Un Spiertamentu Di Pasado

Jehova lo no permití hende malbado ruiná Paradijs. Solamente su amigunan lo biba eiden. Kico lo pasa cu hende malbado? Pa haña sa e contesta, considerá e relato di Noe. Noe a biba miles di aña pasá. E tabata un bon homber cu semper a traha duru pa haci Jehova su boluntad. Pero e otro hendenan riba tera a haci malu. Ta p’esei Jehova a bisa Noe cu E tabata bai trece un diluvio pa destruí tur  e hendenan malbado ei. El a manda Noe traha un arca pa asina Noe cu su famia no muri ora e Diluvio a bini.—Génesis 6:9-18.

Noe cu su famia a traha e arca. Noe a spierta e hendenan cu e Diluvio tabata biniendo, pero nan no a scuch’é. Nan a sigui haci malu. Despues cu e arca tabata cla, Noe a hinca bestia den e arca, i e cu su famia tambe a drenta paden. E ora ei Jehova a trece un tormenta grandi. Awa a cai pa 40 dia i 40 anochi. E awa a inundá henter e tera.—Génesis 7:7-12.

E hendenan malbado a perde nan bida, pero Noe i su famia a salba. Jehova a protehá nan atrabes dje Diluvio pa drenta un tera hací limpi di maldad. (Génesis 7:22, 23) Bijbel ta bisa cu e tempu ta bini atrobe ora Jehova lo destruí esnan cu ta nenga di haci loke ta corecto. Bon hende lo no ser destruí. Nan lo biba pa semper riba e tera paradísico.—2 Pedro 2:5, 6, 9.

Awe hopi hende ta haci malu. Mundu ta yen di problema. Jehova ta manda su Testigonan bes tras bes pa spierta hende i tog mayoria di nan no kier scucha Jehova su palabranan. Nan no kier cambia nan camindanan. Nan no kier aceptá loke Dios ta bisa tocante bon i malu. Kico lo sosodé cu e hendenan aki? Nan lo cambia un dia? Hopi lo no cambia nunca. E tempu ta yega ora hende malbado lo ta destruí i lo no biba nunca mas.—Salmo 92:7.

Lo no destruí e tera; lo hacié un paradijs. Esnan cu bira amigu di Dios lo biba pa semper den Paradijs riba tera.—Salmo 37:29.