Capítulo 17

Siñando Nicodemo

ORA Jesús a celebra pascu hudío di aña 30 EC, el a haci siñal of milagro notable. Como resultado, hopi hende a pone fe den dje. Nicodemo, un miembro dje Sanedrín, e corte halto di hudío, a keda impresioná i kier a siña mas. P’sei el a bishita Jesús durante scuridad djanochi, probablemente teniendo miedu di cu si hende miré, esei por a daña su nomber cu lider hudío.

El a bisa: “Rabí, nos sa cu abo como maestro a bini di Dios; pasobra ningun hende por haci siñal cu bo ta haci amenos cu Dios ta cu nan.” Contestando, Jesús a bisa Nicodemo cu pa hende drenta den e Reino di Dios, nan tin cu “nace di nobo.”

Pero, con hende por nace di nobo? Nicodemo a puntra, “Nan no por drenta den matriz di nan mama e segunda bez i nace, no ta berdad?”

No, esei no ta loke nacimento di nobo kier men. Jesús a splica, “Amenos cu hende nace di awa i di spiritu, nan no por drenta den e reino di Dios.” Ora Jesús a bautiza i spiritu santo a baha riba dje, asina el a nace “di awa i di spiritu.” Cu e declaracion di cielo ne tempo ei, ‘Esaki ta mi Yiu cu mi a aprobá,’ Dios a anuncia cu el a engendra un yiu spiritual teniendo e anticipacion di drenta den e Reino di Dios celestial. Despues, na Pentecoste di aña 33 EC, otro hende bautizá a recibi e spiritu santo i asina a nace di nobo como yiu spiritual di Dios.

Pero e papel dje Yiu humano special di Dios ta vital. Jesús a bisa Nicodemo, “Mescos cu Moisés a hiza e colebra den desierto, asina e Yiu di hende mester ta hizá, pa tur hende cu ta kere den dje por tene bida eterna.” Sí, mescos cu israelita cu colebra venenoso a morde tabatin cu loer ne colebra di coper pa ser salbá, asina tur hende tin cu eherce fe den e Yiu di Dios pa ser salbá for di nan estado muribundo.

Dunando énfasis ne papel amoroso di Jehova Dios den esei, Jesús a sigi bisa Nicodemo: “Dios a stima mundo asina tanto cu el a duna su Yiu unigénito, pa tur cu eherce fe den dje no sea destruí sino tene bida eterna.” Asina, den Jerusalem mes seis luna so despues di a cuminza su ministerio, Jesús a haci claro cu e ta e medio cu Jehova Dios ta usa pa salba humanidad.

Jesús a sigi splica na Nicodemo: “Pasobra Dios a manda su Yiu na mundo, no pe huzga mundo,” es decir, no pe huzga mundo desfavorablemente, of condené, sentenciando e raza humano na destruccion. Mas bien, segun Jesús, e tabata mandá “pa mundo wordu salbá pa medio di dje.”

Nicodemo, yen di miedu, a bishita Jesús den anochi pa hende no miré. Pues, ta interesante cu Jesús a conclui su conbersacion cuné, bisando: “Awor esaki ta e base dje huicio, cu luz [cu Jesús a personifica den su bida i siñamento] a bini na mundo pero hende a stima scuridad mas bien cu luz, pasobra nan obra ta malu. Pasobra ken cu ta practica cosnan baho ta odia e luz i no ta bini cerca e luz, pa nan obra no sea reprendí. Pero ken cu ta haci loke ta berdad ta bini cerca e luz, pa wordu sacá na cla cu nan obra ta hací na armonía cu Dios.” Juan 2:23–3:21; Mateo 3:16, 17; Echo 2:1-4; Número 21:9.

▪ Kico a haci Nicodemo bishita Jesús, i pakico el a bini den anochi?

▪ Kico kier men “nace di nobo”?

▪ Con Jesús a ilustra e papel cu e ta hunga den nos salbacion?

▪ Kico kier men cu Jesús no a bini pa huzga mundo?