Paradijs Ta Cerca!

E cosnan malu cu ta sosodé actualmente riba tera ta indicá cu Paradijs ta cerca. Bijbel a bisa cu nos lo experenciá tempunan teribel poco promé cu e Paradijs bini. Nos ta biba den e tempu ei awor! Ata aki algun dje cosnan cu Bijbel a bisa cu lo sosodé:

Guera grandi. “Nacion lo lanta contra nacion i reino contra reino.” (Mateo 24:7) E profecia aki a cumpli. Desde aña 1914, tabatin dos guera mundial i hopi guera mas chikitu. Miyones di hende a muri den nan.

Malesa tur caminda. Lo tin ‘pestilencia den un lugá tras di otro.’ (Lucas 21:11) Esaki a sosodé? Sí. Cancer, malesa di curason, tuberculósis, malaria, AIDS i otro malesanan a mata miyones di hende.

Falta di cuminda. Na tur parti di tera tin hende cu no tin suficiente cuminda pa come. Miyones di hende ta muri di hamber tur aña. Esaki ta un otro señal cu Paradijs lo bini pronto. Bijbel ta bisa: “Lo tin scarcedad di cuminda.”—Marco 13:8.

Temblor. “Lo tin . . . temblor den un lugá tras di otro.” (Mateo 24:7) Esaki tambe a bira realidad den nos tempu. Desde 1914, mas cu un miyon hende a muri den temblor.

Hende malbado. Hende lo ta “stimadó di placa” i “stimadó di nan mes.” Nan lo ta “stimadó di placer mas bien cu stimadó di Dios.” Yunan lo ta “desobediente na mayornan.” (2 Timoteo 3:1-5) Bo no ta di acuerdo cu hopi hende ta asina awe? Nan no tin respet pa Dios, i nan ta causa problema pa esnan cu ta purba siña tocante Dios.

Crímen. Tambe lo tin “aumento di maldad.” (Mateo 24:12) Probablemente lo bo ta di acuerdo cu crímen ta pió cu e tabata añanan pasá. Tur caminda hende ta core e riesgo di ser hortá, gañá of di sufri daño.

Tur e cosnan aki ta mustra cu Dios su Reino ta cerca. Bijbel ta bisa: “Ora boso mira e cosnan aki sosodé, sa cu e reino di Dios ta cerca.” (Lucas 21:31) Kico e Reino di Dios ta? E ta Dios su gobiernu celestial cu lo trece Paradijs pa e tera aki. E Reino di Dios lo remplasá gobiernu humano.—Daniel 2:44.