Papia ku Sintimentu

SINTIMENTU ta un parti fundamental di bida humano. Ora un persona ta ekspresá su sintimentunan, e ta revelá kiko tin den su kurason, ki klase di persona e ta di paden, kiko e ta pensa di hende i di sierto situashonnan. Hopi hende ta skonde nan sintimentunan pa motibu di mal eksperensia den nan bida i, den algun kaso, debí na influensia di nan kultura. Pero Yehova ta animá nos pa kultivá kualidatnan positivo den nos paden i ekspresá nan na un manera apropiá.—Rom. 12:10; 1 Tes. 2:7, 8.

Ora nos ta papia di kurason, nos forma di ekspresá mester reflehá nos sintimentunan, sino nos oyentenan lo por duda di nos sinseridat. Si nos ekspresá e palabranan ku e sintimentu apropiá, loke nos ta bisa lo haña un beyesa i profundidat ku lo toka kurason di nos oyentenan.

Papia ku Sintimentu Tierno. Muestra di kariño i ternura sa tin hopi di haber ku nos aktitut pa ku otro hende. P’esei ora nos ta papia tokante Yehova su kualidatnan atraktivo i ta ekspresá apresio pa Yehova su bondat, nos stèm mester tin un tono kariñoso. (Isa. 63:7-9) I ora nos ta papia ku otro hende, nos manera di papia tambe mester transmití un kariño ku ta atraé hende.

Un leproso a bini serka Hesus i a roga Hesus kur’é. Imaginá bo e tono di Hesus su stèm ora el a bisa: “Mi kier, sea limpi.” (Mar. 1:40, 41) Visualisá tambe e esena ora ku un muhé ku tabatin 12 aña largu ta sufri di un derame di sanger ta aserká Hesus di patras, sin hala atenshon, i ta mishi ku e zòm di su mantel. Ora e muhé a realisá ku Hesus a ripará esei, e ta bini dilanti temblando, ta kai na Hesus su pia i ta revelá dilanti tur hende pakiko el a mishi ku e paña di Hesus i kon el a ser kurá. Pensa riba e tono ku Hesus ta usa pa bis’é: “Yu, bo fe a salba bo; bai na pas.” (Luk. 8:42b-48) E ternura ku Hesus a desplegá na e okashonnan ei te awe ta konmové nos kurason.

Ora nos, meskos ku Hesus, ta sinti kompashon pa hende i di bèrdat kier yuda nan, nos lo reflehá esaki den e manera ku nos ta papia ku nan. Tal ekspreshon di kariño, ternura i kompashon ta sinsero, no eksagerá. Nos kompashon por hasi un diferensia grandi den e manera ku hende ta reakshoná. Gran parti di e mensahe ku nos ta proklamá den sirbishi di vèlt ta bon pa ekspresá ku un tono kariñoso i ku kompashon, foral ora nos ta rasoná ku un persona òf ta anim’é, spièrt’é òf komprondé p’e.

Laga bo kara reflehá e kariño ku bo ta sinti pa hende. Si bo kara ta ekspresá kariño, bo ouditorio lo sinti su mes atraí na bo meskos ku na un kandela riba un anochi friu; pero si no ta asina, talbes bo ouditorio lo duda ku bo ta sinseramente interesá den nan. Bo no por fingi ku bo tin kariño; e mester ta sinsero.

Bo stèm tambe mester demostrá ku bo tin kariño. Si bo tin un stèm skèrpi i brutu, kisas ta difísil pa bo ekspresá bo mes ku un tono kariñoso. Pero ku tempu i esfuerso lo bo por logra. Un kos ku por yuda, i esaki ta simplemente un téknika, ta di kòrda ku zonidunan kòrtiku i abrupto ta hasi bo manera di papia brutu. P’esei siña rèk e zonidunan ku ta mas suave, i asina bo stèm lo bira mas kariñoso.

Sin embargo, loke ta konta mas ta kiko ta forma bo interes prinsipal. Si sinseramente bo pensamentunan ta konsentrá riba bo oyentenan i bo tin e deseo di transmití algu ku por benefisiá nan, bo manera di papia lo reflehá e sintimentu ei.

Ounke un presentashon animá ta stimulante, bo tin ku mustra ternura tambe. No ta tur biaha ta sufisiente pa konvensé e mente di hende, tambe nos tin ku konmové nan kurason.

Ekspresá Otro Sintimentunan. Un persona ku ta sufri, talbes ta ekspresá sintimentunan manera ansiedat, miedu i depreshon. Goso mester ta un sintimentu prominente den nos bida i nos mester ekspres’é libremente ora nos ta papia ku otro hende. Di otro banda, tin algun sintimentu ku nos mester dominá, ya ku nan no ta kuadra ku e personalidat kristian. (Efe. 4:31, 32; Fil. 4:4) Nos por transmití tur tipo di sintimentu mediante e palabranan ku nos ta skohe, ku e tono i intensidat ku kua nos ta papia, ku nos ekspreshon di kara i ku nos gestonan.

Beibel ta papia di tur tipo di emoshon humano. Tin biaha e ta simplemente menshoná nan; na otro okashon Beibel ta konta susesonan òf ta sita palabranan ku ta revelá nan. Ora bo ta lesa tal informashon na bos haltu ku un stèm ku ta reflehá e emoshonnan ei, lo bo kousa un mayor impakto—tantu riba bo mes komo riba esnan ku ta skucha bo. Pa logra esei, bo tin ku pone bo mes den sapatu di e hendenan ku tin den e relato. Hinka bida den loke bo ta lesa. Sin embargo, un diskurso no ta un obra teatral, pues tene kuidou pa bo no eksagerá.

Sintimentu Adekuá pa e Informashon. Meskos ku entusiasmo, e kariño i e otro sintimentunan ku bo ta ekspresá ta dependé pa un gran parti di loke bo ta bisando.

Ban na Mateo 11:28-30, i tuma nota di loke e ta bisa. Despues lesa kon Hesus a kondená e eskriba- i fariseonan, manera ta pará skirbí na Mateo kapítulo 23. Nos no por imaginá ku Hesus a ekspresá e palabranan fuerte aki di kondena den un manera laf i sin grasia.

Ki sorto di sintimentu bo ta kere bo mester ekspresá ora di lesa un relato manera esun na Génesis kapítulo 44, kaminda Huda ta roga na fabor di su ruman hòmber Benyamin? Tuma nota di e sintimentu ekspresá na versíkulo 13, i kon versíkulo 16 ta indiká kiko Huda a pensa tabata e motibu pa e kalamidat, i kon Yosef mes a reakshoná, manera ta pará skirbí na Génesis 45:1.

Pues, si nos kier pa nos manera di lesa òf papia ta efikas, nos tin ku pensa no solamente riba e palabranan i ideanan, sino tambe riba e sintimentunan ku mester kompañá esakinan.