Capítulo 18

Juan a mengua, Jesús a aumenta

DESPUES di pascu hudío di primavera di aña 30 EC, Jesús i su disípelnan a bandona Jerusalem. Sin embargo, nan no a bolbe pa nan cas den Galilea sino a bai den campo di Hudea unda nan a bautiza hende. Juan bautista a haci e mesun trabao pa rond di un aña caba, i ainda tabatin disípel asociá cuné.

Realmente, Jesús mes no a bautiza hende, ma su disípelnan a haci esei bao di su direccion. Nan bautismo tabatin e mesun nificacion cu e bautismo di Juan, ya cu esei tabata un símbolo di arrepentimento di hudío di picá contra e pacto di Ley di Dios. Pero, despues di su resureccion, Jesús a instrui su disípelnan pa bautiza hende cu un otro nificacion. Bautismo cristian djawe ta un símbolo di dedicacion di hende pa sirbi Jehova Dios.

Sin embargo, ne tempo ei cerca e principio dje ministerio di Jesús, tanto Juan como Jesús, aunque nan a traha separá, tabata siña i bautiza hende arrepentido. Pero disípel di Juan a bira jaluz i a keha na dje tocante Jesús: “Rabí, . . . mira, esei ta bautiza hende i nan tur ta bai cerca dje.”

En bez di bira jaluz, Juan a alegra cu e bon éxito di Jesús i també tabata kier pa su disípelnan alegra. El a hácinan corda: “Boso mes ta duna testimonio di cu mi a bisa, mi no ta Cristo, sino, mi a ser mandá dilanti di esei.” Anto el a usa un ilustracion bonita: “Esun cu tin bruid ta bruidegom. Sin embargo, amigo dje bruidegom, ora e tei i ta tendé, tin mashá gozo pa motibo dje boz dje bruidegom. P’sei e gozo cu mi tin a ser hací completo.”

Juan, como amigo dje Bruidegom, a alegra rond di seis luna promé ora el a introduci su disípelnan na Jesús. Cierto hende di nan a bira miembro prospectivo dje grupo di bruid celestial di Cristo componí di cristian ungí cu e spiritu. Juan a deseá pa su disípelnan actual també sigi Jesús, siendo cu su doel tabata pa prepara e camina pe ministerio exitoso di Cristo. Manera Juan bautista a splica: “Esei mester sigi aumenta, pero mi mester sigi mengua.”

Juan, un disípel nobo di Jesús, cu na antes també tabata un disípel di Juan bautista, a skirbi tocante e origen di Jesús i su papel importante den e salbacion di humanidad, bisando: “Esun cu ta bini di cielo ta mas halto cu tur e otronan. . . . E Tata ta stima e Yiu i a duna tur cos den su man. Esun cu ta eherce fe den e Yiu tin bida eterna; esun cu ta desobedece e Yiu lo no mira bida, sino e rabia di Dios ta permanece riba dje.”

No mucho tempo despues cu Juan bautista a papia riba e menguamento di su mes actividad, rey Herodes a arresta Juan. Herodes a tuma Herodías, esposa di Felipe su ruman, como su mes esposa, i ora Juan a saca na cla públicamente cu su accion tabata malu, Herodes a cera Juan den prisón. Ora Jesús a tende dje arresto di Juan, hunto cu su disípelnan el a bandona Hudea i a bai na Galilea. Juan 3:22–4:3; Echo 19:4; Mateo 28:19; 2 Corintio 11:2; Marco 1:14; 6:17-20.

▪ Ki nificacion e bautismo tabatin hací bao di direccion di Jesús promé cu su resureccion? I despues di su resureccion?

▪ Con Juan a mustra cu e keho di su disípelnan no tabata husto?

▪ Pakico Juan tabata cerá den prisón?