Capitulo 19
Ora e Conocimentu di Dios Ta Yena e Tera
1, 2. Con Jehova su creacion a yega di ser dañá?
SUPONE cu un pintor renombrá a caba di completá un pintura espléndido. Cu bon razon e ta consider’é di ta hopi bon—un obra maestro! Pero di un dia pa otro un rival yalurs ta desfigur’é. Ta di comprendé cu esaki ta causa e pintor gran dolor. Ki ansioso e ta pa mira e destructor cerá den prizon! I bo por imaginá cuantu e pintor ta anhelá pa tin su creacion restorá na su bunitesa anterior.
2 Manera e pintor ei, Jehova a crea un obra maestro preparando e tera i poniendo humanidad riba dje. Despues di a crea homber i muher, el a pronunciá tur su obra terenal “hopi bon.” (Génesis 1:31) Adam i Eva tabata Dios su propio yunan, i el a stima nan. El a visualisá un futuro felis i glorioso pa nan. Ta cierto, Satanas a hiba nan na rebelion, pero Dios su creacion maraviyoso no a ser dañá ireparablemente.—Génesis 3:23, 24; 6:11, 12.
3. Kico ta “e berdadero bida”?
3 Dios a determiná pa drecha asuntunan. E ta deseá masha tantu pa mira nos biba e manera cu e originalmente a proponé. Nos existencia corticu i trabahoso no ta “e berdadero bida,” pasobra e ta muchu mas inferior cu loke Jehova tin na mente. “E berdadero bida” cu Dios kier pa nos ta “bida eterno” bou di condicionnan perfecto.—1 Timoteo 6:12, 19.
4, 5. (a) Con e speransa di Paradijs lo ser realisá? (b) Pakico nos mester pensa riba nos speransa pa e futuro?
4 E conocimentu di Dios ta trece responsabilidad cuné dilanti Jehova. (Santiago 4:17) Pero pensa riba e bendicionnan cu lo bo disfrutá di dje si bo aplicá e conocimentu ei i forsa pa alcansá bida eterno. Den su Palabra, e Bijbel, Jehova Dios a dibuhá un cuadro bunita di e manera cu e bida ei lo ta den e Paradijs terenal cu ta asina cerca. Naturalmente, como pueblo di Jehova nos no ta sirbi Dios solamente pa motibu di un deseo pa un recompensa. Nos ta sirbi Dios pasobra nos stim’é. (Marco 12:29, 30) Ademas, nos no ta merecé bida dor di sirbi Jehova. Bida eterno ta un regalo di Dios. (Romanonan 6:23) Lo ta beneficioso pa nos meditá riba un bida asina pasobra e speransa di Paradijs ta recordá nos dje clase di Dios cu Jehova ta—e amoroso “recompensador di esnan cu ta busk’é sinceramente.” (Hebreonan 11:6) Un speransa cu ta masha real den nos mente i curason lo capacitá nos pa wanta tempu difícil den e mundu di Satanas.—Jeremías 23:20.
5 Laga nos enfocá nos atencion awor riba e speransa basá riba e Bijbel di bida eterno den e futuro Paradijs terenal. Con bida lo ta ora e conocimentu di Dios ta yena e tera?
DESPUES DI ARMAGEDON —UN PARADIJS TERENAL
6. Kico ta Armagedon, i kico lo e nificá pa humanidad?
6 Manera a ser mustrá promé, Jehova Dios pronto lo destruí e actual sistema di cosnan malbado. E mundu ta acercando rápidamente na loke e Bijbel ta yama HarMagedon, of Armagedon. E palabra ei por pone algun hende pensa riba un holocausto nuclear cu lo ser trecé dor di nacionnan cu ta den guera, pero Armagedon no ta nada di esei. Manera Revelacion 16:14-16 ta mustra, Armagedon ta “e guera dje gran dia di Dios e Todopoderoso.” E ta un guera enbolbiendo “e reynan di henter e tera habitá,” of e nacionnan. E Yu di Jehova Dios, e Rey nombrá, pronto lo drenta den e bataya di Armagedon. E resultado ta absolutamente sigur. Tur cu ta oponé e Reino di Dios i cu ta parti dje sistema malbado di Satanas lo ser eliminá. Solamente esnan leal na Jehova lo sobrebibí.—Revelacion 7:9, 14; 19:11-21.
7. Na unda Satanas i su demoñonan lo ta durante e Reinado di Mil Aña di Cristo, i con esaki lo beneficiá humanidad?
7 Imaginá cu abo a sobrebibí e cataclismo ei. Con bida lo ta riba tera den Dios su mundu nobo primintí? (2 Pedro 3:13) Nos no tin mester di speculá, pasobra e Bijbel ta bisa nos, i loke e ta bisa ta emocionante. Nos ta siña cu Satanas i su demoñonan lo ser hací inactivo, encarcelá den un abismo di inactividad durante e Reinado di Mil Aña di Jesucristo. E criaturanan malbado i malicioso ei lo no ta loer mas tras di esenario, fomentando problema i tratando na incitá nos na actonan di infieldad contra Dios. Ki un alivio!—Revelacion 20:1-3.
8, 9. Den e mundu nobo, kico lo sosodé cu afliccion, malesa, i behes?
8 Cu tempu, tur clase di enfermedad lo disparcé. (Isaías 33:24) E ora ei esnan coho lo para, cana, core, i baila riba pianan fuerte i salú. Despues di añanan di bida den nan mundu di silencio, esnan surdu lo tende e zonidonan gososo rond di nan. Esnan ciegu lo keda babucá cu asombro segun cu un mundu ricu di color i figura ta forma dilanti nan wowonan. (Isaías 35:5, 6) Por fin, nan lo mira e cara di nan stimánan! Kisas e ora ei nan bista lo nubla djis pa un ratu so cu lágrimanan di goso.
9 Djis pensa! Ningun bril mas, ningun krùk ni garoti mas, ningun remedi mas, ningun clínica dental of hospital mas! Nunca mas atrobe malesa emocional i depresion lo priva hende di felicidad. Ningun infancia lo ser afligí dor di malesa. E curso di bira bieu cu ta causa daño lo ser cambiá den direccion contrario. (Job 33:25) Nos lo bira mas salú, mas fuerte. Tur mainta nos lo lanta for di un soño di anochi refrescante cu energia renobá, yen di vigor i ansioso pa un dia nobo di bida vibrante i trabou satisfaciente.
10. Ki asignacion di trabou sobrebibientenan di Armagedon lo encargá di dje?
10 Lo tin abundancia di trabou gososo pa e sobrebibientenan di Armagedon haci. Nan lo transformá e tera den un paradijs. Cualkier señal dje sistema bieu contaminá lo ser kitá. Parkenan i hofinan lo reemplasá barionan pober i terenonan ruiná. Tur hende lo disfrutá di bibienda confortabel i placentero. (Isaías 65:21) Segun cu tempu ta pasa, e partinan paradísico ei dje tera lo crece i uni te ora cu henter e mundu alcansá e norma di bunitesa poné pa e Creador aya den e hofi di Eden. Ki satisfaciente lo ta pa participá den e trabou ei di restoracion!
11. Kico lo ta humanidad su futuro relacion cu e tera su medio ambiente i bida di animal?
11 Tur esaki lo ser hací bou di guia divino di manera cu lo no haci daño n’e medio ambiente. Hende lo ta na pas cu e animalnan. En bes di mata nan desenfrenadamente, hende lo resumí mayordomia responsabel riba e tera, cuidando nan bon. Visualisá lobonan i lamchinan, leonnan i bisénan, comiendo huntu—i e animalnan doméstico lo no forma ningun peliger. Asta un mucha chikitu lo no tin mester di tene miedu di bestianan salbahe, tampoco e trankilidad dje mundu nobo lo ser interumpí dor di hende cruel i feros. (Isaías 11:6-8) Ki un mundu nobo pacífico esei lo ta!
HUMANIDAD TRANSFORMA
12. Con Isaías 11:9 ta hañando cumplimentu awe, i con lo e ser cumplí den Paradijs?
12 Isaías 11:9 ta bisa nos pakico ningun daño lo ser hací den tur e tera. E ta bisa: “E tera siguramente lo ser yená cu e conocimentu di Jehova mescos cu e awanan ta cubriendo e laman mes.” Esaki ta corespondé cu hende pasobra animalnan no por adkerí “e conocimentu di Jehova” i haci cambionan, ya cu nan ta ser dirigí dor di instinto. Pero e conocimentu di nos Creador sí ta cambia hende. Sin duda ya caba bo mes a haci algun cambio como resultado di aplicá e conocimentu di Dios den bo bida. Miyones di hende a haci esei. P’esei, e profecia aki ya caba a cuminsá cumpli entre esnan cu ta sirbi Jehova. Sin embargo, tambe e ta señalá na un tempu ora hende den henter e mundu lo kita cualkier característica animalístico of violento i lo bira pacífico pa semper.
13. Ki programa educacional lo tuma lugá riba tera?
13 Ki maraviyoso lo ta ora e conocimentu di Dios ta yena e tera! Lo tin un programa educacional extenso bou di direccion dje Rey Jesucristo i su 144.000 co-gobernante. “Rolnan” nobo e ora ei lo bini na vigor. Evidentemente esakinan ta Dios su instruccionnan skirbí cu lo sirbi como un base pa educá habitantenan terenal. (Revelacion 20:12) Humanidad lo siña, no di guera, sino di pas. Tur arma destructivo lo disparcé pa semper. (Salmo 46:9) Habitantenan dje tera nobo lo ser siñá pa trata nan próhimo cu amor, respet i dignidad.
14. Con e mundu lo ta diferente ora humanidad ta un solo famia uní?
14 Humanidad lo bira un solo famia uní. Lo no tin ningun barera pa unidad i hermandad. (Salmo 133:1-3) Ningun hende su cas mester ta cerá na yabi pa tene ladronnan pafó. Pas lo reina den tur curason, den tur cas, den tur parti dje tera.—Mikéas 4:4.
E RESURECCION GOSOSO
15. Cua dos grupo lo ser resucitá riba tera?
15 Durante e Milenio ei, e resureccion lo tuma lugá. Esnan cu boluntariamente a peca contra Dios su spiritu santu, of forsa activo, dor di a actua sin repentí contrario cu su manifestacion of guia lo no ser resucitá. (Mateo 23:15, 33; Hebreonan 6:4-6) Naturalmente, Dios ta esun cu lo dicidí ken a peca contra e spiritu santu. Pero dos grupo distinto lo ser resucitá—“e hustunan i e inhustunan.” (Echonan 24:15) Siendo cu lo tin órden apropiado, ta razonabel pa concluí cu e proménan pa ser duná un bon biní bek na bida riba tera lo ta e hustunan, esnan cu a sirbi Jehova lealmente.—Hebreonan 11:35-39.
16. (a) Ken lo ta entre “e hustunan” resucitá riba tera? (b) Cua di esnan fiel di tempu di antigua abo particularmente kier topa, i pakico?
16 En bes di tende noticia en cuanto gueranan, desasternan, i morto, Jehova su sirbidornan lo ricibí informenan maraviyoso dje resureccion. Lo ta excitante pa ser informá en cuanto e bolbementu di homber i muhernan fiel manera Abel, Enoc, Noe, Abraham, Sara, Job, Moises, Rahab, Rut, David, Elías, Ester. Ki echonan histórico emocionante nan lo presentá segun cu nan ta duna detayenan afondo di hopi relato bíblico! No tin duda cu nan i esnan hustu cu a muri den tempu mas recien lo ta mes ansioso pa sa tocante e fin dje sistema di Satanas i con Jehova a santificá su nomber santu i a vindicá su soberania.
17. Ki yudansa esnan fiel lo duna na otronan cu ser resucitá?
17 Ki útil esnan fiel aki lo ta durante e siguiente fase dje resureccion, ora miles di miyones di “e inhustunan” ta ser librá for dje cadenanan di morto! Mayor parti di humanidad nunca tabatin un oportunidad pa conocé Jehova. Satanas tabata ‘ciegando nan mente.’ (2 Corintionan 4:4) Pero e obra dje Diabel lo ser reducí na nada. E inhustunan lo bini bek den un tera bunita i pacífico. Nan lo ser ricibí dor di un pueblo bon organisá pa siña nan tocante Jehova i su Yu reinante, Jesucristo. Segun cu miles di miyones di esnan resucitá ta yega na conocé i stima nan Creador, e conocimentu di Jehova lo yena e tera den un manera sin precedente.
18. Con bo ta kere lo bo sinti ora di duna bon biní na bo stimánan resucitá?
18 Ki goso e resureccion lo trece na nos curason! Ken no a sufri pa motibu di nos enemigu, esta morto? En berdad, ken no a sinti su mes totalmente kibrá ora un banchi di amor of amistad a ser interumpí segun cu malesa, behes, accidente, of violencia a causa e morto di un ser kerí? Imaginá, anto, e goso di hendenan cu lo bolbe topa otro den Paradijs. Mamanan i tatanan, yu hombernan i yu muhernan, amigunan i famianan, lo core brasa un e otro, hariendo i yorando di goso.
PERFECCION POR FIN!
19. Cua milager lo tuma lugá durante e Milenio?
19 Atrabes dje Milenio, un milager maraviyoso lo ta tumando lugá. Pa humanidad, lo e ta kisas e aspecto di mas emocionante di Cristo su Reinado di Mil Aña. Jehova lo dirigí su Yu pa aplicá e beneficionan dje sacrificio di rescate na cada homber i muher fiel i obediente. Mediante e método ei, tur picá lo ser kitá i humanidad lo ser elevá na perfeccion—1 Juan 2:2; Revelacion 21:1-4.
20. (a) Kico lo nificá pa ta perfecto? (b) Na ki tempu sobrebibientenan di Armagedon i esnan resucitá ta cuminsá biba den e sentido completo?
20 Perfeccion! Kico esei lo nificá? Esei lo nificá un bolbementu na e bida manera Adam i Eva a disfrutá di dje promé cu nan a peca contra Jehova Dios. Físicamente, mentalmente, emocionalmente, moralmente, spiritualmente—den tur manera imaginabel—hende perfecto lo cumpli completamente cu e normanan di Dios. Pero tur hende lo ta idéntico e ora ei? Absolutamente cu no! Jehova su creacionnan—palunan, flornan, animalnan—tur ta mustra nos cu e ta stima variedad. Hende perfecto lo tin diferente personalidad i abilidadnan. Cada un lo disfrutá di bida manera Dios tabata kier pa esei ta. Revelacion 20:5 ta bisa: “E resto dje mortonan no a yega na bida te cu e mil aña a terminá.” Mescos cu e multitud grandi di sobrebibiente di Armagedon, esnan resucitá lo bira completamente bibu ora nan alcansá perfeccion sin picá.
21. (a) Kico lo sosodé na final di Cristo su Reinado di Mil Aña? (b) Kico lo sosodé finalmente cu Satanas i tur cu ta apoy’é?
21 Hendenan perfecto lo enfrentá un prueba final. N’e fin dje Milenio, Satanas i su demoñonan lo ser librá for dje abismo pa un tempu corticu i lo ser permití pa haci un esfuerso final pa kita hende for di Jehova. Algun hende lo pone mal deseo riba amor pa Dios, pero e rebelion aki lo ser cortá. Jehova lo ehecutá esnan egoista aki huntu cu Satanas i tur su demoñonan. Anto tur hacidor di maldad lo disparcé pa semper.—Revelacion 20:7-10.
KICO ABO LO HACI?
22. Kico bo ta spera cu anhelo pa haci den Paradijs?
22 Eternidad lo extendé dilanti esnan cu ta stima Jehova Dios i ta biba den e tera paradísico. Nos por apénas imaginá nan goso, i abo tambe por participá den esaki. Música, arte, obranan di man—wel, logronan humano perfecto lo surpasá e obranan di mas excelente dje maestronan di mas grandi den e sistema di cosnan aki! Al fin i al cabo, hende lo ta perfecto i lo tin tempu sin límite nan dilanti. Imaginá loke cu lo bo ta capas pa haci como un hende perfecto. Pensa, tambe, di loke abo i bo próhimo lo siña tocante Jehova su creacion—for dje miles di miyones di galaxianan atrabes di universo te na e parti di mas chikitu di un atom. Tur cos cu humanidad logra lo sigui alegrá e curason di nos Tata celestial, Jehova.—Salmo 150:1-6.
23. Pakico bida den Paradijs nunca lo bira laf?
23 Bida e ora ei lo no ta laf. Lo e bira mas i mas interesante segun cu tempu ta pasa. Bo ta mira, no tin fin na e conocimentu di Dios. (Romanonan 11:33) Atrabes di eternidad, semper lo tin mas pa siña i horizontenan nobo pa explorá. (Eclesiástes 3:11) I segun cu bo ta sigui siña tocante Jehova Dios, lo bo sigui biba—no pa djis un par di aña sino pa semper!—Salmo 22:26.
24, 25. Pakico bo mester biba awor na armonia cu e conocimentu di Dios?
24 No ta bale la pena pa haci cualkier esfuerso of sacrificio pa un futuro deleitabel riba un tera paradísico? Claro cu si! Wel, Jehova a extendé na bo e yabi pa e futuro briyante ei. E yabi ei ta e conocimentu di Dios. Lo bo us’é?
25 Si bo ta stima Jehova, lo bo haña deleite den haci su boluntad. (1 Juan 5:3) Segun cu bo ta sigui e curso ei, ki bendicionnan lo bo experenciá! Si bo aplicá e conocimentu di Dios, lo e por trece pa bo un bida mas felis asta den e mundu turbulento aki. I e recompensanan den futuro ta inmenso, pasobra esaki ta e conocimentu cu ta hiba na bida eterno! Awor ta e tempu faborabel pa bo actua. Sea determiná pa biba na armonia cu e conocimentu di Dios. Demostrá bo amor pa Jehova. Onra su nomber santu i duna prueba cu Satanas ta un gañador. En buelta, Jehova Dios, e Fuente di berdadero sabiduria i conocimentu, lo alegrá en cuanto bo den su curason grandi i amoroso. (Jeremías 31:3; Sofonías 3:17) I lo e stimá bo pa semper!
TEST BO CONOCIMENTU
Kico ta “e berdadero bida”?
Despues di Armagedon, kico lo sosodé riba tera?
Ken lo ser resucitá riba tera?
Con humanidad lo bira perfecto i finalmente ser probá?
Kico ta bo speransa relacioná cu Paradijs?
[Plachi na página 188, 189]
Bo ta spera di biba den Paradijs, ora e conocimentu di Dios ta yena e tera?