ta aprecia e aprobacion di ken​—e aprobacion di otro hoven of e aprobacion di bo Amigo celestial, Jehova Dios? Bo mester laga miedu of bergüenza strobábo di gana salbacion? “Láganos tene firmemente e declaracion público di nos speranza sin vacila,” ta e conseho di apóstol Pablo. (Hebreo 10:23) I bo por haya cu, cu suficiente entrenamento i preparacion, bo por cuminza haya berdadero gozo den e trabao di predica!​—1 Pedro 3:15.

Ne debido tempo bo aprecio pa bo Amigo celestial por conmovébo pa haci un dedicacion sin reserva na Dios i simboliza esei cu bautismo bao di awa. (Romano 12:1; Mateo 28:​19, 20) E hacimento di un declaracion público pa bira un disípel bautizá di Cristo no ta algo di poco importancia. Esei ta enbolbe ‘nengamento di bo mes’​—halando un banda ambicion personal i buscando promé e interés di Jehova Dios. (Marco 8:34) Esei ta enbolbe també e identificacion di bo mes cu e organizacion mundial di Testigo di Jehova.

Un hoven yamá Robert a bisa cu “Mi ta kere cu hopi hovenan ta tarda pa bautiza. Nan tin miedu cu esei ta un paso final i cu nan no por hala atrás foi dje.” Ta cierto cu hende no por hala atrás for di dedicacion na Dios. (Compara cu Eclesiastés 5:4.) Pero “si hende sa con pa haci loke ta recto i toch no ta hacié, esei ta un picá pé”​—bautizá of no bautizá! (Santiago 4:17) Lo sigiente ta e cuestion: Bo ta aprecia e amistad di Dios? Bo ta wordu conmoví pa deseá di sirbié pa semper? Anto no laga miedu strobábo di proclama bo mes un amigo di Dios!

Beneficio eterno pa amigo di Dios!

Bo scogimento di Dios como amigo ta ponébo na oposicion cu tur e mundo. (Juan 15:19) Hende por tenébo di mofa. Dificultad, problema, i tentacion por atacábo. Pero no laga ni hende ni nada hortábo di bo relacion cu Dios. E ta priminti su apoyo sin falta, bisando: “Lo mi no lagábo di ningun manera ni di ningun manera bandonábo.”​—Hebreo 13:5.

E buki aki ta un solo evidencia dje interés cu Jehova Dios i su organizacion tin den bo bienestar eterno. I aunque no ta posibel pa trata cu tur pregunta i problema cu bo tin den e buki aki, siguramente bo por aprecia mas cu nunca ki un fuente inagotable di sabiduría e Bijbel tá! (2 Timoteo 3:​16, 17) Ora problema ta confundíbo, rista e buki sagrado. (Proverbio 2:​4, 5) Si bo tin mayornan temeroso di Dios, bo tin un otro fuente ainda di sabiduría spiritual i apoyo​—si bo solamente ta habri bo curazón pa nan.

Foral, corda cu Jehova Dios tin tur contesta. E ta “un yudanza cu ta ser hayá fácilmente durante afliccion,” i e por guiábo door di cualkier dificultad. (Salmo 46:1) Pues, ‘corda, awor, bo Gran Creador den e dianan di bo hubentud.’ (Eclesiastés 12:1) Esei ta e camina cu lo haci e curazón di Jehova alegra. (Proverbio 27:11) I esei ta e camina pa gana bida eterna den un Paradijs eterno​—e recompensa cu Dios tin pa hende cu ta su amigo.

Pregunta pa consideracion Capítulo 39

◻ Pakico ta importante pa bo tene un relacion estrecha cu Dios?

◻ Kico e Bijbel ta revela tocante Dios?

◻ Con bo por haci lezamento di Bijbel placentero i productivo?

◻ Kico hacimento di un “declaracion público” di bo fe ta encerra? Bo ta sintíbo conmoví pa haci esei? Pakico?

◻ Ki papel reunion ta hunga pa yudábo yega cerca Dios, i con bo por saca mayor probecho foi nan?

◻ Menciona algun beneficio di ser amigo di Dios.

[Komentario na página 311]

Ta realmente posibel pa mi yega cerca Dios?

[Komentario na página 312]

E Bijbel ta e revelacion di Dios duná na hende. E ta bísanos con nos a yega di existi i unda nos ta bai

[Kuadro/Plachi na página 316, 317]

Reunion​—un yudanza pa yega cerca Dios

“Mi a haya cu asociacion estrecha cu otro hende cu ta stima Jehova ta yudámi keda cerca dje.” Esei ta loke un hoven di Nigeria a bisa. Testigo di Jehova ta haci arreglo pa tal tempo di asociacion den nan Salón di Reino local. (Hebreo 10:​23-25) Segun Anita di 16 aña di edad: “Mi a haya berdadero amiga den Salón di Reino.”

Sin embargo, tal reunion no ta simplemente celebracion social. Salón di Reino ta ofrece un curso di educacion bíblico, consistiendo di cinco reunion pa siman. E ta cubri hopi diferente tópico: entre otro cosnan ta consideracion di bida di famía, profecía bíblica, conducta, doctrina, i e ministerio cristian. Aunque tal reunion no ta drama teatral extravagante, nan ta ser presentá na moda interesante. Discurso i conbersacion di un grupo hopi bez ta incluí entrevista i demonstracion bibo. E Scol di Ministerio Teocrático ta specialmente sobresaliente pasobra e ta entrená miles di hende pa ser orador público efectivo.

Kizás bo ta asisti na reunion caba. Anto, haci esfuerzo pa saca mayor probecho foi nan. (1) Haci preparacion: “Mi a aparta tempo special pa studia buki cu nos ta usa den reunion,” segun Anita. Esei ta haci mas fácil pa bo (2) Participa: Como un hoven, Jesús a scucha activamente, a haci pregunta, i a duna contesta ora nan a trata cu asunto spiritual den e tempel. (Lucas 2:​46, 47) Abo també por ‘presta mas cu e atencion acostumbrá ne cosnan cu bo ta tende,’ skirbiendo nota pa bo mente no dwal. (Hebreo 2:1) Ora cu tin participacion di auditorio, participa dunando comentario.

Un otro sugerencia útil ta di (3) Usa loke bo ta siña: Comparti loke bo ta siña cu otro hende. Mas importante, aplica loke bo ta siña den bo bida diario, haciendo cambio unda cu ta necesario. Mustra cu e berdad ‘ta obrando den bo.’​—1 Tesalonicense 2:13.

Duna reunion prioridad. Si bo tin huiswerk extra, purba di hacié promé cu e reunion. Un hoven yamá Simeón a bisa: “Mi ta gusta conbersa despues di mitin i keda te na último. Pero ora mi tin huiswerk, mi ta bai cas un bez pa haci mi trabao.” Con cu bo ta decidi di haci, haci loke bo por pa asisti na reunion regularmente. Nan ta vital pa bo crecimento spiritual.

[Plachi na página 315]

Lezamento di Bijbel ta necesario pa desaroya amistad cu Dios

[Plachi na página 318]

“Mi sa cu ki ora cu mi tin un problema, mi por acudi na Jehova pa haya guía i e lo yudámi”