Parti 9

Con Nos Sa Cu Nos Ta den “e Ultimo Dianan”

1, 2. Con nos por sa si nos ta den e último dianan of no?

CON nos por ta sigur cu nos ta bibando den e tempu ora Dios su Reino lo tuma accion contra e sistema actual di gobernacion humano aki? Con nos por sa cu nos ta masha cerca dje tempu ora Dios lo trece un fin na tur maldad i sufrimentu?

² E disipelnan di Jesucristo kier a sa e cosnan ei. Nan a puntr’é kico lo ta “e señal” di su presencia den poder di Reino i “dje conclusion dje sistema di cosnan.” (Mateo 24:3) Jesus a contestá dor di detayá suceso i condicionnan cu lo sagudí mundu, cu lo a combiná pa mustra cu humanidad a drenta “e tempu di fin,” “e último dianan” dje sistema di cosnan aki. (Daniel 11:40; 2 Timoteo 3:1) Nos den e siglo aki a mira e señal componí ei? Sí, nos a mir’é i na abundancia!

Gueranan Mundial

3, 4. Con e gueranan dje siglo aki ta cuadra cu e profecia di Jesus?

³ Jesus a profetisá cu ‘nacion lo lanta contra nacion i reino contra reino.’ (Mateo 24:7) Na aña 1914 e mundu a bira enbolbí den un guera cu a mobilisá nacion i reinonan den un manera cu tabata diferente for di cualkier guera promé cuné. Reconociendo e echo ei, historiadornan n’e tempu ei a yam’é e Guera Grandi. Esei tabata e promé guera di su sorto den historia, e promé guera mundial. Rond di 20.000.000 soldad i civil a perde nan bida, hopi mas cu den cualkier guera anterior.

⁴ Guera Mundial I a marca e principio dje último dianan. Jesus a bisa cu esaki i otro sucesonan lo tabata “un principio di dolor di angustia.” (Mateo 24:8) Esei a resultá berdad, ya cu Guera Mundial II tabata asta mas mortal, rond di 50.000.000 soldad i civil a perde nan bida. Den e siglo 20 aki, hopi mas cu 100.000.000 hende a ser matá den gueranan, mas cu cuater biaha mas tantu cu den e 400 aña anterior contá huntu! Ki un condenacion enorme di gobernacion humano!

Otro Evidencianan

5-7. Cua ta algun otro evidencia cu nos ta den e último dianan?

⁵ Jesus a incluí otro rasgonan cu lo a compañá e último dianan: “Lo tin temblornan grandi, i den un lugar tras di otro pest [epidemianan di enfermedad] i scarcedad di cuminda.” (Lucas 21:11) Esei ta cuadra bon cu sucesonan desde aña 1914, ya cu tabatin un aumento enorme den angustia for di tal calamidadnan.

⁶ Temblornan grandi ta sosodementunan regular, kitando hopi bida. E griep spañó so a mata rond di 20.000.000 hende despues di Guera Mundial I​—algun hende ta calculá rond di 30.000.000 of mas. AIDS a kita cientos di miles di bida i lo por kita miyones mas den e futuro cercano. Cada aña miyones di hende ta muri di enfermedad di curason, cancer i otro enfermedadnan. Miyones mas ta muri e morto lento di hamber. Sin ningun duda e ‘ginetenan di Apocalípsis’ cu nan guera, scarcedad di cuminda i epidemianan di enfermedad a bin ta reducí gran cantidad dje famia humano desde aña 1914.​—Revelacion 6:​3-8.

⁷ Jesus tambe a profetisá e aumento den crímen cu ta ser experenciá den tur pais. El a bisa: “Debí na e aumento di maldad e amor di mayor parti lo fria.”​—Mateo 24:12.

8. Con e profecia na 2 Timoteo capítulo 3 ta cuadra cu nos tempu?

⁸ Mas aleu, profecia bíblico a profetisá e caida moral cu ta asina evidente rond mundu awe: “Den e último dianan tempu crítico difícil pa trata cuné lo presentá. Pasobra hende lo ta stimador di nan mes, stimador di placa, halsá, arogante, blasfemador, desobediente na mayornan, malagradecí, desleal, sin cariño natural, no dispuesto pa ningun acuerdo, calumniador, sin dominio propio, feros, sin amor pa bondad, traidor, cabesura, hinchá cu orguyo, stimador di placer mas bien cu stimador di Dios, teniendo un forma di debocion piadoso pero resultando falsu na su poder . . . Mal hende i gañador lo bai di malu pa peor.” (2 Timoteo 3:​1-13) Tur esei a resultá berdad net dilanti nos bista.

Un Otro Factor

9. Kico a sosodé den cielu cu a coincidí cu e principio dje último dianan riba tera?

⁹ Tin un otro factor responsabel pa e aumento enorme di sufrimentu den e siglo aki. Pareu cu e principio dje último dianan na aña 1914, algu a sosodé cu a pone humanidad den peliger asta mas grandi. N’e tempu ei, manera un profecia den e último buki dje Bijbel ta relatá: “Guera a cuminsá den cielu: Miguel [Cristo den poder celestial] i su angelnan a combatí cu e dragon [Satanas], i e dragon i su angelnan [e demoñonan] a combatí pero e no a triunfá, tampoco no a haña un lugar mas pa nan den cielu. Pues e dragon grandi a wordu tirá abou, e colebra original, esun yamá Diabel i Satanas, cu ta gañando henter e tera habitá; el a wordu tirá abou n’e tera i su angelnan a wordu tirá abou huntu cuné.”​—Revelacion 12:​7-9.

10, 11. Con humanidad a ser afectá ora Satanas i su demoñonan tabata tirá abou na tera?

¹⁰ Kico tabata e consecuencianan pa e famia humano? E profecia ta sigui: “Ai dje tera i di laman, pasobra e Diabel a baha cerca boso, teniendo masha rabia, sabiendo cu e tin un poco tempu mas.” Sí, Satanas sa cu su sistema ta acercando su fin, pues e ta haciendo tur loke e por pa pone hende contra Dios promé cu e i su mundu ser kitá for di caminda. (Revelacion 12:12; 20:​1-3) Ki degradá e criaturanan spiritual ei ta pasobra nan a malusá nan boluntad liber! Ki condicionnan teribel tabatin riba tera bou di nan influencia, specialmente desde aña 1914!

¹¹ No ta nada straño anto cu Jesus a profetisá pa nos tempu: “Riba tera ansha dje nacionnan, no conociendo e salida . . . Hende ta desmayá di miedu i di anticipacion dje cosnan cu ta bini riba e tera habitá.”​—Lucas 21:25, 26.

Fin di Gobernacion di Hende i di Demoño Ta Cerca

12. Cua ta un dje último profecianan cu ta keda pa ser cumplí promé cu fin dje sistema aki?

¹² Cuantu profecia bíblico falta pa ser cumplí promé cu Dios destruí e sistema actual aki? Masha poco! Un dje últimonan ta na 1 Tesalonicense 5:​3, cu ta declará: “Mientras cu nan ta papiando di pas i siguridad, diripiente calamidad ta riba nan.” (The New Eng­lish Bible) Esaki ta mustra cu e fin dje sistema aki lo cuminsá “mientras cu nan ta papiando.” Inesperá pa e mundu, destruccion lo dal aden ora ménos nan a spera, ora e atencion di hende ta riba nan pas i siguridad sperá.

13, 14. Cua tempu di afliccion Jesus a profetisá i con esei lo terminá?

¹³ Tempu ta cabando pa e mundu aki bou di influencia di Satanas. Pronto lo e yega na su fin den un tempu di afliccion di cua Jesus a bisa: “Anto lo tin tribulacion grandi tal como no a sosodé desde principio di mundu te awor, nó, ni lo no sosodé atrobe.”​—Mateo 24:21.

¹⁴ E culminacion dje “tribulacion grandi” lo ta Dios su guera di Armagedon. Esei ta e tempu cu e profeta Daniel a papia di dje ora Dios lo “eliminá i pone un fin na tur e reinonan aki.” Esaki lo nificá fin di tur gobernacion humano actual independiente di Dios. Su gobernacion di Reino for di cielu e ora ei lo tuma control completo di tur asuntu humano. Daniel a profetisá, cu nunca mas autoridad di goberná lo ser lagá “pa cualkier otro pueblo.”​—Daniel 2:44; Revelacion 16:​14-16.

15. Kico lo sosodé cu e influencia di Satanas i su demoñonan?

¹⁵ Na e tempu ei tur influencia satánico i demoniaco tambe lo caba. E criaturanan spiritual rebelde ei lo ser kitá for di caminda asina cu nan no por “gaña e nacionnan mas.” (Revelacion 12:9; 20:​1-3) Nan a ser sentenciá na morto i ta spera destruccion. Ki un alivio esei lo ta pa humanidad pa ser liber di nan influencia degradante!

Ken Lo Sobrebibí? Ken Nó?

16-18. Ken lo sobrebibí e fin dje sistema aki i ken nó?

¹⁶ Ora Dios su huicionan ta ser ehecutá contra e mundu aki, ken lo sobrebibí? Ken nó? E Bijbel ta mustra cu esnan cu kier Dios su gobernacion lo ser protegá i lo sobrebibí. Esnan cu no kier Dios su gobernacion lo no ser protegá sino lo ser destruí huntu cu Satanas su mundu.

¹⁷ Proverbio 2:​21, 22 ta bisa: “Esnan recto [esnan cu ta someté nan na Dios su gobernacion] ta esnan cu lo biba riba e tera i esnan sin culpa ta esnan cu lo ser lagá riba dje. Encuanto esnan malbado [esnan cu no ta someté nan na Dios su gobernacion], nan lo ser cortá for dje tera mes; i encuanto esnan traicionero, nan lo ser rancá for di dje.”

¹⁸ Salmo 37:​10, 11 tambe ta bisa: “Solamente un poco tempu mas i e malbado lo no ta mas . . . Pero esnan mansu mes lo poseé e tera i nan en berdad lo haña nan deleite exkisito den e abundancia di pas.” Versículo 29 ta agregá: “Esnan hustu mes lo poseé e tera i nan lo biba pa semper riba dje.”

19. Cua conseho nos mester tuma na pechu?

¹⁹ Nos mester tuma na pechu e conseho di Salmo 37:​34, cu ta declará: “Spera den Jehova i warda su caminda i lo e halsá bo pa tuma posesion dje tera. Ora esnan malbado ta ser cortá, lo bo mir’é.” Versículo 37 i 38 ta bisa: “Vigilá esun sin culpa i tene esun recto na bista, pasobra e futuro dje hende ei lo ta pacífico. Pero violadornan di ley mes siguramente lo ser anikilá huntu; e futuro di hende malbado en berdad lo ser cortá.”

20. Pakico nos por bisa cu esaki ta tempu emocionante pa biba aden?

²⁰ Ki consolador, sí, ki alentador ta pa sa cu Dios realmente ta interesá i cu pronto lo e pone un fin na tur maldad i sufrimentu! Ki emocionante e ta pa realisá cu e cumplimentu dje glorioso profecianan ei ta dentro di poco tempu!

[Plachi na página 20]

E Bijbel a profetisá dje sucesonan cu lo forma “e señal” dje último dianan

[Plachi na página 22]

Pronto, na Armagedon, esnan cu no ta someté nan na Dios su gobernacion lo ser cortá. Esnan cu sí ta someté nan lo sobrebibí den un hustu mundu nobo