Capítulo 29

Hacimento di bon obra riba sabat

TABATA primavera di aña 31 EC. Algun luna a pasa desde cu Jesús a papia cu e señora cerca e poz den Samaria ora e tabata camna di Hudea pa Galilea.

Awor, despues di siña extensivamente den tur Galilea, Jesús a sali atrobé pa Hudea, unda el a predica den sinagoga. Compará cu e atencion cu e Bijbel ta presta na su ministerio den Galilea, e ta conta mashá poco dje actividad di Jesús den Hudea durante su bishita i durante e lunanan cu el a pasa ei despues dje pascu anterior. Ta parce cu hende no a responde tanto favorablemente na su ministerio den Hudea como nan a haci den Galilea.

Pronto Jesús tabata sigi su camina pa Jerusalem, e stad principal di Hudea, pa celebra pascu di aña 31 EC. Ei, cerca e porta di carné dje stad, tabatin un tanki yamá Betzata, unda hopi hende enfermo, ciegu, i coho a bini. Nan a kere cu hende por a haya curacion door di baha den awa dje tanki ora e tabata trublá.

Tabata dia di sabat, i Jesús a mira un homber cerca e tanki cu tabata enfermo pa 38 aña. Jesús, sabiendo dje duracion largu dje enfermedad dje homber, a puntré: “Bo kier haya bon salud?”

El a contesta Jesús: “Señor, no tin hende pa bahámi den e tanki ora e awa ta trublá; pero durante cu mi ta bai un otro hende ta baha promé cu mi.”

Jesús a bisé: “Lantábo, tuma bo cama i camna.” Anto un bez e curpa dje homber a bira bon, el a tuma su cama, i a cuminza camna!

Pero ora hudío a mira e homber, nan a bisa: “Ta sabat, i no ta legal pa bo hiba bo cama.”

E homber a contestánan: “Net esun cu a dunámi bon salud a bisámi, ‘Tuma bo cama i camna.’”

Nan a puntra: “Ken ta e homber cu a bisábo, ‘Tuma bo cama i camna’?” Jesús a apartá pa motibo dje multitud, i esun cu el a cura no a conoce Jesús pa nomber. Sin embargo, despues Jesús i e homber a topa den e tempel, i e homber a yega di conoce esun cu a curé.

Pues, e homber curá a haya e hudíonan pa bísanan cu Jesús tabata esun cu a duné bon salud. Ora nan a tende esei, e hudíonan a bai cerca Jesús. Pakico? Pa nan tende di ki manera e por a haci tal cosnan maraviyoso? No. Ma pa kehé pasobra e tabata haci tal bon cosnan riba dia di sabat. I nan a cuminza persigi Jesucristo! Lucas 4:44; Juan 5:1-16.

▪ Ta haci cuanto tempo cu Jesús a bishita Hudea pe último bez?

▪ Pakico e tanki di Betzata tabata tanto popular?

▪ Ki milagro Jesús a haci cerca e tanki, i con hudío a reacciona?