Capítulo 3

A nace esun cu a prepara e camina

ELISABET tabata casi cla pa duna luz. Pa tres luna caba María a keda cerca dje. Pero e tempo a yega awor pa María despidi i haci e biahe largu pa su cas na Nazaret. Den rond di seis luna e, també, tabatin cu duna luz.

Pronto despues cu María a bai, Elisabet a duna luz. Cuanto gozo tabatin ya cu e nacimento a sali bon i Elisabet i e yiu tabata den bon salud! Ora Elisabet a mustra su yiu na beciña i pariente, nan tur a alegra hunto cuné.

Segun e ley di Dios, ocho dia despues di nacimento di yiu homber den Israel, e tabatin cu circuncidá. Pe ocasion amigo i famía a bini pa haci bishita. Nan a bisa cu e mucha mester ta duná e nomber di su tata, Zacarías. Pero Elisabet a nenga. E dí, “No! e tin cu ser yamá Juan.” No lubida cu angel Gabriel a bisa cu esei ta e nomber cu mester ta duná ne mucha.

Sin embargo, nan amigonan tabata contra: “No tin ningun hende den boso famía cu tin e nomber ei.” Anto, usando seña, nan a puntra ki nomber e tata kier duna e yiu. Pidiendo un tabla di skirbi, Zacarías pe sorpresa di tur, a skirbi: “Su nomber ta Juan.”

Cu esei abla di Zacarías tabata restorá milagrosamente. Bo ta corda cu el a perde su abla ora e no a kere palabra dje angel cu a bisa cu Elisabet lo haya yiu. Wel, ora Zacarías a papia, tur hende dje becindario a keda asombrá i a puntra den nan mes: “Kico e mucha ei realmente lo bira?”

Awor Zacarías a yena cu spiritu santo, i a hubila: “Bendito sea Jehova e Dios di Israel, pasobra el a dirigi su atencion i a ehecuta liberacion di su pueblo. I el a lanta un cachu di salbacion pa nos den e cas di David su sirbidor.” E “cachu di salbacion,” naturalmente ta Señor Jesús, cu no a nace ainda. Segun Zacarías, pa medio di dje, Dios lo “dúnanos, despues di a ser librá for di man di enemigo, e privilegio di rindi sirbishi sagrado na dje sin miedu cu lealtad i husticia dilanti dje tur nos dianan.”

Anto Zacarías a profetiza tocante Juan, su yiu: “Pero en cuanto abo, mucha, lo bo ser yamá profeta dje Haltísimo, pasobra lo bo bai dilanti di Jehova pa prepara su camina, pa duna conocimento di salbacion na su pueblo, pordonando nan picá, debí ne tierna compasion di nos Dios. Cu tal compasion un manecé lo bishitános di haltura, pa ilumina hende sintá den scuridad i den sombra di morto, pa dirigi nos pianan prósperamente den e camina di paz.”

Ya caba, María, cu aparentemente tabata soltera ainda, a yega na su cas den Nazaret. Kico a sosode cuné ora a sali na cla cu e tabata na estado? Lucas 1:56-80; Levítico 12:2, 3.

▪ Juan tabatin cuanto luna mas di edad cu Jesús?

▪ Kico a sosode ora Juan tabatin ocho dia di edad?

▪ Con Dios a dirigi su atencion na su pueblo?

▪ Tabata profetiza cu Juan lo haci ki trabao?