Consuelo pa Esnan Deprimí

“Tur creacion ta sigui keña huntu i siendo den dolor huntu te cu awor.” (Romano 8:22) Sufrimentu humano tabata grandi tempu cu esei a ser skirbí mas cu 1.900 aña pasá. Hopi hende tabata deprimí. P’esei, cristiannan a ser instá: “Papia cu consuelo na e almanan deprimí.”—1 Tesalonicense 5:14.

Awe, angustia humano ta asta mas grandi i mas hende cu nunca ta deprimí. Pero esei mester sorprendé nos? No realmente, pasobra Bijbel ta identificá e tempu aki como “e último dianan” i ta yama nan “tempunan crítico duru pa trata cuné.” (2 Timoteo 3:1-5) Jesucristo a profetisá cu durante e último dianan, lo tin “ansha dje nacionnan” i “hende [lo] desmayá di miedu i di anticipacion dje cosnan biniendo riba e tera habitá.”—Lucas 21:7-11, 25-27; Mateo 24:3-14.

Ora hende ta experenciá ansiedad, miedu, pena of cualkier otro di tal emocionnan negativo pa largu tempu, hopi bes nan ta bira deprimí. E causa di depresion of tristesa extremo por ta e morto di un ser kerí, un divorcio, perdementu di trabou of un malesa cu ta persistí. Hende tambe ta bira deprimí ora nan desaroyá un sentido di no ta bal nada, ora nan ta sinti cu nan ta un fracaso i a desapuntá tur hende. Cualkier persona por ser devastá dor di un situacion di hopi presion, pero ora un persona desaroyá un sintimentu di desesperacion i ta incapas pa mira un salida for di un situacion malu, esei por resultá den depresion severo.

Hende den tempu di antigua a experenciá sintimentunan similar. Job a sufri di malesa i di desgracia personal. El a sinti cu Dios a bandon’é, p’esei el a expresá un asco pa bida. (Job 10:1; 29:2, 4, 5) Jacob tabata deprimí debí n’e aparente morto di su yu homber, nengando di ser consolá i deseando pa muri. (Génesis 37:33-35) Sintiendo culpabel pa eror serio, Rey David a lamentá: “Henter dia mi a cana rond tristu. Mi a bira turdí.”—Salmo 38:6, 8; 2 Corintio 7:5, 6.

Awe, hopi hende a bira deprimí debí na a forsa nan mes di mas, tratando na sigui un rutina diario cu ta fuera di nan recurso mental, emocional i físico. Aparentemente tension, huntu cu pensamentu i emocionnan negativo, por afectá e curpa i contribuí na un desbalansa kímico den e celebro, asina produciendo depresion.—Compará cu Proverbio 14:30.

Yudansa Cu Nan Mester

Epafrodito, un cristian di promé siglo for di Filipo, a bira “deprimí pasobra [su amigunan] a tende cu el e bira malu.” Epafrodito, cu a bira malu despues di a ser mandá na Roma dor di su amigunan cu provision pa apostel Pablo, kisas a sinti cu el a desapuntá su amigunan i cu nan a consider’é un fracaso. (Filipense 2:25-27; 4:18) Con apostel Pablo a yuda?

El a manda Epafrodito cas cu un carta p’e amigunan filipense cu a bisa: “Duna [Epafrodito] e bon biní acustumbrá den Señor huntu cu tur goso; i sigui apreciá hende di e clase ei.” (Filipense 2:28-30) E echo cu Pablo a papia asina bon di dje i cu e filipensenan a dun’é un bon biní cu calor i cariño, siguramente mester a consolá Epafrodito i a yuda pa aliviá su depresion.

Sin duda, e conseho bíblico pa “papia cu consuelo na e almanan deprimí” ta esun di mas mihor. “Bo mester sa cu otronan ta interesá den bo como un persona,” un muher cu a sufri di depresion a bisa. “Bo mester tende un persona bisa, ‘Mi ta comprondé; lo bai bon cu bo.’”

E persona cu ta deprimí hopi bes mester tuma e iniciativa dor di busca un persona cu empatia den ken e por confia. E persona aki mester ta un bon scuchador i mester tin masha pacenshi. E mester evitá di reprendé e persona deprimí of haci declaracionnan cu ta husga, tal como, ‘Bo no mester sinti asina’ of ‘E actitud ei ta robes.’ E persona deprimí su emocionnan ta frágil i tal comentarionan crítico solamente lo lagu’é sinti peor encuanto su mes.

Un persona cu ta deprimí kisas ta sinti cu e no tin balor. (Jonás 4:3) Sin embargo, un persona mester corda cu loke realmente ta importante ta con Dios ta balorá un persona. Hende a considerá Jesucristo “como di ningun balor,” pero esaki no a cambia su berdadero balor pa Dios. (Isaías 53:3) Sea sigur cu, mescos cu Dios ta stima su Yu kerí, e ta stimá bo tambe.—Juan 3:16.

Jesus a sinti duele di esnan den angustia i a trata na yuda nan mira nan balor individual. (Mateo 9:36; 11:28-30; 14:14) El a splica cu Dios ta balorá asta mofi chikitu i insignificante. El a bisa “ni un di nan ta ser lubidá dilanti Dios.” Cuantu mas e ta balorá hende cu ta trata na haci su boluntad! Di e hendenan aki Jesus a bisa: “Asta tur cabei di boso cabes ta contá.”—Lucas 12:6, 7.

Berdad, lo por ta duru pa un persona cu ta severamente deprimí, cu ta aplastá cu su debilidad i faltanan, pa kere cu Dios ta balor’é asina haltu. Kisas e ta kere sigur cu e no ta digno di Dios su amor i interes. Dios su Palabra ta reconocé cu “nos curason por condená nos.” Pero esei ta e factor determinante? No e no ta. Dios ta realisá cu hende pecador por pensa negativamente i asta condená nan mes. Pues su Palabra ta consolá nan: “Dios ta mas grandi cu nos curason i sa tur cos.”—1 Juan 3:19, 20.

Sí, nos amoroso Tata celestial ta mira mas cu nos picá i erornan. E sa di circunstancianan suavisante, henter nos curso di bida, nos motibu i intencionnan. E sa cu nos a heredá picá, malesa i morto i p’esei tin limitacionnan grandi. E echo cu nos ta sinti fligí i molestiá cu nos mes riba su mes ta prueba cu nos no kier peca i nos no a bai demasiado leu. E Bijbel ta bisa cu nos tabata “sometí na banidad” contra nos boluntad. Pues Dios ta simpatisá cu nos condicion miserabel i cu compasion e ta tuma nos debilidadnan na consideracion.—Romano 5:12; 8:20.

Nos ta ser sigurá di cu “Jehova ta misericordioso i bondadoso.” “Mes leu cu salida di solo ta for di bahada di solo, asina leu for di nos el a pone nos ofensanan. Pasobra e mes sa masha bon con nos ta formá, cordando cu nos ta stof.” (Salmo 103:8, 12, 14) Berdaderamente, Jehova ta “e Dios di tur consuelo, cu ta consolá nos den tur nos tribulacion.”—2 Corintio 1:3, 4.

E yudansa cu esnan deprimí mester di dje mas tantu ta bini dor di hala cerca nan Dios misericordioso i aceptá su invitacion pa ‘tira nan carga riba dje.’ En berdad e por “rebibá e curason di esnan cu ta ser plechá.” (Salmo 55:22; Isaías 57:15) Pues Dios su Palabra ta animá oracion, bisando: “Tira tur bo ansiedad riba [Jehova], pasobra e ta interesá den bo.” (1 Pedro 5:7) Sí, mediante oracion i súplica personanan por hala cerca Dios i disfrutá “dje pas di Dios cu ta surpasá tur pensamentu.”—Filipense 4:6, 7; Salmo 16:8, 9.

Ahustenan práctico den estilo di bida tambe por yuda un persona vence un disposicion di ánimo deprimí. Ehercicio físico, comementu di cuminda saludabel, hañamentu di airu frescu i suficiente sosiegu i evitamentu di demasiado wakmentu di television tur ta importante. Un muher a yuda personanan deprimí dor di laga nan haci canamentu vigoroso. Ora un señora deprimí a bisa: “Mi no kier bai cana,” e muher suavemente pero firmemente a contestá: “Sí, bo ta bai.” E muher a informá: ‘Nos a cana seis kilometer. Ora nos a bolbe, e tabata cansá, pero e tabata sinti mas mihor. Bo no por kere con útil ehercicio vigoroso ta sino te ora cu bo purb’é.’

Sin embargo, tin biaha ta imposibel pa caba cu depresion completamente, asta ora tur cos a ser purbá, incluyendo terapianan médico. Un muher di edad medio a bisa, “Mi a purba tur cos, pero e depresion ta keda.” Di igual manera, awor hopi bes ta imposibel pa cura e ciegu, e surdu of e cohonan. Sin embargo, esnan deprimí por haña consuelo i speransa dor di lesamentu regular di Dios su Palabra, cua ta proveé e speransa sigur di alivio permanente for di tur dolor humano.—Romano 12:12; 15:4.

Ora cu Ningun Persona Lo Ta Deprimí Atrobe

Ora Jesus a describí e cosnan teribel cu lo bini riba e tera den e último dianan, el a agregá: “Ora e cosnan aki cuminsá sosodé, stret boso mes i hisa boso cabes na laira, pasobra boso liberacion ta yegando cerca.” (Lucas 21:28) Jesus tabata papiando tocante liberacion pa drenta den Dios su hustu mundu nobo, caminda “e creacion mes tambe lo ser librá di sclabitud na corupcion i tin e glorioso libertad dje yunan di Dios.”—Romano 8:21.

Ki un alivio lo e ta pa humanidad pa ser librá dje carganan di pasado i lanta cada dia cu mente liber di problema, ansioso pa abordá e actividad di dia! Ningun persona lo ser strobá mas dor dje nubia di depresion. E promesa sigur na humanidad ta cu Dios “lo seca tur lágrima for di nan wowo i lo no existí morto mas, ni yoramentu ni sclamamentu ni dolor lo no existí mas. E cosnan anterior a pasa forbij.”—Revelacion 21:3, 4.

Aménos cu tin otro indicacion, tur cita bíblico ta dje Traducción del Nuevo Mundo de las Santas Escrituras.