Mantené Pas den Bo Cas

1. Kico ta algun cos cu por causa division den famianan?

FELIS ta esnan cu ta pertenecé na famianan den cua tin amor, comprension i pas. Nos ta spera, cu esun di bo ta un famia asina. Ta tristu pa bisa, pero cantidad incontabel di famianan no ta cuadra cu e descripcion ei i ta dividí pa un of otro motibu. Kico ta dividí famianan? Den e capítulo aki nos lo considerá tres cos. Den algun famia, no tur miembro ta compartí e mésun religion. Den otronan, e yunan kisas no tin e mésun mayornan biológico. Den otronan mas, e lucha pa haña un entrada of e deseo pa mas cosnan material ta parce di dividí miembronan di famia. Sin embargo, circunstancianan cu ta dividí un famia kisas no ta afectá un otro famia. Kico ta haci e diferencia?

2. Na unda algun hende ta busca guia pa bida di famia, pero cua ta e mihó fuente pa tal guia?

² Punto di bista ta un factor. Si abo sinceramente ta trata di comprendé e otro persona su punto di bista, ta mas probabel cu lo bo dicerní con pa conserbá un famia uní. Un di dos factor ta bo fuente di guia. Hopi hende ta sigui e conseho di compañero di trabou, bisiña, columnistanan di corant, of otro guianan humano. Sin embargo, algun hende, a haña sa loke e Palabra di Dios ta bisa tocante nan situacion, i despues nan a aplicá loke nan a siña. Con haciendo esaki por yuda un famia mantené pas den un cas?—2 Timoteo 3:16, 17.

SI BO ESPOSO TIN UN OTRO RELIGION

3. (a) Kico ta e conseho di Bijbel relacioná cu casa cu un persona di otro religion? (b) Cua ta algun principio básico cu ta aplicá si un casá ta un creyente i e otro no?

³ Bijbel ta desconsehá nos fuertemente pa casa cu un persona cu un fe religioso diferente. (Deuteronomio 7:3, 4; 1 Corintionan 7:39) Sin embargo, kisas bo a siña e berdad for dje Bijbel despues di bo matrimonio pero bo esposo sí no. Kico e ora ei? Naturalmente, e voto matrimonial ta keda válido. (1 Corintionan 7:10) Bijbel ta enfatisá e permanencia dje laso matrimonial i ta animá hendenan casá pa resolvé nan diferencianan mas bien cu hui for di nan. (Efesionan 5:28-31; Tito 2:4, 5) Sin embargo, kico si bo esposo ta oponé fuertemente pa bo practicá e religion dje Bijbel? Kisas e ta purba strobá bo di bai reunionnan di congregacion, of e por bisa cu e no kier pa su esposa bai di cas pa cas, papiando tocante religion. Kico abo lo haci?

4. Den ki manera un esposa por mustra empatia si su esposo no ta compartí su religion?

⁴ Puntra bo mes, ‘Pakico mi esposo ta sinti asina ei?’ (Proverbionan 16:20, 23) Si e no ta comprendé realmente loke bo ta haciendo, e por ta preocupá tocante bo. Of e por ta bou di presion di famianan debí cu bo no ta participá mas den cierto custumber cu ta importante pa nan. Un esposo a bisa, “Siendo lagá mi so na cas, mi a sintí mi bandoná.” E homber aki a sinti cu e tabata perdiendo su esposa pa motibu di un religion. Sin embargo orguyo a impidié di admití cu e tabata solitario. Bo esposo kisas tin mester di e siguransa cu bo amor pa Jehova no ta nificá cu awor bo ta stima bo esposo ménos cu bo tabata stim’é promé. Sea sigur di dedicá tempu na dje.

5. Ki balansa e esposa kende su esposo ta di un otro religion mester mantené?

⁵ Sin embargo, algu asta mas importante mester ser considerá pa bo por trata cu e situacion prudentemente. E Palabra di Dios ta insta esposanan: “Sea sumiso na boso esposo, manera ta pas den Señor.” (Colosensenan 3:18) Pues, e ta spierta contra di un spiritu di independencia. Ademas, dor di bisa “manera ta pas den Señor,” e texto aki ta indicá cu sumision na bo esposo tambe mester tuma na consideracion sumision n’e Señor. Mester tin un balansa.

6. Ki principionan un esposa cristian mester tene na mente?

⁶ Pa un cristian, asistí na reunionnan di congregacion i testificá na otronan tocante bo fe basá riba Bijbel ta aspectonan importante di adoracion berdadero cu no mester ser neglishá. (Romanonan 10:9, 10, 14; Hebreonan 10:24, 25) Kico lo bo haci, anto, si un hende directamente mandá bo pa no cumpli cu un rekisito specífico di Dios? E apostelnan di Jesucristo a declará: “Nos mester obedecé Dios como gobernante mas bien cu hende.” (Echonan 5:29) Nan ehempel ta percurá un precedente cu ta aplicabel na hopi situacion den bida. Amor pa Jehova lo conmové bo pa rindi na dje e debocion cu corectamente ta pertenecé na dje? N’e mésun momento, bo amor i respet pa bo esposo lo hací bo purba na rindi debocion exclusivo na Jehova den un manera cu ta aceptabel pa bo esposo?—Mateo 4:10; 1 Juan 5:3.

7. Ki determinacion un esposa cristian mester tin?

⁷ Jesus a remarcá cu esaki no semper lo ta posibel. El a spierta cu pa motibu di oposicion n’e adoracion berdadero, miembronan creyente di algun famia lo sinti nan separá, como si fuera un spada a bini meimei di nan i e resto dje famia. (Mateo 10:34-36) Un muher na Hapon a experenciá esaki. Su esposo a opon’é pa 11 aña. Su esposo tabata maltrat’é severamente i frecuentemente tabata cer’é pafó di cas. Pero el a perseverá. Amigunan den e congregacion cristian a yud’é. El a haci oracion sin stop i a derivá hopi animacion for di 1 Pedro 2:20. E muher cristian aki tabata convencí cu si e keda firme, un dia su esposo lo uni cuné den sirbi Jehova. I el a hacié.

8, 9. Con un esposa mester actua pa evitá di pone obstáculonan innecesario dilanti su esposo?

⁸ Tin hopi cos práctico cu bo por haci pa afectá bo casá su actitud. Por ehempel, si bo esposo ta oponé bo religion, no dun’é motibunan válido pa keha den otro áreanan. Mantené e cas limpi. Cuida bo aparencia personal. Sea generoso cu expresionnan di amor i aprecio. En bes di criticá, duna apoyo. Mustra cu bo ta acudí na dje como cabes. No venga si bo ta sinti cu inhusticia a ser cometé contra bo. (1 Pedro 2:21, 23) Traha lugá pa imperfeccion humano, i si un discusion presentá, humildemente sea e promé pa pidi dispensa.—Efesionan 4:26.

⁹ No laga cu bo baimentu di e reunionnan ta un motibu pa su cuminda ta lat. Kisas bo por scoge tambe pa participá den e ministerio cristian na momentonan ora bo esposo no ta na cas. Ta sabí pa un esposa cristian evitá di predicá na su esposo ora e esposo no ta deseá esaki. Mas bien, e esposa ta sigui e conseho di apostel Pedro: “Boso, esposanan, sea sumiso na boso mes esposo, afin cu, si cualkier un no ta obediente n’e palabra, nan por ser ganá sin un palabra dor dje conducta di nan esposa, debí cu nan tabata testigo ocular di boso conducta decente huntu cu respet profundo.” (1 Pedro 3:1, 2) Esposanan cristian ta traha mas plenamente pa manifestá e frutanan di spiritu di Dios.—Galationan 5:22, 23.

ORA E ESPOSA TIN UN OTRO RELIGION

10. Con un esposo creyente mester actua pa cu su esposa si e ta di un otro religion?

¹⁰ Kico si e esposo ta e cristian activo i e esposa ta di un otro religion? Bijbel ta duna guia pa situacionnan asina. E ta bisa: “Si cualkier ruman homber tin un esposa no-creyente, i tog e [esposa] ta cumbiní pa biba cuné, lagu’e no bandon’é.” (1 Corintionan 7:12) Tambe e ta amonestá esposonan: “Sigui stima boso esposa.”—Colosensenan 3:19.

11. Con un esposo por mustra dicernimentu i cu tacto ehercé hefatura riba su esposa si e esposa tin un otro religion?

¹¹ Si bo ta esposo di un esposa cu tin un religion diferente di esun di bo, sea specialmente cuidadoso pa mustra respet pa bo esposa i consideracion pa su sintimentunan. Como un adulto, e ta merecé un grado di libertad pa practicá su creencianan religioso, asta si abo no ta di acuerdo cu nan. E promé biaha cu bo papia cuné tocante bo religion, no spera cu e ta bai descartá creencianan cu e tabatin pa hopi tempu pa aceptá algu nobo. En bes di bisa abruptamente cu e custumbernan religioso cu e i su famia a atesorá pa hopi tempu ta falsu, cu pacenshi trata na razoná cuné for dje Scritura. Kisas e ta sintié neglishá si bo ta dedicá hopi tempu n’e actividadnan dje congregacion. Tal bes e ta oponé bo esfuersonan pa sirbi Jehova, sin embargo e mensahe básico simplemente por ta: “Mi tin mester di mas tempu di bo!” Tene pacenshi. Si bo mustr’é consideracion amoroso, cu tempu e por ser yudá pa aceptá e adoracion berdadero.—Colosensenan 3:12-14; 1 Pedro 3:8, 9.

ENTRENANDO E YUNAN

12. Asta si un esposo i su esposa ta di diferente religion, con mester aplicá principionan bíblico den e entrenamentu di nan yunan?

¹² Den un famia cu no ta uní den adoracion, instruccion religioso dje yunan tin biaha ta bira un cuestion. Con mester aplicá principionan dje Scritura? Bijbel ta asigná e responsabilidad principal pa instruí e yunan na e tata, pero e mama tambe tin un rol importante pa hunga. (Proverbionan 1:8; compará cu Génesis 18:19; Deuteronomio 11:18, 19.) Asta si e no ta aceptá e hefatura di Cristo, tog e tata ta e cabes di famia.

13, 14. Si e esposo ta prohibí su esposa di hiba e yunan na reunionnan cristian of studia cu nan, kico e esposa por haci?

¹³ Algun tata no-creyente no ta oponé si e mama ta instruí e yunan den asuntunan religioso. Otronan sí ta hacié. Kico si bo esposo ta nenga di permití bo hiba e yunan na reunionnan di congregacion of asta ta prohibí bo pa studia e Bijbel cu nan na cas? Awor bo tin cu balansá un cantidad di obligacion—bo obligacion na Jehova Dios, na bo esposo como cabes, i na bo yunan stimá. Con bo por regla esaki?

¹⁴ Siguramente lo bo haci oracion tocante e asuntu. (Filipensenan 4:6, 7; 1 Juan 5:14) Pero finalmente, abo ta esun cu mester dicidí ki curso pa tuma. Si bo procedé cu tacto, haciendo bo esposo comprondé cu bo no ta desafiando su hefatura, su oposicion cu tempu por mengua. Asta si bo esposo ta prohibí bo di hiba bo yunan reunion of pa tin un studio di Bijbel formal cu nan, tog bo por instruí nan. Mediante bo combersacion diario i bo bon ehempel, trata na inculcá den nan un midí di amor pa Jehova, fe den su Palabra, respet pa mayornan—incluyendo nan tata—interes amoroso pa otro hende, i aprecio pa custumbernan conciencial di trabou. Cu tempu, e tata por nota e bon resultadonan i por apreciá e balor di bo esfuersonan.—Proverbionan 23:24.

15. Kico ta e responsabilidad di un tata creyente den e educacion dje yunan?

¹⁵ Si bo ta un esposo cu ta un creyente i bo esposa no ta, anto bo tin cu carga e responsabilidad di cria bo yunan “den e disiplina i reglamentu mental di Jehova.” (Efesionan 6:4) Miéntras bo ta haciendo esei, bo mester, naturalmente, ser bondadoso, amoroso i razonabel den trata cu bo esposa.

SI BO RELIGION NO TA ESUN DI BO MAYORNAN

16, 17. Ki principionan bíblico yunan mester tene na mente si nan aceptá un religion diferente for di esun di nan mayornan?

¹⁶ No ta straño mas pa asta yunan menor di edad aceptá puntonan di bista religioso cu ta diferente for di esnan di nan mayornan. Abo a haci esei? Si ta asina, e Bijbel tin conseho pa bo.

¹⁷ E Palabra di Dios ta bisa: “Sea obediente na boso mayornan den union cu Señor, pasobra esaki ta hustu: ‘Onra bo tata i bo mama.’” (Efesionan 6:1, 2) Esei ta enbolbé respet saludabel pa mayornan. Sin embargo, miéntras cu obedencia na mayornan ta importante, e no mester ser rindí sin tene cuenta cu e Dios berdadero. Ora un mucha bira suficiente grandi pa cuminsá tuma decisionnan, e ta carga un midí mas grandi di responsabilidad pa su accionnan. Esaki ta cierto no solamente relacioná cu ley seglar sino specialmente respecto ley divino. “Cada un di nos lo rindi cuenta di su mes na Dios,” Bijbel ta declará.—Romanonan 14:12.

18, 19. Si yunan tin un religion cu ta diferente for di esun di nan mayornan, con nan por yuda nan mayornan comprendé nan fe mihó?

¹⁸ Si bo creencianan ta poné bo haci cambionan den bo bida, trata na comprendé bo mayornan su punto di bista. Probablemente nan lo keda contentu si, como resultado di cu bo ta siña i aplicá siñansanan bíblico, bo ta bira mas respetuoso, mas obediente, mas diligente den loke nan ta rekerí di bo. Sin embargo, si bo religion nobo tambe ta poné bo rechasá creencianan i custumbernan cu nan personalmente ta atesorá, nan por sinti cu bo ta despreciando un herencia cu nan a busca pa duná bo. Nan por teme tambe pa bo bienestar si loke cu bo ta haciendo no ta popular den e comunidad of si e ta kita bo atencion for di actividadnan cu nan ta sinti por yudá bo prosperá materialmente. Orguyo tambe lo por ta un barera. Tal bes nan ta sinti cu, en efecto, bo ta bisando cu bo ta corecto i nan ta robes.

¹⁹ P’esei, mas pronto posibel, trata na haci areglo pa bo mayornan topa algun dje ancianonan of otro Testigonan maduro for dje congregacion local. Animá bo mayornan pa bishitá un Salon di Reino pa nan tende pa nan mes loke ta ser considerá i pa nan mira personalmente ki sorto di hende Testigonan di Jehova ta. Cu tempu, bo mayornan su actitud por suavisá. Asta ora mayornan ta inflexiblemente contra, ta destruí literatura bíblico, i ta prohibí e yunan pa asistí n’e reunionnan cristian, generalmente tin oportunidadnan pa lesa un otro caminda, pa papia cu compañeronan cristian, i pa duna testimonio na i yuda otro hendenan informalmente. Tambe bo por haci oracion na Jehova. Algun hóben mester warda te ora cu nan ta suficiente grandi pa biba pafó dje cas di famia promé cu nan por haci mas. Sin embargo, sea cual sea e situacion na cas no lubidá pa “onra bo tata i bo mama.” Haci bo parti pa contribuí na pas den cas. (Romanonan 12:17, 18) Ariba tur cos, busca pas cu Dios.

E DESAFIO DI TA UN MAYOR DI CRIANSA

20. Ki sintimentunan yunan por tin si nan tata of mama ta di criansa?

²⁰ Den hopi cas e situacion cu ta presentá e desafio di mas grandi no ta religioso sino biológico. Hopi famia awe tin yunan di e matrimonio anterior di un of ámbos dje mayornan. Den un famia asina, yunan por experenciá yaluzí i rencor of kisas un conflicto di lealtad. Como resultado, nan por rechasá bruscamente e esfuersonan sincero dje mayor di criansa pa ta un bon tata of mama. Kico por yuda haci un famia di criansa exitoso?

21. Apesar di nan circunstancianan special, pakico mayornan di criansa mester acudí na principionan hañá den Bijbel pa yudansa?

²¹ Sea conciente cu apesar dje circunstancianan special, principionan bíblico cu ta trece éxito den otro casnan ta aplicá aki tambe. Ignorando e principionan ei por, temporalmente, parce di aliviá un problema pero probablemente lo hiba mas despues na dolor di curason. (Salmo 127:1; Proverbionan 29:15) Cultivá sabiduria i dicernimentu—sabiduria pa aplicá principionan piadoso cu beneficionan a largu plaso na mente, i dicernimentu pa identificá pakico miembronan di famia ta bisa i ta haci cierto cosnan. Tin e necesidad tambe pa empatia.—Proverbionan 16:21; 24:3; 1 Pedro 3:8.

22. Pakico yunan ta hañ’é difícil pa aceptá un mayor di criansa?

²² Si bo ta un mayor di criansa, tal bes bo ta corda cu como amigu dje famia, kisas bo a ser bon ricibí dor dje yunan. Pero ora bo a bira nan mayor di criansa, nan actitud kisas a cambia. Cordando e mayor biológico kende no ta bibando mas cu nan, e yunan por ta luchando cu un conflicto di lealtad, posiblemente sintiendo cu bo kier kita e cariño cu nan tin p’e mayor ausente. Tin biaha, nan por cordá bo bot cu bo no ta nan tata of nan mama. Declaracionnan asina ta haci dolor. Tog, “no sea purá den bo spiritu pa sintí bo ofendí.” (Eclesiástes 7:9) Dicernimentu i empatia ta necesario pa trata cu e emocionnan dje muchanan.

23. Con por atendé cu disiplina den un famia cu yunan di criansa?

²³ E cualidadnan ei ta crucial ora bo ta dunando disiplina. Disiplina consistente ta vital. (Proverbionan 6:20; 13:1) I siendo cu no tur mucha ta mescos, disiplina por diferenciá di un caso p’e otro. Algun mayor di criansa ta haña cu, por lo ménos na principio, kisas ta mihó p’e mayor biológico atendé e aspecto di criansa aki. Aunke, ta esencial pa ámbos mayor concordá riba e disiplina i apoy’é, no faboreciendo un yu natural riba un di criansa. (Proverbionan 24:23) Obedencia ta importante, pero mester traha lugá pa imperfeccion. No reaccioná exagerá. Disipliná den amor.—Colosensenan 3:21.

24. Kico por yuda evitá problemanan moral entre miembronan dje sexo opuesto den un famia di criansa?

²⁴ Reunionnan di famia pa papia di cosnan por haci hopi pa prevení problema. Esakinan por yuda e famia concentrá riba e asuntunan mas importante den bida. (Compará cu Filipensenan 1:9-11.) Nan por yuda cada un tambe pa mira con e por contribuí pa alcansá metanan di famia. Ademas, reunionnan di famia pa papia francamente di cosnan por evitá problemanan moral. Mucha muhernan tin cu comprendé con pa bisti i comportá nan mes rond di nan tata di criansa i cualkier ruman homber di criansa, i mucha hombernan mester di conseho riba conducta corecto pa cu nan mama di criansa i cualkier ruman muher di criansa.—1 Tesalonicensenan 4:3-8.

25. Ki cualidadnan por yuda mantené pas den un famia di criansa?

²⁵ Den enfrentá e desafio special aki di ser un mayor di criansa, tene pacenshi. Ta tuma tempu pa desaroyá relacionnan nobo. Ganando e amor i respet di yunan cu ken bo no tin un laso biológico por ta un tarea hopi grandi. Pero e ta posibel. Un curason sabí i cu dicernimentu, conectá cu un deseo fuerte pa agradá Jehova, ta e clave pa pas den un famia di criansa. (Proverbionan 16:20) Cualidadnan asina por yudá bo tambe pa enfrentá otro situacionnan cu éxito.

EMPEÑONAN MATERIAL TA DIVIDI BO CAS?

26. Den ki maneranan problema i actitudnan relacioná cu cosnan material por dividí un famia?

²⁶ Problema i actitudnan relacioná cu cosnan material por dividí un famia den hopi manera. Lamentablemente, algun famia ta kibra pa via di pleitamentu tocante placa i e deseo pa ta ricu—of por lo ménos un poco mas ricu. Division por desaroyá ora ámbos partner tin trabou seglar i ta cultivá un actitud di “mi placa, bo placa.” Asta si evitá pleitu, ora ámbos partner ta traha nan por haña nan mes cu un programa cu ta laga tiki tempu pa otro. Un tendencia creciente den e mundu ta pa tatanan biba leu for di nan famia pa periodonan largu—lunanan of asta añanan—afin di gana mas placa cu nunca nan por a gana na cas. Esaki por hiba na problemanan hopi serio.

27. Cua ta algun principio cu por yuda un famia cu ta bou di presion financiero?

²⁷ No por pone ningun regla pa atendé e situacionnan aki, ya cu diferente famia mester trata cu diferente presion i necesidadnan. Tog, conseho bíblico por yuda. Por ehempel, Proverbionan 13:10 ta indicá cu tin biaha por evitá lucha innecesario dor di “consultá huntu.” Esaki ta enbolbé no meramente declarando bo propio punto di bista pero buscando conseho i haña sa con e otro persona su punto di bista ta. Ademas, trahando un presupuesto realístico por yuda uni esfuersonan di famia. Tin biaha ta necesario—kisas temporalmente—pa ámbos casá traha pafó di cas pa percurá pa gastunan adicional, specialmente ora tin yunan of otro personanan cu ta dependé di nan. Ora esaki ta e caso, e esposo por trankilisá su esposa cu tog e tin tempu p’e. E esposo huntu cu e yunan amorosamente por yuda cu algun trabou cu e esposa normalmente lo a haci su so.—Filipensenan 2:1-4.

28. Cumpliendo cu cua recordatorionan lo yuda un famia traha pa alcansá unidad?

²⁸ Sin embargo, corda cu aunke placa ta un necesidad den e sistema di cosnan aki, e no ta trece felicidad. Siguramente e no ta duna bida. (Eclesiástes 7:12) En berdad, demasiado énfasis riba cosnan material por causa ruina spiritual i moral. (1 Timoteo 6:9-12) Cuantu mas mihó ta pa busca promé e Reino di Dios i su husticia, cu e siguransa di haña su bendicion riba nos esfuersonan pa obtené e necesidadnan di bida! (Mateo 6:25-33; Hebreonan 13:5) Dor di mantené interesnan spiritual na promé lugá i dor di busca pas principalmente cu Dios, lo bo por haña cu bo famia, aunke kisas dividí dor di cierto circunstancia, lo bira unu cu ta berdaderamente uní den e aspectonan mas importante.