Capítulo 31

Pikimento di grano riba sabat

PRONTO Jesús i su disípelnan a bandona Jerusalem pa bolbe na Galilea. Tabata na primavera, i den cunucu tabatin tapushi di grano na stengel. E disípelnan tabatin hamber. Pues, nan a piki tapushi di grano i a come. Pero, siendo cu tabata e dia di sabat, nan accion no tabata pasá por halto.

Lider religioso di Jerusalem a caba di busca Jesús pa mata pasobra nan a bisa cu el a viola sabat. Awor fariseo a haci un acusacion. Nan a acusa: “Mira! bo disípelnan ta haci loke no ta legal pa haci riba sabat.”

Fariseo a bisa cu pikimento di grano i fregamento di dje den man pa nan comé tabata cosechamento i separacion di grano for di bagaz. Pero nan interpretacion estricto di loke ta bira trabao a haci e sabat un carga pisá, mientras cu e propósito dje dia di sabat tabata pe ser un dia di gozo i di edificacion spiritual. P’sei, Jesús a desmentínan usando ehempel bíblico pa mustra cu e propósito di Jehova Dios nunca tabata pa un aplicacion demasiado estricto asina pa su ley di sabat.

Segun Jesús, ora David i su hombernan tabatin hamber, nan a pasa e tabernáculo i a come e pan di presentacion. Aunque e pan como sacrificio pa Jehova a wordu kitá caba i pan frescu tabata poní, generalmente e pan tabata reserbá pa sacerdote come. Pero, den tal circunstancia, David i su hombernan no tabata condená pa comimento di dje.

Dunando otro ehempel, Jesús a bisa: “Boso no a leza den e Ley cu riba dia di sabat, sacerdote den e tempel a trata e sabat como no sagrado i a continuá sin culpa?” Sí, asta riba dia di sabat sacerdote a mata bestia i a haci otro trabao den e tempel preparando bestia pa sacrificio! Pero, segun Jesús: “Mi ta bisa boso cu algo mayor cu e tempel ta aki.”

Dunando conseho na fariseo, Jesús a sigi: “Si boso a comprende loke esaki kier men, ‘Mi kier misericordia, i no sacrificio,’ boso lo no a condena hende sin culpa.” Anto Jesús a conclui: “Pasobra e Yiu di hende ta Señor di sabat.” Kico Jesús kier men cu esei? Jesús tabata referi ne gobernacion di paz di su Reino di mil aña.

Pa 6.000 aña caba humanidad a sufri di esclabitud pisá bao di Satanás e Diabel, cu violencia i gera como algo rutinario. En cambio, e gran gobernacion di Cristo cu e sabat a simboliza lo ser un tempo di descanso for di tur sufrimento i opresion asina. Mateo 12:1-8; Levítico 24:5-9; 1 Samuel 21:1-6; Número 28:9; Oseas 6:6.

▪ Cua acusacion tabata hací contra disípel di Jesús, i con Jesús a contesta?

▪ Jesús a identifica cua fayo di parti di fariseo?

▪ Di ki manera Jesús ta “Señor di sabat”?