Capítulo 34

Scogimento di su apóstolnan

A HACI rond di un aña i mei cu Juan bautista a introduci Jesús como e Lamchi di Dios i cu Jesús a cuminza su ministerio público. Ne tempo ei Andrés, Simón Pedro, Juan, i kizás Santiago (ruman di Juan), també Felipe i Natanael (també yamá Bartolomeo), a bira su promé disípelnan. Ne tempo ei, hopi otronan a uni cu nan den sigimento di Cristo.

Awor Jesús tabata cla pa scoge su apóstolnan. Eseinan tabatin cu ser socio íntimo di dje na ken el a duna entrenamento special. Pero promé cu el a scógenan, Jesús a subi den ceru i a pasa henter anochi den oracion, probablemente pidiendo sabiduría i bendicion di Dios. Su manece, el a yama su disípelnan i for di nan el a scoge e diesdosnan. Sin embargo, siendo cu nan a sigi como studiante di Jesús, nan ta ser yamá disípel toch.

Seis cu Jesús a scoge, mencioná anteriormente, ta esnan cu a bira su promé disípelnan. El a scoge Mateo també cu el a yama for di su oficina di belasting. E otro cinco cu el a scoge ta Hudas (també yamá Tadeo), Hudas Iscariote, Simeón e cananeo, Tomás, i Santiago yiu di Alfeo. Santiago ei també tabata yamá Santiago e Menor, kizás pa motibo cu e tabata mas cortico físicamente of menor di edad cu e otro apóstol Santiago.

Ya caba e diesdosnan tabata cu Jesús pa basta tempo, i Jesús a conocénan bon. Realmente, varios di nan tabata di su mes famía, Santiago i su ruman Juan evidentemente tabata primo di Jesús. I probablemente Alfeo tabata ruman di José, e tata di crianza di Jesús. P’sei, e yiu di Alfeo, esta, apóstol Santiago, també tabata primo di Jesús.

Naturalmente, Jesús no tabatin problema di corda e nomber di su apóstolnan. Pero, bo por córdanan? Wel, simplemente corda cu tabatin dos yamá Simón, dos yamá Santiago, i dos yamá Hudas, i cu Simón tabatin un ruman yamá Andrés, i cu Santiago tabatin un ruman yamá Juan. Esei ta clave pa corda ocho apóstol. E otro cuater a inclui un cobrador di belasting (Mateo), esun cu despues a bira dudoso (Tomás), i esun cu Jesús a yama ora e tabata bao di palu (Natanael), i su amigo Felipe.

Diesun apóstol tabata di Galilea, e territorio natal di Jesús. Natanael tabata di Caná. Felipe, Pedro, i Andrés originalmente tabata di Betsaida, pero despues Pedro i Andrés a bai biba den Capernaum unda ta parce cu Mateo a biba. Santiago i Juan tabata den e negoshi di piscamento i també probablemente a biba den Capernaum of cerca dje. Ta parce cu Hudas Iscariote, cu despues a traiciona Jesús, tabata e único apóstol di Hudea. Marco 3:13-19; Lucas 6:12-16.

▪ Cua apóstolnan por a ser di famía di Jesús?

▪ Ken tabata apóstol di Jesús, i con bo por corda nan nomber?

▪ Di cua territorio e apóstolnan a bini?