Capítulo 8

Escape for di un tirano

JOSE a lanta María foi soño pa duné e noticia urgente. E angel di Jehova a caba di presenta na José, bisando: “Lantábo, tuma e mucha i su mama i hui pa Egipto, i keda ei te cu mi bisábo; pasobra Herodes ta cla pa busca e mucha pa destruyé.”

Nan tres a haci nan escape un bez. I esei tabata net na ora pasobra Herodes a tende cu astrólogo a gañé i a sali for dje país. No lubida cu nan mester a informa Herodes ora nan a haya Jesús. Herodes a keda furioso. Pues, den un esfuerzo pa mata Jesús, el a duna ordu pa mata tur mucha homber den Betlehem i den su districto cu tabatin dos aña i pabao. El a funda su calculacion di su edad riba e informacion cu el a obtene promé for di astrólogo cu a bini di oriente.

E matamento di tur mucha homber chikito tabata algo horrible pa mira! Soldad di Herodes a forza drenta den un cas tras di otro. I ora nan a haya un yiu homber, nan a kité for di braza dje mama. Nos no tin ningun idea di cuanto mucha nan a mata, pero e yoramento i lamentacion di mama a cumpli cu e profecía bíblico di Jeremías, profeta di Dios.

Entretanto, José i su famía a yega sano i salbo den Egipto, i awor nan a keda biba ei. Pero un anochi e angel di Jehova a presentá dilanti José atrobé den un soño. E angel a bisé: “Lantábo, hiba e mucha i su mama i coge camina pe tera di Israel, pasobra esnan cu a busca alma dje mucha ta morto.” Pues, na cumplimento di un otro profecía bíblico cu ta bisa cu e Yiu di Dios lo ser yamá for di Egipto, e famía a bolbe pa nan tera.

Ta parce cu José tabatin intencion di establecele den Hudea, unda nan tabata biba den e pueblo di Betlehem promé cu nan a hui na Egipto. Pero el a tende cu Arquelao, e yiu malbado di Herodes, awor tabata rey di Hudea, i den un otro soño Jehova Dios a duné spiertamento dje peliger. P’sei José i su famía a bai mas nort i a establecénan den e pueblo di Nazaret den Galilea. Den e comunidad ei, leu for di centro di bida religioso di hudío, Jesús a crece. Mateo 2:13-23; Jeremías 31:15; Oseas 11:1.

▪ Ora astrólogo no a bolbe, kico terribel rey Herodes a haci, pero con Jesús tabata protehá?

▪ Ora nan a bolbe for di Egipto, pakico José no a establecele di nobo den Betlehem?

▪ Cua profecía bíblico tabata cumplí durante e tempo ei?