Capítulo 102

E drentamento triunfal di Cristo den Jerusalem

SU manece, diadomingo, dia 9 di Nisán, Jesús a bandona Betania cu su disípelnan i a pasa riba e Ceru di Olijfi rumbo Jerusalem. Den poco tempo nan a yega cerca Betfagué, situá riba e Ceru di Olijfi. Jesús a bisa dos disípel di dje:

“Coge camina pe pueblo cu ta den boso bista, i un bez boso lo haya un burricu mará, i un yiu cuné; los nan i trécenan pa mi. I si un hende ta bisa boso cualkier cos, boso mester bisa, ‘Señor tin mester di nan.’ Cu esei lo e mándanan bai un bez.”

Aunque na principio e disípelnan no a mira cu su instruccion tabatin cu ber cu cumplimento di profecía bíblico, nan a yega di sa esei despues. Profeta Zacarías a profetiza cu e Rey cu Dios a priminti lo drenta den Jerusalem montá riba burricu, sí, “asta riba un bestia plenamente desaroyá, yiu di burricu yewa.” Di igual manera, Salomón a yega pa su ungimento montá riba yiu di burricu.

Ora e disípelnan a drenta den Betfagué i a tuma e burricu i su mama, algun hende pará ei a puntra: “Kico boso ta haci?” Ora nan a tende cu e bestia tabata pa Señor, e hendenan a laga e disípelnan híbanan pa Jesús. E disípelnan a pone nan paña exterior riba e burricu mama i riba e yiu, pero Jesús a monta e yiu.

Ora Jesús a bai den direccion di Jerusalem riba e burricu, e multitud a aumenta. E mayor parti di hende a habri nan paña exterior den camina, mientras cu otronan a corta rama di palu i a plámanan den camina. Nan a grita: “Bendito ta Esun cu ta bini como Rey den e nomber di Jehova! Paz den cielo, i gloria den e lugarnan di mas halto!”

Tal proclamacion a molestia algun fariseo den e multitud i nan a haci keho na Jesús: “Maestro, censura bo disípelnan.” Pero Jesús a contesta: “Mi ta bisa boso, Si eseinan ta keda ketu, e piedranan mes lo grita.”

Ora Jesús a yega cerca Jerusalem, el a tira bista riba e stad i a cuminza yora riba dje, bisando: “Si abo, asta abo, a distingi den e dia aki loke tin cu ber cu paz—pero awor nan a wordu scondí for di bo bista.” Jerusalem tabatin cu paga e prijs pa su desobedencia obstiná, manera Jesús a profetiza:

“Bo enemigonan [romano bao di general Tito] lo traha rond di bo un fortificacion di staca cu punta skerpi i lo cercábo i afligíbo di tur banda, i nan lo tirábo i bo yiunan den bo na suela, i nan lo no laga piedra riba piedra den bo.” E destruccion di Jerusalem cu Jesús a profetizá realmente a sosode 37 aña despues, na aña 70 EC.

Solamente un poco siman promé, hopi hende den e multitud a mira Jesús resusita Lázaro. Awor eseinan a sigi bisa otro tocante e milagro. Pues, ora Jesús a drenta Jerusalem, e stad henter a borota. Hende a puntra: “Ken ta esei?” I e multitud a sigi bisa: “Esei ta profeta Jesús, di Nazaret di Galilea!” Mirando loke tabata sosode, fariseo a lamenta cu nan tabata logra net nada, pasobra, manera nan a bisa: “E mundo a sigi tras di dje.”

Manera su costumber ora el a bishita Jerusalem, Jesús a bai ne tempel pa duna siñanza. Hende ciegu i coho a bini cerca dje ei, i el a cúranan! Ora sacerdote principal i scriba a mira e cosnan maraviyoso cu Jesús tabata haci i ora nan a tende mucha homber den e tempel grita, “Salba, nos ta pidi, e Yiu di David!” nan a rabia. Nan a protesta, “Bo ta tende loke nan ta bisa?”

Jesús a contesta cu “Sí. Boso nunca a leza esaki, ‘For di boca di mucha chikito i yiu di pecho bo a percura alabanza’?”

Jesús a sigi siña, i a wak rond riba tur cos den e tempel. Pronto tabata laat. Pues, el a sali, hunto cu e 12, i a bai rond di 3 kilometer of mas te na Betania. El a pasa diadomingo anochi ei, probablemente den e cas di su amigo Lázaro. Mateo 21:1-11, 14-17; Marco 11:1-11; Lucas 19:29-44; Juan 12:12-19; Zacarías 9:9.

▪ Na ki tempo i di ki manera Jesús a drenta Jerusalem como Rey?

▪ Tabata ki vital pe multitud alaba Jesús?

▪ Con Jesús a sintié ora el a tira un bista riba Jerusalem, i el a declara cua profecía?

▪ Kico a pasa ora Jesús a bai ne tempel?