Capítulo 95

Les tocante divorcio i amor pa yiu

JESÚS i su disípelnan tabata riba camina pa Jerusalem pa asisti ne pascu hudío di aña 33 EC. Nan a cruza e rio Jordan i a sigi e camina pasando den e districto di Perea. A haci poco siman so cu Jesús tabata den Perea, pero nan a yamé pa bini na Hudea pasobra su amigo Lázaro tabata malu. Ora e tabata den Perea, Jesús a papia cu fariseo tocante divorcio, i awor nan a menciona e asunto atrobé.

Fariseo tabatin varios idea tocante divorcio. Moisés a bisa cu muher por ta divorciá debí na “algo indecente di su parti.” Algun a kere cu esei a referi solamente na infidelidad. Pero otronan a kere cu “algo indecente” a inclui ofensa mashá chikito. Pues, pa pone Jesús na prueba, fariseo a puntra: “Ta legal pa homber divorciá nan casá pa tur sorto di motibo?” Nan a keda sigur cu cualkier contesta cu Jesús a duna por hinqué den dificultad cu fariseo cu tabatin otro opinion.

Jesús a contesta e pregunta ábilmente, sin depende riba opinion humano, sino a referi ne propósito original di matrimonio. El a puntra: “Boso no a leza cu esun cu a créanan desde principio a tráhanan macho i hembra i a bisa, ‘P’sei homber lo bandona nan tata i nan mama i lo pega na nan esposa, i nan dos lo ser un solo carni’? Di manera cu nan no ta dos mas, sino un solo carni. Pues, loke Dios a uni bao di yugo, ningun hende mag separa.”

Segun Jesús, e propósito original di Dios ta pa hende casá pega hunto, pa nan no divorciá. Si ta asina, segun fariseo, “pakico, anto, Moisés a conseha dunamento di certificado di despidida i divorciá di dje?”

Jesús a contesta: “Den bista di boso curazón duro, Moisés a permiti boso divorcia boso esposa, pero esei no tabata e caso desde principio.” Sí, ora Dios a establece e berdadero norma pa casamento den e hofi di Eden, e no a haci percuracion pa divorcio.

Jesús a sigi bisa fariseo: “Mi ta bisa boso cu ken cu ta divorcia su esposa, si no ta pa motibo di fornicacion [griego, por·neiʹa], i ta casa cu otro ta comete adulterio.” Asina Jesús a mustra cu por·neiʹa, locual ta inmoralidad sexual grosero, ta e único motibo pa divorcio cu Dios ta aproba.

Tumando na cuenta cu casamento mester ta un union permanente cu un solo motibo pa divorcio, e disípelnan tabata conmoví pa bisa: “Si esei ta e situacion di homber cu nan esposa, no ta consehabel pa casa.” No cabe duda cu hende cu ta pensa di casa mester considera seriamente e permanencia di enlace matrimonial!

Jesús a sigi papia tocante soltería. El a splica cu algun mucha homber ta nace eunuco, siendo incapaz pa casa pasobra nan no ta desaroya sexualmente. Otronan ta ser hací eunuco, pasobra hende cruelmente ta incapacitánan sexualmente. Pa caba, algun ta domina nan deseo di casa i di disfruta di relacion sexual pa nan por dedicánan mas completamente na asunto relacioná cu e Reino di cielo. Jesús a conclui: “Laga ken cu por haci lugar pe [soltería] haci lugar pe.”

Awor hende a cuminza trece nan yiunan cerca Jesús. Pero, e disípelnan a scual e muchanan i a purba di córrenan, sin duda pa proteha Jesús di presion innecesario. Pero Jesús a bisa: “Laga e muchanan bini cerca mi; no purba di kítanan, pasobra e reino di Dios ta pertenece na hende asina. En berdad mi ta bisa boso, Ken cu no recibi e reino di Dios manera un mucha di ningun manera lo drenta den dje.”

Ki un les excelente Jesús a duna! Pa nos recibi e Reino di Dios, nos tin cu imita e humildad i e disposicion di siña di muchanan. Pero ehempel di Jesús també ta ilustra cu ta ki importante, specialmente pa mayornan, dedica tempo na nan yiunan. Awor Jesús a demonstra su amor pa muchanan, tumando nan den su braza i bendicionando nan. Mateo 19:1-15; Deuteronomio 24:1; Lucas 16:18; Marco 10:1-16; Lucas 18:15-17.

▪ Cua punto di bista distinto fariseo tabatin tocante divorcio, i p’sei, con nan a pone Jesús na prueba?

▪ Con Jesús a trata cu esfuerzo di fariseo pa poné na prueba, i cua solo motibo el a duna pa divorcio?

▪ Pakico disípel di Jesús a bisa cu no ta consehabel pa casa, i Jesús a duna cua recomendacion?

▪ Jesús a síñanos cua les ora el a recibi e muchanan?